Ховд аймгийн Мянгад суманд энэ оны нэгдүгээр сарын 7-8 шилжих шөнө 53 настай Ц нь хоёр сартай зээ охиноо малын тэжээлээр дарж, амийг нь хөнөөсөн байж болзошгүй ноцтой хэрэг гарсан. Тодруулбал, төрсөн охиноо Говь-Алтай аймаг руу хичээлдээ явсан хойгуур нь зээгээ санаатайгаар хөнөөсөн байж болзошгүй гэх хэргийг тус аймгийн цагдаагийн газар шалгаж байгаа билээ. Тэгвэл уг хэргийн мөрдөн шалгах ажиллагаа дуусаж, шүүх хурлын тов гарчээ. Шүүх хурал энэ сарын 19-нд Ховд аймагт болно. 

ХОВД АЙМГИЙН ЦАГДААГИЙН ГАЗРЫН ДЭД ДАРГА Ц.БУЛГАНБААТАР: Хоёр сартай зээгээ өвөө, эмээ нь тохиролцож, малын тэжээлээр дарж, хөнөөсөн нь тогтоогдсон

         Уг хэргийн талаар Ховд аймгийн Цагдаагийн газрын  дэд дарга, дэд хурандаа Ц.Булганбаатар мэдээлэл өгөхдөө “Зээ охиноо малын тэжээлээр дарж хөнөөсөн гэх дуудлага, мэдээлэл цагдаагийн газар албан ёсоор бүртгэгдээгүй. Харин дээрх хэрэг гарсан байж болзошгүй мэдээллийн дагуу цагдаагийн газрынхан мөрдөн шалгах ажиллагааг үргэлжлүүлж байгаа. Талийгаачийн гэр бүлийнхэн буюу өвөө, эмээ нь үгсэн тохиролцож, хоёр сартай зээгээ малын тэжээлээр дарж, амийг нь хөнөөгөөд, цогцсыг оршуулчихсан байсныг цагдаа нар илрүүлсэн. Зээ охиноо санаатайгаар хөнөөсөн байж болзошгүй иргэнд Эрүүгийн хэрэг үүсгэж, хойшлуулшгүйгээр баривчилсан. Талийгаач охин өвөө, эмээтэйгээ амьдардаг байсан юм билээ. Хүүхдийн ээж нь оюутан, эцэг нь өөр газар ажиллаж, амьдардаг байсан” гэсэн байдаг.

Тэгвэл бид хэргийн талаар талийгаач охины авга ахтай холбогдож, тодрууллаа.

            -Талийгаач охины аав, ээжийн сэтгэл санаа ямар байгаа вэ?

         -Залуу хүмүүсийн амьдрал л хэцүү юм даа. Аав, ээж хоёр нь аймагтаа байгаа. Дүү маань энд ирээд, охиноо нутаглуулаад буцсан. Сэтгэл санааны гүн хямралд орсон, яаж ч чадахгүй хоёр жаахан хүүхэд л байх шиг байна. Бид янз бүр болчих вий гэж бас санаа зовж л сууна даа. Талийгаач нярайн аав миний дүүгийн хүүхэд байгаа юм. Би ганц нагац ах нь. Би дүүгийнхээ эхнэртэй уулзаж, танилцаагүй ээ. Залуу хүмүүс хоорондоо учирч, сэтгэлтэй болсон юм гэнэ лээ. Харамсалтай нь, бэрийн маань аав, ээж миний дүүг хүлээн зөвшөөрдөггүй гэсэн. Гэрээр нь орж, гарч ч чадахгүй, нуугдаж амьдарч байсан юм билээ. Тэгээд эхнэрийгээ сургуульд сурахаар явахаар нь араас нь очиж, аймагт нь ажил хийж, хамт амьдарч байсан гэсэн. Хүүхэдтэй болсноо хүртэл нууж, төрүүлсэн байгаа юм. Тэгээд бэр маань аав, ээждээ харуулахаар авиачиж өгсөн. Хүний үр чинь өөрийнхөө эцэг, эхэд л найдахаас өрөөлд тийм амар итгэхгүй шүү дээ. Гэтэл харамсалтай нь өлгийтэй үр нь хорвоогоос буцчихлаа. Бидэнд итгэхэд ч бэрх, хэцүү байна. Хорвоод хүн болох гэж ирсэн өлгийтэй үрийг хөнөөчихдөг л юм байх даа. Ийм хүйтэн сэтгэл яаж гарсныг мэдэх юм алга.

