Өмнөговь аймагт байрлах Зэвсэгт хүчний 167 дугаар ангид алба хааж байсан, хугацаат цэргийн албан хаагч 19 настай Н нь амиа алдаж, баригдаж байсан барилгын хажуугаас цогцос нь олдсон хэрэг өнгөрсөн оны долдугаар сард гарсан байдаг.

        Талийгаач 19 настай бөгөөд гурван сарын дараа халагдах байсан. Тэрээр хэрэг гардаг өдөр хугацаат цэргийн алба хаагчидтай хамт ангийн байрлалаас өөр газарт ажил хийж байсан. Тодруулбал, тус ангийн штабын дарга н.Баяраа эрх мэдэл, албан тушаалын байдлаа урвуулан ашиглаж, өөрийн танил болох “Галтууд” ХХК-ын захирал Д.Төрбаяр, Б.Баярчимэг нарт 10 цэрэг гаргаж өгсөн. Ингэхдээ ангийн захирагчдаа мэдэгдээгүй бөгөөд дур мэдэж цэргүүдийг ажилд дайчилсан. Байлдагч нарыг Өмнөговь аймагт байрлах “Галтууд” ХХК-ийн хармагийн талбайд ажиллуулж байсан. Харамсалтай нь, долдугаар сарын 13-нд Өмнөговь аймагт баригдаж байгаа орон сууцны хорооллын хажуугаас байлдагчийн цогцсыг олсон. Хэргийн газрын үзлэгээр баригдаж байгаа байрны 13 давхраас цусанд булагдсан модон иштэй хутга олдсон гэх мэдээлэл тухайн үед цацагдаж байсан юм.

Тэгвэл Зэвсэгт хүчний 167 дугаар ангийн захирагч хурандаа Ж.Амаржаргал, штабын дарга н.Баяраа нарыг албан үүрэг, бүрэн эрх, албан тушаалын байдлаа урвуулан ашиглаж хийх ёсгүй үйлдлийг хийж, бусдад давуу байдал бий болгосон гэх үндэслэлээр яллагдагчаар татаж, хэргийг шүүхэд шилжүүлэх саналтайгаар прокурорт шилжүүлжээ.