Төр нийгмийн нэрт зүтгэлтэн С.Зориг агсны төрсөн өдөр өнөөдөр тохиож байна. Харин өчигдөр түүний хэрэгт буруутгагдаж, гурван шатны шүүхээс 20-25 жилийн хорих ял сонссон Б.Содномдаржаа, Т.Чимгээ нарыг цагаатгаж байгаа талаар НПГ-аас мэдэгдлээ.  Өөрөөр хэлбэл, НПГ гурван шатны шүүхийн тогтоолыг, мөрдөн байцаасан цагдаагийн албан хаагчдын, ТЕГ-ын мөрдөгчдийн шийдвэрийг үгүйсгэж, хэлмэгдүүлэлт гэж үзлээ. Зургаан жил хориход хил хэргээр ял эдэлж, 25 жилийн хорих ял сонссон Б.Содномдаржаатай ярилцлаа.

-Таны бие давгүй юу. Таныг хэзээнээс энэ хэрэгт буруутгаж, шалгаж эхэлсэн. Цагдан хорих хугацаанд юу өрнөсөн зэрэг асуудлаар ярилцаж болох уу?

        -Амны билгээс ашдын билэг гэж сайн л гэж хариулах уу даа. Байнгын нуруу өвдөж, босож чадахгүй, сууж болохгүй л байна. Боломж гарвал хэвтэж л өгөөд байдаг боллоо. Гэхдээ амьдралаа авч явахын тулд ажиллаж, хөдөлж байх шаардлагатай. Яах ч аргагүй ажил хийгээд явж л байна. Нуруу шохойчихоос гадна, үе мөч их өвддөг болсон. Харанхуй нүхэнд олон жил хоригдохоор хүнд эрүүл эрхтэн гэж байхгүй болчихдог бололтой. Толгой байнга өвдөнө, хоол шингэхгүй үйл үзнэ. Нар, салхи орохгүй, чийгтэй өрөөнд зургаан жил хоригдсон юм чинь аргагүй байлгүй дээ. Цагаатгах тогтоолоо аваад, сайн эмчилгээнд явна гэж бодож байна.

Цагаатгасан, баяртай үйл явдлын хүрээнд л ярилцаж болох юм. Бусдаар тэр хар дурсамж руу буцаж очмооргүй, сөхөж яримааргүй байна. Юу амсаж, яаж тамлуулсан гэдгийг бүгд харсан шүү дээ. Эрүүдэн шүүлгэсэн гэдгийг бүгд мэдэж байгаа юм чинь дахин дахин ярьж яах билээ. Одоо цаг л хамгийн чухал шүү дээ.

-С.Зориг агсны хэрэгт буруутгагдсан хүмүүсийн хэргийг хүчингүй болгож, цагаатгана гэж байна. ?

        -Мэдээжийн хэрэг сайхан байлгүй яах вэ дээ. Хилс хэрэгт гүтгэгдэж, зургаан жил харанхуй нүхэнд хоригдож, хоёр жил “Шинээр мөрдөн байцаалт явуулна” гэх бодолтой, сэтгэлийн тамд амьдарсан. Зүгээр ч хоригдоогүй яраглуулж, тамлуулж, сэтгэлийн асар их дарамт, цөхрөл дунд байсан. Өнөөдөр (өчигдөр) л сэтгэл минь жаахан ч гэсэн уужирч, амьдрах итгэлтэй болж байна. Миний байхгүй зургаан жилийн хугацаанд ар гэрийнхэн, эхнэр, хүүхэд, хөгшин настай аав, ээж минь их зовсон. Миний араас мөн ч их тэмцэж, зүтгэсэн. Дээрээс нь, өмгөөлөгч, тодорхой албаны хүмүүс, Монголын ард түмэн Чимгээ эгч бид хоёрт их тусаллаа. Бидний ар талд энэ хүмүүс л байж, өнөөдрийг хүртэл хамт байсан. Сэтгэл санаа өндөр, сайхан байна. Бурхан тэнгэр гэж байдаг учраас үнэнд гүйцэгдэж байна шүү дээ. Хууль хяналтын байгууллагынхан шударга ажиллаж, биднийг хэлмэгдсэн гэдгийг тогтоолоо. Хэдийгээр тогтоол маань албажиж ирээгүй, гараараа барьж, нүдээрээ хараагүй ч гэсэн сайхан байна.

-ХЗДХ-ийн сайд асан Ц.Нямдорж “Монголын төр Т.Чимгээ, Б.Содномдаржаа нараас уучлалт гуйж, нөхөн төлбөр олгох ёстой” гэж ярьсан. Та төрөөс нөхөн төлбөр нэхэмжлэх үү?

          -Би үнэндээ Ц.Нямдорж гэж хүнийг танихгүй, мэдэхгүй. Төрийн өндөр албан тушаалтан учраас эчнээ танина. Гэхдээ энэ хүн Чимгээ эгч бид хоёр төлөө үнэнч, шударгаар сайн ажиллаж, зүтгэсэн гэж боддог. Шударга ёсыг эрхэмлэсэн хүмүүс л бидэнд тусалж, энэ хэлмэгдүүлэлтээс аварлаа даа.

