Нийтийн тээврийн үйлчилгээ эрхэлдэг “Тэнүүндэлгэр” ХХК-ийн захирал С.Энхболдыг хууль хяналтын байгууллагаас шалгаж эхэлжээ. Тодруулбал, тус компани нь 2009-2010 онд улсаас найман автобус зээлээр авсан ч өнөөдрийг хүртэл төлбөрөө барагдуулаагүй гэх гомдол, мэдээлэл хууль хяналтынханд иржээ. Иргэнээс ирсэн өргөдөл, гомдлын дагуу мөрдөгчип шалгалтын ажиллагаа явуулж эхэлсэн талаар эх сурвалж мэдээллээ.

Мөн “Тэнүүндэлгэр” ХХК-ийн захирал С.Энхболдоос гадна улсаас авсан автобусны төлбөрөө барагдуулаагүй хэд хэдэн компанийн захирлыг хууль хяналтын байгууллагаас шалгаж байгаа талаар бид өмнө нь мэдээлсэн байдаг. Эргэн сануулахад, “Эрдэм транс” ХХК-ийн захирал Я.Эрдэмбилэгийг улсаас зээлээр авсан 30 автобусныхаа мөнгийг төлөөгүй гэх шалтгаанаар шалгаж байна.  Мөн “Сутайн буянт” ХХК-ийн захирал Б.Лхагвадуламыг 30 автобус, Атибус” ХХК-ийн захирал Г.Баярмагнайг найман автбусны “хэрэг”-ээр шалгаж эхэлсэн гэх.

3.8 ТЭРБУМ ТӨГРӨГӨӨР АВСАН 400 АВТОБУСЫГ ТӨРИЙН БОЛОН ХУВИЙН КОМПАНИУДАД ЗЭЭЛЭЭР ӨГЧЭЭ

2008-2010 он.

        2008 онд Нийслэлийн нийтийн тээврийн их багтаамжийн автобусны парк шинэчлэх төсөл” боловсруулжээ. Уг төслийн хүрээнд 400 автобусыг БНСУ-аас 24 сая ам.доллараар худалдан авах шаардлагатай гэсэн дүгнэлт гарч, 2009 онд Засгийн газраас хөрөнгөөр автобус авсан байдаг. 2009 оны хоёрдугаар сард Монгол Улс захиалсан 400 автобусныхаа 20 ширхгийг нь хүлээж авчээ. Харин тус оны долдугаар сар гэхэд автобуснуудаа хүлээж аваад дуусаад, төрийн болон хувийн өмчит компаниудад зээлээр олгосон байна.

Тодруулбал, Засгийн газраас тараасан 400 автобусыг төрийн болоод хувийн өмчийн компаниудад эргэн төлөгдөх нөхцлөөр өгчээ. Автобус зээлээр авсан компаниуд үйлчилгээнийхээ орлогоос 15 хувиар тусгай сан байгуулан төслөөр нийлүүлэгдсэн автобусны үнийг таван жилийн хугацаанд Монгол Улсыг хөгжүүлэх санд эргүүлж төлөхөөр гэрээ байгуулсан байна. Гэтэл дээр нэр дурдагдсан хувийн хэвшлийн компаниуд эргэн төлөлтөө өнөөдрийг хүртэл хийгээгүй гэнэ. Угтаа бол  эргэн төлөгдсөн мөнгөөр хуримтлалын сан байгуулж нийтийн тээврийн салбарын дараачийн шинэчлэлд зориулж шинэ автобус, сэлбэг хэрэгсэл авах зэрэгт зарцуулахаар төлөвлөсөн байжээ.

Нийтийн тээвэрт парк шинэчлэл хийж, татвар төлөгчдийн мөнгөөр авсан 400 автобусаа улс 250 ширхгийг нь төрийн өмчийн компаниудад тараажээ. Тодруулбал,

“Автобус-1” компанид 120 автобус,

“Автобус-3” компанид 80 автобус,

“Цахилгаан тээвэр” компанид 50 автобус өгсөн байна. Харин хувийн хэвшилд 150 ширхэг автобус хуваарилж өгчээ. Хувийн хэвшилд тараасан 150 автобусны наймыг нь “Тэнүүндэлгэр” ХХК-ийн захирал С.Энхболд компанидаа авсан баримт байна.

“ТЭНҮҮНДЭЛГЭР” ХХК-ИЙН ЗАХИРАЛ С.ЭНХБОЛД НАЙМАН АВТОБУСНЫХАА МӨНГИЙГ ХЭЗЭЭ ТӨЛӨХ ВЭ

Тухайн буюу 2008, 2009 оны ханшаар 400 автобусыг БНСУ-аас 3.8 тэрбум төгрөгөөр авч байжээ. Нэг автобусны үнэ ойролцоогоор 95 сая төгрөг байсан гэсэн үг. Өөрөөр хэлбэл, “Тэнүүндэлгэр” ХХК-ийн захирал С.Энхбол улсад 760 сая төгрөгийн хохирол учруулжээ.

Эрх мэдэл, албан тушаалын байдлаа урвуулан ашиглаж, үе үеийн Хотын удирдлагуудтай тохиролцож, өөртөө давуу байдал олгож, улсад хохирол учруулсан дээрх нэр бүхий компанийн захиралд ямар хариуцлага тооцох вэ. Бусадтай тохиролцож улсад хохирол учруулсан байж болзошгүй үе үеийн Хотын удирдлагуудад ямар хариуцлага хүлээлгэх вэ гэх асуулт хариултгүй байна.

 УЛСЫГ ЛУЙВАРДСАН ГЭХ “ТЭНҮҮНДЭЛГЭР” ХХК-ИЙН ЗАХИРАЛ С.ЭНХБОЛД ГЭЖ ХЭН БЭ