-Согтуу жолооч ах, эгч хоёрын минь дээрээс машинаа авчихсан бол амьд үлдэх боломж байсан гэж боддог-

Дорнод аймгийн Хөлөнбуйр сумын III  багийн нутаг дэвсгэрт хоёр хүн амиа алдаж, хоёр хүүхэд хүнд бэртсэн хэрэг өнгөрсөн аравдугаар сарын 15-16-нд шилжих шөнө гарсан байдаг. Тодруулбал, “Приус-20” маркийн автомашины жолооч 24 настай, эрэгтэй Б нь архи согтууруулах ундааны зүйл хэрэглэсэн үедээ тээврийн хэрэгсэл жолоодон замын хөдөлгөөнд оролцсоны улмаас айлын гэр дайрч, гэрт байсан 15 настай, эрэгтэй Д, зургаан настай, эрэгтэй А-г хүнд гэмтээж, 43 настай Г, О нар амиа алдсан харамсалтай хэрэг үйлдсэн билээ. Хэргийн талаар талийгаач Г-ийн төрсөн дүү С.Гантөмөртэй ярилцлаа.

-Таны төрсөн ах, эхнэрийн хамт гэртээ унтаж байгаад машинд дайруулж, амиа алдсан харамсалтай хэрэг гарсан. Тухайн үед юу болсон талаар мэдээлэл өгч болох уу?

-Ах минь эхнэр, хоёр хүүгийн хамт гэртээ 23:00 цагийн үед унтсан байгаа юм. Тэднийх хашаагүй учраас баруун талаар нь машин чөлөөтэй зорчдог. Гэтэл унтаж байхад нь гурван согтуу залуу машинтайгаа гэрийнх нь баруун урд талаас нь дайрч, юу ч үгүй болгож орхисон. Хоёр хүү нь баруун талын орон дээр, ах, эгч зүүн талдаа унтаж байсан юм билээ. Тэгээд машинтай хүмүүс хоёр хүүгийнх нь хөлөн дээгүүр гарч, зуухыг нь дайраад, талийгаачдыг дайрч хөнөөсөн. Зүв зүгээр тайван амгалан амьдарч байсан айл нэг л шөнө аав, ээж нь нас барж, хоёр хүүхдийнх нь биеийн байдал хүнд аймгийн нэгдсэн эмнэлэгтээ хүргэгдсэн. Та бод доо, гэртээ унтаж байгаад л ах, эгч хоёр маань амиа алдаж, хоёр хүүхэд нь хүнд бэртэж, өнчин хоцорчихлоо шүү дээ.

-Хөвгүүдийн биеийн байдал одоо ямар байгаа вэ?

-Бид тэр аймшигт хэрэг гарснаас хойш аав, ээжийнх нь буяны ажлыг хийчихээд дүү нараа ГССҮТ-д сар гаруй хугацаанд эмчлүүлж байгаад саяхан сумандаа ирсэн. Хоёр хүүгийнх нь тулгуур эрхтэн хүнд бэртэж, аарцагны хагалгаанд орсон. 15 настай ах нь таягтай, зургаан настай дүү нь тэргэнцэртэй болсон. Одоо хагалгааны дараах эмчилгээг хөл хорио тавигдахаар аймгийн нэгдсэн эмнэлэгт хийлгэнэ. Эмч нар цаашид яахыг хэлж мэдэхгүй байгаа. Насаараа хоёр хөл дээрээ босож чадахгүй нөхцөл үүсэж ч магадгүй гэсэн. Ямар ч гэсэн шаардлагатай бүх эмчилгээг чадахынхаа хэрээр хийлгэнэ. Том ах нь аав, ээжийгээ бурхан болсныг мэдсэн. Харин дүү нь сайн ойлгож чадахгүй байгаа. Заримдаа аав, ээжийгээ нэхэж уйлж, янз бүр болдог.

-Талийгаач ах, эгч нь эмнэлгийн анхны тусламж авч чадсан уу. Хэргийн талаарх дуудлагыг анх хэн өгсөн юм бэ?

-Дуудлага хэн өгснийг сайн мэдэхгүй байна. Манай эгч талийгаач ахынхаас холгүй амьдардаг байсан юм. Шөнө дунд танихгүй хүн гар утас руу нь залгаад “Танай дүүгийн гэрийг машин дайрчихлаа. Хурдан ир” гэж л хэлсэн байна лээ. Хүрээд ирэхэд нь аль хэдийнэ өнгөрчихсөн байсан гэсэн.

