Өвөрхангай аймгийн дугаар сургуулийн аравдугаар ангийн сурагч нас барсан хэрэг гарсан талаар бид өмнө нь мэдээлсэн. Тодруулбал, бусдад хүчирхийлүүлж, хохирогч болсон 15 настай, эмэгтэй хүүхэд амиа хорлож, нас барсан юм.

Энэ талаар эх сурвалжаас тодруулахад “Талийгаач охин аравдугаар ангид сурдаг байсан. Өнгөрсөн нэгдүгээр сард хүчирхийлүүлсэн юм байна лээ. Тодорхой хэлбэл, Өвөрхангай аймгийн төрийн байгууллагын албан хаагч охиныг хүчирхийлсэн гэсэн. Уг хэргийг аймгийн цагдаагийн газар шалгаж байсан ч удааширч, охин сэтгэл санааны гүн хямралд орсон. Үүнээс болоод амиа хорлож, нас барсан байж болзошгүй байна. Хэргийг Өвөрхангай аймгийн цагдаагийн газрын албан хаагчид шалгаж байгаа. Охин цагдаагийн байгууллагад хэд хэдэн удаа хохирогчоор мэдүүлэг өгч байсан юм билээ” гэлээ.

Харин энэ талаар албаны эх сурвалжаас тодруулахад “Өвөрхангай аймгийн Бүсийн оношилгоо, эмчилгээний төвд хоёр хөлийн шилбэ хэсгээр хугарсан өсвөр насны эмэгтэй хүүхэд хүргэгдэн ирлээ” гэх дуудлага тавдугаар сарын 9-ний 21:05 цагт Өвөрхангай аймгийн цагдаагийн газарт иржээ. Дуудлагын дагуу тус аймгийн цагдаагийн газрын албан хаагчид шалгалтын ажиллагаа явуулахад “Арвайхээр сумын дугаар хаягт бүртгэлтэй, 15 настай эмэгтэй хүүхэд орон сууцны дээврээс унасан байдалтай эмнэлэгт хүргэгдсэн ирсэн байжээ. Анхан шатны тусламж үзүүлэх явцад охин шархаа даалгүй амиа алдсан байна” гэв.

Талийгаач охиныг хүчирхийлсэн хэрэг нэгдүгээр сард гарчээ. Охин удаа дараа цагдаагийн байгууллагад мэдүүлэг өгч, хохирогчоор оролцож байжээ.

ТАЛИЙГААЧ ОХИНЫ ЭЭЖ

Бид талийгаач охины ээж О-той холбогдоход “Одоогоор ямар ч мэдээлэл өгөх боломжгүй байна. Би Өвөрхангай аймаг руу явж байна. Очоод өмгөөлөгч авна.Охиноо алдсан бид маш их гомдолтой байна. Нууцын зэрэглэлтэй хэрэг болоод байгаа юм биш үү” гэлээ.

ЗЭВСЭГТ ХҮЧНИЙ 256 ДУГААР АНГИЙН ЗАХИРАГЧ

Энэ оны нэгдүгээр сард охины ээж цагдаагийн байгууллагад дуудлага, мэдээлэл өгчээ. Тэрбээр “Охин маань бэлгийн харилцаанд орсон байж болзошгүй байна. Шүүх шинжилгээнд хамруулж өгнө үү” гэжээ. Цагдаагийн албан хаагчид уг хэргийг нэгдүгээр сараас хойш шалгаж байгаа байжээ.

Охиныг хүчирхийлсэн байж болзошгүй эрэгтэй нь 24 настай, цэргийн ангид ажилладаг гэх мэдээлэл бий. Бид энэ талаар Өвөрхангай аймгийн Зэвсэгт хүчний 256 дугаар ангийн захирагчтай холбогдож, тодруулахад “Манай албан хаагч хүчингийн хэрэгт холбогдоогүй. Өнгөрсөн нэгдүгээр сараас хойш албан хаагчтай холбоотой мэдээлэл цагдаагийн байгууллагаас ирээгүй” гэлээ.