Шалгалтын баримт бичиг, мэдээлэл, дүгнэлтийг яаманд ирүүлэх талаар МХЕГ-т хандаад байна. Дүгнэлтийг шийдвэр гаргахдаа анхааран үзнэ

         Бид Үндэсний Батлан хамгаалахын их сургууль (ҮБХИС)-ийн удирдлагуудыг АТГ-аас шалгаж эхэлсэн талаар цувралаар мэдээлсэн билээ.Тодруулбал, тус сургуулийн удирдлагууд Боловсрол, шинжлэх ухааны яаманд бүртгэлгүй мэргэжлээр элсэлт авч, 400 гаруй оюутныг хохироогоод байгаа ноцтой баримтыг хүргэсэн. Хууль хяналтынхан ч дээрх хэргийн мөрөөр эрүүгийн хэрэг үүсгэн шалгаж байгаа. ҮБХИС-ийг 2014 онд удирдаж байсан захирлаас эхлээд одоогийн захирал, тэнхимийн эрхлэгч, сургалтын менежер,  Боловсролын яамны холбогдох хэлтсийн дарга, мэргэжилтнүүд гээд цөөнгүй албан тушаалтан ажилдаа хайнга хандсан, үгсэн хуйвалдаж, бусдыг залилан мэхэлсэн байж болзошгүй үндэслэлээр  буруутгагдан шалгагдаж байна. Албаны эх сурвалжаас авсан мэдээллээр одоогийн байдлаар  есөн мэргэжлээр суралцсан 400 гаруй залуус хохироод байгаа юм байна. Тэд мэргэжлийн дипломгүй учир ажилд ч орж чадахгүй гэрийн мухар сахих, ажилгүй сууцгааж байгаа аж.

Нэг оюутнаас дөрвөн жилд нийт 6-7 сая төгрөг гэж тооцоолбол, 400 оюутнаас гурван тэрбум орчим төгрөгийн таван жилийн хугацаанд шамшигдуулсан болж таараад байгаа

             Харин энэ талаар Боловсрол, шинжлэх ухааны яамны сайд Л.Цэдэвсүрэн байр сууриа илэрхийллээ. Тэрбээр “Үндэсний батлан хамгаалахын их сургууль бол бакалавр, магистр, докторын зэрэг олгох сургалт эрхэлдэг дээд боловсролын байгууллага. ҮБХИС-д МХЕГ-аас өнгөрсөн зургадугаар сард хяналт шалгалт хийсэн байна. Энэ шалгалттай холбоотой танилцуулга, дүгнэлт материал одоогоор манай яаманд ирээгүй. Бид мөн энэ асуудлаар тухайн байгууллагын төлөөлөлтэй уулзалт хийсэн. Шалгалтын баримт бичиг, мэдээлэл, дүгнэлтийг яаманд ирүүлэх талаар МХЕГ-т хандаад байна. Дүгнэлтийг шийдвэр гаргахдаа анхааран үзнэ. Боловсролын тухай хуулиар мэргэжлийн чиглэл /хөтөлбөр/-ийг тогтоох нь Боловсролын асуудал эрхэлсэн төрийн захиргааны төв байгууллагын бүрэн эрхийн асуудалд хамаарах зохицуулалттай. Тийм учраас тус сургуультай холбоотой асуудлыг Аж ахуйн үйл ажиллагааны тусгай зөвшөөрлийн тухай хууль болон Боловсролын тухай хуулийн холбогдох заалтын хүрээнд, төгсөгч, суралцагчдын эрх ашгийг аль болох хохироохгүйгээр шийдвэрлэнэ” гэсэн юм.

Бид дараагийн удаад ҮБХИС-ийн удирдлагууд холбогдох байгууллагуудтай үгсэн хуйвалдаж, оюутнуудаас хүчээр худал мэдүүлэг авч, уснаас хуурай гарахаар зүтгэж байгаа талаарх баримтыг дэлгэх болно.