Арваннэгдүгээр сарын 3-нд хичээлдээ яваад ор сураггүй алга болсон 16 настай охиныг онц хэрцгийгээр хөнөөж, цогцсыг нь мөчилж, шуудайнд хийн гудамжинд хаясан аймшигт хэрэг гарсан. Тодруулбал, энэ сарын 23-нд цагдаагийн байгууллагад “Сүхбаатар дүүргийн XVIII хорооны нутаг дэвсгэрт хүний цогцос байна” гэсэн дуудлага тус хорооны оршин суугчаас ирж, цагдаагийн алба хаагчид хэргийн газарт зургаан цаг үзлэг хийж, гэмт хэргийг үйлдсэн байж болзошгүй талийгаачийн төрсөн ах С.Ганболдыг сэжиглэн шалгаж байгаа.

Талийгаач айлын ганц охин бөгөөд бага ах, ээжийн хамт Чингэлтэй дүүрэгт нийтийн байранд амьдардаг байжээ. Харин түүний төрсөн хоёр ах нь Сүхбаатар дүүргийн XVIII хороонд тэднээс тусдаа амьдардаг байсан аж. Охин хамгийн сүүлд гэрийнхэн рүүгээ “Гандангийн ойролцоогоос III, IV хороолол руу явах гэж байна. Удахгүй очно” гэж яриад дахиж холбоо бариагүй гэдэг. Ээж нь хэрэгт холбогдогдон шалгагдаж байгаа бага хүү С.Ганболдын хамт охиноо Хороолол, Төмөр зам, Гандан хамгийн сүүлд очно гэж ярьсан газраар нь хайжээ. Ингээд эцэст нь, арга мухардаж цагдаагийн байгууллагад арваннэгдүгээр сарын 7-нд өргөдөл гаргасан байгаа юм. Өргөдөл гаргаснаасаа хойш хэд хэдэн удаа цагдаагийн байгууллагад очиж, охиныхоо эрлийн талаар сурагласан гэнэ. Харамсалтай нь, тухайн үед улс орон даяар хатуу хөл хорио тогтоож байсан тул эрлийн явц тийм ч үр дүнтэй байгаагүй талаар талийгаачийн ар гэрийнхэн ярьж байна.

Харин цагдаагийн байгууллагаас арваннэгдүгээр сарын 23-ны 23:00 цагийн үед талийгаачийн ээжийг Сүхбаатар дүүргийн II хэлтэст яаралтай ирэхийг мэдэгджээ. Гурван хүүтэйгээ яваад очиход, охиных нь цогцсыг мөчилж, шуудайнд хийсэн байдалтай шар үстэй толгойны зураг харуулсан гэнэ. Тухайн  үед ээжийнх нь ухаан балартаж, гурван ахаас нь байцаалт авсан байна. Ингэхдээ цагдаагийн алба хаагчид “Дүүг чинь танай ах хөнөөсөн гэнэ. Одоо чи хэргээ хүлээчих” гэх зэргээр дарамталж, бага хүүг нь зодож, хүчээр хэрэг хүлээлгэсэн байж магадгүй” хэмээн ар гэрийнхэн нь хэлж сууна. Мөн тэд “Манай Ганболд дүүгээ хөнөөх хүн яавч биш, хүнлэг зөөлөн, даруухан, аймхай хүүхэд. Тийм байхад яаж дүүгээ хөнөөчихөөд, тэр жаахан биетэй хүүхэд хоёр шуудайнд хийгээд, үүрээд хаа байсан Сүхбаатар дүүрэгт очих билээ. Энэ бол цэвэр гүтгэлэг. Манай хүүхдүүд хоорондоо огтоосоо таарамжгүй харилцаатай биш. Хаа нэг ам зөрнө тэгээд л эвлэрчихдэг” гэлээ.

Харин талийгаач охиныг “Айлын ганц охин учраас эрх танхил өссөн. Гэхдээ ээж, ахдаа амь байсан” гэж байна лээ. Талийгаачийн ээж О нь охиноо нас барсан, хүүгээ дүүгээ хөнөөсөн гэдэгт огт итгэхгүй байгаа гэнэ. Тэрбээр охиноо алга болсноос хойш ганц ч өдөр тайван хоноогүй бөгөөд хэрэг гарснаас хойш шокны байдалтай байна. Тэрбээр хүүгээ саатуулагдсанаас хойш уулзаагүй бөгөөд “Гэр бүлийн хэрүүл сонсмооргүй байсан” гэх утга бүхий дөрвөн секунтын ярианаас өөр хүүгийнхээ өгсөн мэдүүлгийн талаар мэдэхгүй гэнэ.

Охин алга болохынхоо өмнөх өдөр ээжийнхээ эгчийнд очиж хоносон байна. Ингэхдээ эгчдээ “Манай гэрийн хажууд орон гэргүй бололтой, архи уудаг гурван ах байдаг. Тэднийг би нэг удаа цагдаад бариад өгчихсөн чинь намайг “ална” гээд байдаг болчихсон. Мөн тэрний дараа манай гэрийн хөргөгчийг хулгайлж, задлаад хөнгөн цагаан, зэсийг нь зарж байсан. Тэгээд тэрнээс болж бөөн хэрүүл тэмцэл хийгээд, 165 см орчим өндөртэй, сахалтай ах нь “Чамайг нэг л өдөр цааш харуулна” гээд элдэв янзын хараалаар хараасан. Би тэднээс үнэхээр айгаад байна” гэж ярьжээ. Ингэж хэлээд удаагүй маргааш нь охин хичээлдээ яваад ор сураггүй алга болсон байна. Талийгаачийн ар гэрийнхэн хэрэгт охиныг дарамталж байсан гурван залууг сэжиглэж байгаа бөгөөд хүүгээ дүүгээ хөнөөсөн гэдэгт огт итгэхгүй байгаагаа мэдэгдэж, цагдаагийн байгууллагад гомдол гаргажээ. Мөн тэд цагдаагийн алба хаагчид хүүд нь хүчээр хэрэг хүлээлгэж байх магадлалтай гэсэн юм.