-Тэрбээр эхний мэдүүлгээр дүүгээ хөнөөснөө хүлээсэн үү-

         Арваннэгдүгээр сарын 3-нд хичээлдээ яваад ор сураггүй алга болсон 16 настай охины цогцсыг олжээ. Тодруулбал, өчигдөр цагдаагийн байгууллагад “Сүхбаатар дүүргийн XVIII хорооны нутаг дэвсгэрт хүний цогцос байна” гэсэн дуудлага тус хорооны оршин суугчаас иржээ. Дуудлагын дагуу Сүхбаатар дүүрэг дэх цагдаагийн II хэлтэс, Нийслэлийн цагдаагийн удирдах газрын Хүнд гэмт хэрэгтэй тэмцэх хэлтэс, Эрүүгийн цагдаагийн албаны Хүнд гэмт хэрэгтэй тэмцэх хэлтсийн алба хаагчид хэргийн газарт үзлэг хийж, гэмт хэргийг үйлдсэн байж болзошгүй сэжигтэн этгээдийг илрүүлсэн байна.

ТАЛИЙГААЧ АЙЛЫН ГАНЦ ОХИН БАЙЖЭЭ

        Талийгаач С.Г нь Чингэлтэй дүүргийн ... дугаар сургуулийн XI ангийн сурагч байжээ. Тэрбээр алга болох үедээ хүрэн өнгийн цамц, хар эрээн судалтай өвлийн куртка, хар өнгийн жинсэн өмд, богино түрийтэй арьсан хар гуталтай явсан байна. Мөн биедээ самсунг маркийн гар утастай явжээ. Тэрбээр арваннэгдүгээр сарын 3-нд буюу мягмар гарагт 08:00 үед хичээлдээ явахаар гэрээсээ гараад сураггүй байгаа талаар ээж нь цагдаагийн байгууллагад хандсан байна. Талийгаач Г нь ээж, төрсөн хоёр ахын хамт Чингэлтэй дүүрэгт нийтийн байр түрээсэлж, амьдардаг байсан байна. Талийгаач нь 2004 оны долдугаар сарын 4-нд Улаанбаатар хотод төржээ.

16 настай эмэгтэй дүүгээ 18 настай ах нь боомилж хөнөөгөөд, цогцсыг мөчилж, шуудайнд хийн хаясан гэж албаныхан мэдээллээ

           Эл хэргийг үйлдсэн байж болзошгүй нөхцөл байдал илэрч, цагдаагийн байгууллагаас талийгаачийн төрсөн ах С.Ганболдыг баривчилжээ. Сэжигтэн С.Ганболд нь “Хувийн таарамжгүй харилцаанаас болсон. Гэрт байнга хэрүүл гаргаад байсан” гэж мэдүүлжээ. Тэрбээр дүүгээ хичээлээсээ тараад ирэхэд нь зодож, хоолойг нь боомилж, хөнөөгөөд, цогцсыг мөчилж, шуудайнд хийгээд Сүхбаатар дүүргийн ... дугаар хорооны гудамжинд хаясан байж болзошгүй байна. Ингэхдээ дүүгийнхээ хичээлийн дэвтэр, ном цүнхийг шуудайнд цогцостой нь хамт хийсэн гэнэ. Талийгаачийг онц харгис хэрцгий аргаар хөнөөж гэмт хэргийн ул мөрөө нуун далдлах зорилгоор цогцсыг гудамжинд орхисон хэргийг цагдаагийн байгуулага үргэжлүүлэн шалгаж байна.

Сэжигтэн С.Ганболд гэж хэн бэ

           Гэмт хэрэгтэн С.Ганболд нь 2002 оны нэгдүгээр сарын 8-нд Улаанбаатар хотод төрсөн, 18 настай эрэгтэй. Тэрбээр ерөнхий боловсролын сургууль төгссөн бөгөөд дээд боловсрол эзэмшээгүй,  эрхэлсэн тодорхой ажилгүй нэгэн аж. Тэрбээр Сүхбаатар, Баянзүрх, Чингэлтэй дүүргийн шүүхээс 2017 оны тавдугаар сарын 26-нд бусдыг хохироосон хэрэгт ял сонсож байжээ. Харин ЭХТА-ийн 145-145.2 дахь хэсэгт зааснаар хоёр жилээр хорих ялыг хойшлуулаад байж. Өөрөөр хэлбэл, насанд хүрээгүй байсан учраас түүний ялыг хойшлуулаад байх хугацаандаа тэрбээр хүн амины ноцтой гэмт хэрэг үйлдсэн хэрэгт холбогдоод байна