Есөн настай охин хойт эцгийнхээ гарт харамсалтайгаар амиа алдсан хэрэг өнгөрсөн есдүгээр сарын 19-20-нд шилжих шөнө гарсан. Хэргийг тодруулбал, нялх охин Баянзүрх дүүргийн XXII хорооны нутаг дэвсгэрт байх гэртээ хойд эцэг М.Баттулгад зодуулж ухаан алдсан ч ухаан орсныхоо дараа өөрөө Яаралтай түргэн тусламж дуудаж, эмнэлэгт хүргэгдэж ирээд амьсгал хураасан байдаг. Талийгаач охин хөгжлийн бэрхшээлтэй 12 настай эгч, тулгар биетэй ээж, хоёр настай дүү, хойт эцгийнхээ хамт амьдардаг байсан юм. Түүнийг хойд эцэг М.Баттулга нь удаа дараа зоддог байсан нь тогтоогдоод байгаа. Үүнийг нь ар гэрийнхэн нь мэддэг байсан боловч ямар нэгэн арга хэмжээ авч байгаагүй байдаг. Гэхдээ охины амийг хөнөөсөн хэргээр сэжиглэгдэн шалгагдаж байгаа М.Баттулга охиныг зоддог байсан гэдгээ анхны мэдүүлгээрээ хүлээн зөвшөөрсөн байдаг.

       Тэгвэл эл хэргийг үйлдсэн гэх хойт эцэг М.Баттулгыг цагдаагийн байгууллагаас шалгаж дуусчээ. Түүнд хамаарах ... тоот хавтаст хэргийг удахгүй прокурорт шилжүүлэхээр болсон гэдгийг албаны эх сурвалж бидэнд мэдээлсэн юм. Гэмт хэрэгтэн архидан согтуурсан үедээ охиныг удаа дараа зодож, гэр бүлийн хүчирхийлэл үйлдэж, улмаар охины амийг хөнөөсөн нь мөрдөн байцаалтын явцад тогтоогдсон байна.

Мөн талийгаачийг амиа алдсаны дараа түүний 12 настай эгчийг гэр бүлийн болон бэлгийн хүчирхийлэлд өртдөг байсан байж болзошгүй хэмээн шүүх шинжилгээнд хамруулсан билээ. Ингэхэд тэрбээр хойт эцэгтээ зодуулж, хэд хэдэн хавирга нь хугарч, бороолж эдгэсэн болох нь тогтоогджээ. Өөрөөр хэлбэл, гэр бүлийн хүчирхийлэлд удаа дараа өртөж байсан нь тогтоогдсон гэсэн үг. Охин хөгжлийн бэрхшээлтэй, эмзэг бүлэгт багтдаг учир өөрийгөө бүрэн ойлгуулах чадваргүй, айдас түгшүүртэй сэтгэлзүй нь тогтворгүй байгаа гэнэ.

Хэрэг гарсны дараа талийгаачийн ээж Б хэргийн талаар манай сэтгүүлчид  өгсөн ярилцлагадаа

“Том охин маань хөгжлийн бэрхшээлтэй болохоор бараг юм ярьж чадахгүй. Нөхөр намайг эзгүй хойгуур охинд минь гар хүрсэн, гэмтээсэн тохиолдол нэг бус удаа бий. Би хэрэг гардаг өдөр гэртээ байсан. Талийгаач охины минь дух гэмтсэн байхаар нь асуухад “Ээж ээ, би юм мөргөсөн” гэж хэлсэн. Хэрэг гардаг өглөө манай хүн “Би цохичихсон юм гэж цагдаа нарт хэлсэн байна лээ. Би тэрийг нь мэдээгүй. Охиныхоо хэлснээр юм мөргөсөн л гэж бодсон. Ийм зүйл ярихаар цагдаа нь намайг “Гэр бүлийн хүнээ өмөөрлөө”  гээд байгаа. Мэдээж эх хүн үр хүүхдээ алдчихаад ямар олигтой байх вэ дээ. Үнэн нь гарч ирж, хэрэг шийдэгдэх байлгүй. Нөхрийгөө буруутай эсэхийг нь би хэлж мэдэхгүй байна” гэсэн юм.

Талийгаачийн ээж Б энэ сард амаржиж, хоёр настай хүү, 12 настай охины хамт Баянзүрх дүүрэгт амьдарч байгаа аж.

“Охины баруун талын 4-5 хавирга хугарсан байсан”

          ШШҮХ-гийн хэлтсийн дарга Г.Дагиймаа дээрх хэрэгтэй холбоотойгоор  “Есөн настай охин бусдын гарт амь насаа алдсан хэрэг дээр бид дуудлагын дагуу есдүгээр сарын 20-ны өглөө яаралтай задлан шинжилгээ хийсэн. Шинжилгээгээр гадна талд нүүр, дух, зүүн хацарт хуучин, жижиг зулгаралтуудтай байсан. Харин дотор эрхтний хувьд баруун талын 4-5 хавирга нэлэнхүйдээ хугарсан, 12 хуруу гэдэс 0.5х06 см хэмжээний няцарсан шархтай, бүдүүн гэдэсний чацархай урагдсан, улмаар чацархай орчимд  литр шингэн хуралдсан, нөгөө 12 хуруу гэдсэнд 500 грамм шингэн байсан бөгөөд бусад эрхтэн хэвийн. Ингээд урьдчилан байдлаар хордлогоор нас барсан буюу хэвлэлийн гялтангийн үрэвслийн хордлого байх магадлалтай гэсэн онош гарсан. Үүний шалтгааныг тодорхой гадаргуутай зүйлээр цохисон байх магадлалтай гэж таамаглаж байна. Харин дэвссэн, өшиглөсөн байсан бол элэг, дэлүү гэмтэх ёстой. Гэхдээ тийм гэмтэл байгаагүй” гэх мэдээллийг сэтгүүлчдэд өгч байсан билээ.

Гэмт хэрэгтэн М.Баттулга гэж хэн хэн бэ

                 Тэрбээр талийгаачийн ээж Б-тэй 2016 оноос хойш хамтран амьдарч байжээ. Хоёр дагавар охин, бие давхар эхнэр, өөрийн төрсөн 2.8 настай хүүтэйгээ хамт Баянзүрх дүүргийн XXIII хорооны ... тоотод амьдардаг байсан. М.Баттулга нь 1984 онд төрсөн 36 настай. Тэрбээр бүрэн дунд боловсролтой бөгөөд сүүлийн хоёр жил барилгын засал чимэглэлийн ажил хийдэг байжээ. Ажилгүй үедээ архи ууж, гэр бүлийн хүчирхийлэл удаа дараа үйлддэг байсныг гэр бүлийнхэн болоод ойр хавийн хөршүүд нь хэлж байсан юм.