Б.ТЭГШЖАРГАЛ: Би “явахгүй” гэж үлдээгүй. Тэд орхиод явсан нь үнэн

        "Театрын уран бүтээлчийг алтан унаганы шагнал гардуулна гэж авч явж, ажлаа бүтээчихээд 140 километрийн цаана орхиод явдаг дарга гэж байх уу. Сүүлдээ уусан архиндаа согтуурхаж, дээрэлхсэн учир 23:00 цагт цүнхтэй хуураа үүрч, 2-3 километр алхаж явлаа. Энэ бидний хийх ёстой ажил мөн үү. Үүнд дарга нар ямар тайлбар хэлэх вэ” хэмээн Сүхбаатар аймгийн “Жаахан шарга” театрын хөгжмийн зохиолч, морин хуурч Б.Тэгшжаргал өөрийн цахим хуудастаа бичсэн байдаг. Тухайн үед юу болсон талаар түүнээс тодруулахад “Тэд намайг орхиод явсан нь үнэн. Би аймагтаа очиж чадаагүй байна. Би өөрийн цахим хуудастаа дээрх асуудлын талаар тодорхой бичсэн байгаа учир өөр тайлбар, мэдээлэл өгмөөргүй байна. Би “явахгүй” гэж үлдээгүй” гэсэн юм.

Харин түүнийг хээр орхисон гэгдээд буй Сүхбаатар аймгийн ИТХ-ын дарга Х.Батмөнхөөс тухайн үед юу болсон талаар тодрууллаа.

Б.ТЭГШЖАРГАЛЫГ ХЭЭР БУУЛГАЖ, ОРХИОГҮЙ ГЭДГИЙГ НАДТАЙ ХАМТ ЯВСАН ХҮМҮҮС ГЭРЧЛЭХ БАЙХ

-Та морин хуурч Б.Тэгшжаргалтай маргалдаж, түүнийг хээр орхисон юм уу.  Тухайн үед юу болсон талаар мэдээлэл өгч болох уу?

    -Бид хэрэлдэж, муудалцаагүй бас түүнийг санаатай орхиж яваагүй. Бид Сүхбаатар аймгийн Баяндэлгэр сумаас тодорсон алтан унаганы эздэд шагнал гардуулах ажилтай аймгаас гарсан. Хөгжмийн зохиолч, морин хуурч Б.Тэгшжаргал тухайн айлаас "Ээжтэйгээ уулзана" хэмээн ээжийнх рүүгээ явсан. Түүнийг явах гэхэд нь "Хоол идчихээд яв. Тэгээд хүргэж өгье” гэтэл “Зүгээр ээ, гадаа унаа ирчихсэн байгаа” гээд хувийнхаа унаагаар явсан. Би аймагтаа эмчээр давхар ажилладаг болохоор тухайн айлаас Баяндэлгэр сумын эмнэлэгт очиж хүмүүстэй уулзсан юм. Тэгээд аймаг руу буцах дөхөхдөө жолоочоо Б.Тэгшжаргалын байгаа айл руу явуултал тэр “Явахгүй” гээд үлдсэн байсан. Тухайн үед охин минь төрөхөөр дуудлага өгчихсөн байсан учир "Явахгүй" хэмээсэн түүнийг хүлээлгүй аймаг руугаа хөдөлсөн юм. Гэтэл өнөө өглөө /өчигдөр/ өөрийн цахим хуудастаа “Дарга нар намайг орхиод явчихлаа. Шөнө 2-3 километр алхлаа” хэмээн олон нийтэд худал мэдээлэл тараасан байсан. Би үүнд гомдолтой байгаа. Өөрийнхөө нэр төрийг сэргээлгэнэ гэж бодож байна.

-Тухайн үед морин хуурч Б.Тэгшжаргал архи, согтууруулах ундааны зүйл хэрэглэсэн байсан уу. "Явахгүй" гээд үлдэх шалтгаан нь юу  байсан бол?

      -Айлаас гарахдаа согтууруулах ундааны зүйл хэрэглээгүй байсан. Айлаас ээж дээрээ очсон бол архи уугаагүй байх. Түүнийг яагаад “явахгүй” гэх болсныг мэдээгүй. Уг нь бид нэг ч удаа хэрэлдэж, муудалцаагүй юм. Гэтэл жолооч минь "Түүнтэй ойлголцсонгүй, явахгүй гэж байна” гээд ирсэн. Үүнээс гадна тэрбээр олон нийтэд хэрэлдэж, муудалцаад өөрийг нь хөдөө, хээр орхичихсон юм шиг утагатай сэтгэгдэл оруулсан байсан.  Түүнийг зам дагуу буулгаж, хээр хөдөө орхиогүй гэдгийг надтай хамт явсан хүмүүс гэрчлэх байх.

-Хэдүүлээ айлд очсон юм бэ?

     -Жолооч, сэтгүүлч, зураглаачтай тавуулаа очсон. Би аймгийнхаа иргэдийн хурлыг төлөөлж, алтан унаганы эзэнд гарын бэлгийг нь гардуулах үүрэгтэй явсан юм. Мөн УИХ-ын гишүүн Н.Ганибал орон нутгийн малчид, иргэдтэй уулзаж яваад  алтан унганы эзнээр тодорсон айлд ирж таарсан юм.

-Тухайн үед та архи, согтууруулах ундааны зүйл хэрэглэсэн байсан уу. Таныг согтуурхаж, дээрэлхсэн хэмээсэн байсан?

    -Миний ганц, хоёр хундага татсан нь үнэн. Уусныг минь далимдуулж, хөдөө хонуулсан гэх утгатай тайлбар оруулсанд гайхаж байгаа. Айлаас эмнэлэг рүү алхаж очсоноо хөдөө, хээр хаягдсан хэмээн бичсэн юм шиг байна лээ. Гэхдээ би түүнд согтуурхаж, муухай зан гаргаагүй. Өөрөө айл руу явчихаад явахгүй гээд үлдсэн болохоос түүнийг машинаас хүчээр буулгаагүй.

-Та морин хуурч Б.Тэгшжаргалтай холбогдсон уу. Аймагтаа ирсэн болов уу?

   -Намайг залгахаар гар утсаа авдаггүй юм. Өглөө /өчигдөр/ намайг элдвээр доромжилж, дайрч, давшилсан. Тэр үед нь би уучлалт гуйсан. Тэгээд аймгийн театрын даргат нөхцөл байдлыг хэлж, унаа явуулах уу гэж хэлүүлтэл "Хэрэггүй" хэмээсэн байна лээ. Түүнээс өөрөөр дахиж холбогдоогүй байна.