Амьдралынхаа бүхэл бүтэн зургаан жилийг шорон гэдэг газарт өнгөрүүлж, зовж, тарчиллаа шүү дээ. Ар гэр, үр хүүхэд минь яг ижилхэн зовж, шаналлаа. Ийм хүмүүс чинь нэхэмжлэлгүй яах вэ дээ. Монголын төрөөс бүх хохирлоо нэхэмжилнэ. Өмгөөлөгч нартайгаа ярьж байгаад хохирлын хэмжээг тогтоож, нэхэмжлэх дүнгээ гаргана.

-Одоо таны амьдрал ямар байна вэ?

         -Том хүү маань Эрдэнэтийн зах дээр наймаа эрхэлдэг. Хүүгийнхээ хажууд тусалж, өдрийн хоолоо залгуулж байна. Улсад ажиллах боломж байхгүй, нас хэтэрсэн. Дээрээс нь бие муутай учраас хэн намайг ажилд авах вэ дээ. Ийм учраас хүүхдүүдээ бараад л амьдарч байна.

-Хоёр жилийн хугацаанд ямар эмчилгээ хийлгэсэн бэ. Бие тань дээрдэхгүй байна уу?          -Тийм ээ, хүнд хүчир ажил хийж чадахгүй болохоор хэцүү юм. Гэр бүлтэйгээ гадуур гараад удаан ч алхаж чадахгүй байна шүү дээ. Олигтой эмчилгээ, сувилгаа хийлгэе гэхээр мөнгө төгрөг байхгүй хэцүү юм. Хоёрдугаарт, хэзээ, хаанаас дуудах бол гэж айгаад яаж ч чадсангүй. Хоёр жилийн хугацаанд долоо хоног улсын, хувийн эмнэлэгт хоёр удаа хэвтлээ. Эрүүл мэндийн даатгалаар үйлчилдэг болоод сайхан болжээ. Гадаад руу эмчилгээнд явъя гэхээр хилийн хоригтой. Ер нь хашаа ч явж болохгүй чөдөртэй морь шиг л байлаа.

-Хүүхдүүд нь сайн биз дээ. Та суллагдаад хоёр жил болчихов уу?

         -Тийм ээ, хоёр жил өнгөрлөө. Хоёр жилийнхээ ойн дээр л цагаатгаж байх шиг байна. Хүүхдүүд минь сайн, аавтайгаа сайхан байна. Хоёр том хүү минь тусдаа гарч, жижиг зургаа нь сургуульд сурч байна. Хамгийн бага хүү минь өнгөрсөн жил төрсөн, саяхан ой хүрсэн. Миний бага хүү жинхэнэ аавтайгаа өсөж, элэг бүтэн гэр бүлийн жаргалыг мэдэрч байна. Энгэрийн зүүлт шиг сайхан үрстэйгээ элэг бүтэн амьдрах шиг жаргал хаана ч алга даа.

-Т.Чимгээ гэдэг хүнтэй суллагдсанаасаа хойш уулзсан уу?

        -Үгүй ээ, хаана байдгийг нь ч мэдэхгүй. Утсаар ч ярьж үзээгүй шүү дээ. Хаа нэг шүүх хурал дээр таарч, мэнд мэдэлцээд л өнгөрдөг. Харин Т.Чимгээ эгчийн ах Хүрэлбаттай холбоотой байдаг. Заримдаа ярьж санал бодлоо солилцдог юм. Эмэгтэй хүн надаас илүү зовсон байх. Одоо үр хүүхэдтэйгээ жаргалтай амьдрах байлгүй дээ.

-Өнөөдөр (өчигдөр)-өөс таны аман зургийг цахим

       -Би нарийн ширийн зүйл ярихгүй. Худлаа зураг шүү дээ. 1998 онд зурсан анхны зураг нь л үнэн. Бусдаар цахим сүлжээнд явж байгаа зургийг миний 40 настай байх үеийн фото зургаас хараад зурчихсан. Тэгээд худлаа ярьж, “Энэ хүн Зоригийг хөнөөсөн” гээд байдаг. Үнэндээ, 1998 онд 24 настай, дэвхийсэн залуу байлгүй яах вэ дээ. Миний залуугийн хамаг сайхан зургийг хуулийнхан устгаад хаясан байна билээ.  Фото зургийг минь зурчихаад аман зураг гэж хэлж болохгүй шүү дээ. Үүнийг хүмүүс ялгаж, салгаж ойлгодог болсон.

-Цагаатгагдаж байгаа ч гэсэн таныг яллаж, хорих ял оноосон хүмүүст гомдолтой байгаа юу?

        -Гомдолтой байна. Хүний амьдралаар тоглосон хүмүүс шүү дээ. Хүнийг эрүүдэн шүүсэн хүмүүсийг таван жил хорих ялаар шийтгэх хуулийн заалттай. Гэтэл тэр хүмүүс хэдхэн сар суугаад л магадлангаар суллагдсан.