Мөн хажуу айлынх нь хүмүүсийн хэлж буйгаар согтуу жолооч ах, эгчийн минь хэвлий дээгүүр машинаа тэгнүүлж орхиод зугтаачихсан байсан гэсэн. Тэгэхээр талийгаачдыг дайрч, гэрээс нь багахан газар нь түрсэн байгаа юм. Хүмүүс ирээд машиныг нь холдуулж, ах, эгчийг доороос нь гаргасан юм билээ. Хэрэв тэр жолооч согтуу ч гэсэн зугтаагаагүй, машинаа холдуулчихсан байсан бол ядаж нэг нь амьд, хоёр хүүхдэдээ харагдаад сууж байх байсан болов уу гэж бодохоос гол харлаад байна.

Яагаад гурвын гурвуулаа байж нэг нь ч айлын гэр, хүмүүс дайрч байгаа гэдгийг мэдээгүй юм бол. Би хэрэг гарсны маргааш нь очиж харахад тэр гэрт бүтэн нэг ширхэг ч эд хогшил байгаагүй. Тэгэхээр маш хурдтай явж байсан нь тодорхой.

-Тухайн өдөр орон нутгийн сонгууль болсон учраас архи зарахыг хориглосон байсан юм билээ. Хаанаас архи олж уусан юм бол. Та гэмт хэрэгтнүүдтэй уулзсан уу?

-Дүү нарынхаа амийг аврах гээд “Амь наана, там цаана” л явна даа. Буяны ажил, эмнэлэг, хөл хорио гээд тэдэнтэй уулзах зав байгаагүй. Өөрсдөө ч уулзана гэж ирээгүй. Машин жолоодож явсан залууг хорьчихсон байгаа юм билээ. Нөгөө хоёрыг нь гадуур байцааж байгаа гэсэн. Бид тэднийг холбоо барихгүй болохоор нь өөрсдөө холбоо барихад “Бид машин жолоодож яваагүй болохоор хэрэг хүлээхгүй. Тухайн жолооч нь хэргээ өөрөө үүрэх байх. Бараг бидэнд хамаагүй” ухааны юм ярьж байна лээ. Ах, эгчийн буяны ажил, хүүгийн эмчилгээнд зориулж цөөхөн хэдэн төгрөг илгээсэн. Өөрөөр тэд бидэнд туслаагүй. Одоо цаашид яаж хүүхдүүдийнхээ эмчилгээг хийлгэх эсэхээ ч мэдэхгүй явна. Онц чухал, архи зарж болохгүй өдөр тэд хаанаас архи олж уусныг мэдэхгүй.

-Машины жолооч танай нутгийн хүн юм уу?

-Тэд манай нутгийн хүмүүс биш ээ. Улсын алдартай уяачийн адуучин залуус юм билээ. Манай нутгийн нууранд адуугаа сойхоор ирээд байхдаа ийм хэрэг тарьчихсан. Хоёрын хоёр хүүхдийг амьдын хагацалд унагааж, хөгжлийн бэрхшээлтэй болгож, бусдад саад болохгүй, мөрөөрөө амьдарч байсан ах, эгчийн минь амийг авсан тэд зохих ёсны хариуцлагаа хүлээх ёстой. Үнэхээр гомдолтой байгаа.

-Хөвгүүд хэрэг гарах үеэр ухаан алдчихсан юм байхдаа. Аав, ээж нь ямар нэгэн юм хэлж чадаагүй юу?

-Нам унтаж байсан болохоор юу ч мэдээгүй гэсэн. Том хүүг нь нэг сэрэхэд машин хүчтэй хаазалж байгаа сонсогдсон гэсэн. Өөрөөр юу болж байгааг мэдээгүй гэсэн. Ах, эгчийгээ би ганц ч үг хэлж чадахгүй амьсгал хураасан байх гэж бодож, харуусаж байгаа.

Магад машин дээгүүр нь гарч байхад аврал эрж, сүүлчийн удаа хоёр хүү рүүгээ харсан байх. “Машинаа дээрээс аваач” гэж тэд хэдэн удаа амандаа хэлж, гол нь тасарсан бол гэхээс сэтгэл шимширч, дотор харанхуй оргиж байна.  

Дорнод аймаг Хөлөнбуйр сумын гуравдугаар баг. Талийгаач Г-ийн гэр. 2020.10.15-ны 24:00 цаг