-Танай гэр бүлийнхэн талийгаач охинтой уулзаж байсан уу. Аавынх нь талынханд харж өгөх боломж байгаагүй юу?

       -Нагац эмээ, өвөө хоёр нь уулзаж, харж л байсан байх даа. Төрөөд удаагүй, хоёрхон сартай учраас даарах вий гэсэндээ эмээ нь хурганы арьс, өлгий бэлдэж өгсөн юм байна лээ. Гэтэл ээжийнх нь ээж гаргаад хаячихсан гэсэн. Манайханд их л дургүй хүмүүс дээ. Уг нь нэг нутаг усны хүмүүс шүү дээ. Өсгөж чадахгүй, дүүд минь үнэхээр дургүй, үрийг нь хүртэл үзэн ядаад, харж чадахгүй байсан юм бол бидэнд авчираад өгчихгүй яав даа. Талийгаачийг бидэнтэй огт уулзуулдаггүй, гэрээр нь очихоор гараад зугтаачихдаг хүмүүс шүү дээ. Хэрэв аваад ирсэн бол бид тэр нялх амьтныг хүн болгочихгүй яах билээ.

-Яг юу болсон юм бол. Та хэдэд хэзээ мэдэгдсэн бэ?

       -Нярай учраас багийн эмч нь сар болгон очиж үзэх ёстой байсан юм байна лээ. Тэгээд нярайгаа үзэхээр очиход нь “Бурхан болчихсон. Аль хэдийнэ хөдөөлүүлсэн” гэж хэлсэн гэсэн. Тэгээд л цагдаа, шүүх болсон юм байна лээ. Цагдаагийнханд багийн эмч дуудлага өгч, шалгалтын ажиллагааг явуулсан юм уу даа. Ингэж л энэ хэрэг ил болсон гэсэн. Энэ тухай бид тэдний амнаас сонсоогүй, баттай мэдэхгүй байна. Цахим сүлжээнээс уншихад нярайг оршуулаад хоёр хоносон байсан гэсэн.

-Малын тэжээлээр дарсан гэдэг нь үнэн үү?

      -Хэрэгтэн нь өөрөө тэгж хэлсэн гэнэ лээ. Хэргээ хүлээсэн учраас үнэн байлгүй дээ. Бидний сонссоноор худын хүүхдүүд албаны хүмүүст “Аав биднийг гэрээс хөөж гаргасан. Тэгээд маамууг шуудайтай малын тэжээлээр дарчихсан. Маамууг хол авч яваад, газарт булчихсан” гэж хэлсэн юм байна лээ. Тэгээд л нярайн цогцсыг олж, шинжилгээ хийсэн байх. Охиноосоо гарсан үрээ, өөрийнхөө мах цусны тасархайг тэгж харгисаар хөнөөнө гэдэг санаанд багтахгүй байна.

-Хэрэг гарсан газарт очсон уу?

      -Үгүй ээ, миний дүүд алдаж, оносон зүйл бий. Тэгээд хадам аав, ээж болох хүмүүс нь зөвшөөрдөггүй гэсэн. Охиноо “Гуйлгачинтай суулгахгүй. Эцэггүй хүүхэд өсгөхгүй” гээд загнадаг байсан юм гэнэ лээ. Ядуу байгаа нь тэр хүүхдийн буруу биш юм. Залуу хүмүүсийн хайр сэтгэлийг бид мянга хориод чадахгүй шүү дээ. Уулзуулж, учруулахгүй хүмүүс рүү очиж яах билээ. Хууль хяналтын байгууллага нь үнэнээр тогтоогоод, шүүнэ биз. Хүн болох гэж ирээд буцсан тэр нялх хүүхэд, хүүхэдтэй боллоо гэж баярлаж байсан залуухан аав, ээж хоёр л хэцүү, өрөвдмөөр байна. Өөр хэлэх юм алга даа.