Ээжийнхээ хамтран амьдрагчид зодуулсан гурван настай хүү ухаангүй ГССҮТ-д эмчлүүлж байна. Хүүг зодсон 34 настай М.Энхбилэг гэх этгээдийг цагдан хориод байгаа. Тэрбээр хүүгийн ээжтэй 2022 оны арваннэгдүгээр сард танилцаж, 2023 оны нэгдүгээр сараас хамтран амьдарч эхэлжээ. Хүүг гуравдугаар сарын 6-ны өдөр зодож, хоёр хоногийн дараа эмнэлэгт хүргэсэн. Эмнэлэгт хүргэсэн даруйдаа зугтаж, цагдаагийн байгууллагаас шуурхай ажиллаж, дайчлан баривчилсан. Хохирогч гурван настай хүү тархиндаа хүнд гэмтэл авч, шулуун гэдэс нь бяцарсан гэх мэдээллийг албаныхан өгөөд байна.

Тэгвэл гурван настай хүүг зодсон, ээжийнх нь хамтран амьдрагч Мягмарын Энхбилэг гэж хэн бэ гэдгийг танилцуулж байна.

          М.Энхбилэг Баянхонгор аймагт 1989 оны аравдугаар сарын 21-нд төрсөн, 34 настай. Одоогоор Хан-Уул дүүргийн 15 дугаар хороонд оршин суух хаягтай. 2018 онд бусдын биед хөнгөн гэмтэл учруулсан зүйл ангиар шийтгэгдэж, ял эдэлж байжээ. М.Энхбилэг Баянхонгор аймгийн иргэн, өөрийн найз болох Б.Ууганбаяр, Т.Жанцанноровтой хамтран 2018 онд “Централ рийл эстэйг” компанийг үүсгэн байгуулж, захирлаар нь ажиллаж байжээ. Хамгийн ноцтой нь, тус компани нь  “Мөнгө зээлж, байранд суулгана. Түрээслээд өмчлөх нөхцөлөөр байртай болгоно” зэргээр хуурамч гэрээ байгуулж, 100 гаруй хүнээс 1.4 тэрбум төгрөг залилжээ. Уг хэрэгт цагдаагийн байгууллагаас хэрэг бүртгэл нээн шалгаж байгаа аж.

       Өөрөөр хэлбэл, М.Энхбилэг найзуудтайгаа нийлж, залилан хийж, бусдыг хохироосон хэрэгт шалгагдаж байх явцдаа оргон зайлж, гурван настай хүүг зодож, хүнд гэмтэл учруулжээ. Мөн тэрбээр гурван жилийн өмнө найзтайгаа хамтран Хаан банкнаас найман сая төгрөгийн зээл авч, зээлээ төлөхгүй зугтаж, шүүхээр хэлэлцэж байжээ.