ШӨХТГ ДИЙЛЭХ ҮҮ, “НОМИНТАВ ТРЕЙД” ХХК ДИЙЛЭХ ҮҮ ГЭДГИЙГ ШҮҮХ ШИЙДНЭ

       “Номинтав трейд” ХХК нэг үнийн бодлого баримталж, хэрэглэгчдийг хохироосон, өрсөлдөөнийг хязгаарлах гэрээ байгуулж, их хэмжээний ашиг олдог гэх хэрэгт нэг биш удаа хутгалдаж байлаа. Өөрөөр хэлбэл, “Номинтав трейд” ХХК-ийг ашиг сонирхлын зөрчил гаргасан, нийлүүлэгч талтай хийсэн "Хамтран ажиллах гэрээ"-ний зарим зүйл заалтууд нь өрсөлдөөнийг хязгаарлахад чиглэсэн бараа бүтээгдэхүүний хэлцэн тогтоосон гэдгийг өмнө нь хэд хэдэн удаа Шударга өрсөлдөөн хэрэглэгчийн төлөө газраас тогтоож, торгууль ногдуулж байсан юм.

Хэдхэн хоногийн өмнө Шударга өрсөлдөөн хэрэглэгчийн төлөө газраас зарим сүлжээ дэлгүүрийн үнэ иргэдэд дарамт үзүүлж байгаа гомдлын дагуу хийсэн шалгалттай холбоотой мэдээллийг өгсөн байдаг.

С.МӨНХЧУЛУУН: “НОМИНТАВ ТРЕЙД” ХХК-ИЙГ 6.9 ТЭРБУМ ТӨГРӨГӨӨР ТОРГОНО

            ШӨХТГ-ын дарга С.Мөнхчулуун "Агентлагийн даргын 01/20 дугаартай удирдамжийн дагуу супермаркет, хүнсний сүлжээ дэлгүүрүүдийн үйл ажиллагаа нь Өрсөлдөөний тухай хууль, Зар сурталчилгааны тухай хууль, Хэрэглэгчийн эрхийг хамгаалах тухай хууль тогтоомжууд болон Засгийн газрын 2022 оны тавдугаар сарын 18-ны өдрийн 199 дүгээр тогтоолд нийцэж байгаа эсэхэд хийсэн хяналт шалгалт хийсэн. Хяналт шалгалтаар “Номин тав трейд” ХХК, “Боса” ХХК, “Моннидер” ХХК, “Дижитал концепт” ХХК-уудын “Хамтран ажиллах гэрээ”-ний зарим зүйл заалтууд нь өрсөлдөөнийг хязгаарлахад чиглэсэн бараа бүтээгдэхүүний үнийг хэлцэн тогтоох гэрээ, хэлцэл байгуулсан байж болзошгүй ноцтой зөрчлийн шинжтэй үйлдэлд 2022 оны есдүгээр сарын 13-ны өдрийн 2202000282 дугаартай зөрлийн хэрэг нээн шалгасан.

           “Номин” супермаркет буюу "Номин тав трейд" компанийн гэрээ нь хэрэглэгчдийг хохироосон, өрсөлдөөнийг хязгаарласан гэрээ байна гэдэг нь баримтаар нотлогдсон. Энэ гэрээ нь маш ноцтой байна. Уг компани хямд үнийн баталгаа гэж өгдөг. “Өөр газар манайхаас хямд байвал бидэнд мэдэгдээрэй. Бид зөрүүг нь хоёр нугалж өгнө” гэх амлалтыг өгч иргэдийг уриалдаг. Хэрэглэгчид үүнийг  “Номин” супермаркет үнэхээр хямд үнийг тогтоож байна” гэж хардаг байсан бол энэ нь эсрэгээрээ байсныг тогтоосон.

         Хэрэглэгчдээс уг компанийн дээр маш олон гомдол ирдэг. Бусад байгууллагын үнийг өөрийн үнэтэй адил болгож, үнийг нь нэмэгдүүлдэг байна.

          “Номин тав трейд” ХХК-ийн нийлүүлэгч талтай хийсэн “Хамтран ажиллах гэрээ”-ний зарим зүйл заалтууд нь өрсөлдөөнийг хязгаарлахад чиглэсэн бараа бүтээгдэхүүний үнийг хэлцэн тогтоох гэрээ, хэлцэл байгуулсан гэж үзэн Зөрчлийн тухай хуулийн 10.7 дугаар зүйлийн найм дахь заалтад заасны дагуу өмнөх оны борлуулалтын орлогын зургаан хувьтай тэнцэх хэмжээний буюу 6.991.078.000 /зургаан тэрбум есөн зуун ерэн нэгэн сая далан найман мянга/ төгрөгөөр торгох шийтгэл ногдуулан шийдвэрлэлээ" гэсэн байдаг.

ҮНЭ ТОГТООСОН ХЭРГЭЭР “НОМИНТАВ ТРЕЙД” ХХК-ИЙГ 67 САЯ ТӨГРӨГӨӨР ТОРГОЖ БАЙЖЭЭ

        Өнгөрсөн 2018 онд “М-Си-Эс Кока Кола” ХХК нь өөрийн үйлдвэрлэдэг бүх төрлийн ундаа, ус болон импортоор оруулж ирдэг ундаа, жүүс зэргийг зах зээлд борлуулах нэг үнийн бодлого баримталж, “Номинтав трейд” ХХК, “Скай хайпермаркет” ХХК, “Моннидер” ХХК-уудын супермаркет, дэлгүүрээр ижил үнээр борлуулахаар харилцан тохиролцож гэрээ хийсэн байдаг. Энэ гэрээг хийснээрээ “Номинтав трейд” ХХК, “Скай хайпермаркет” ХХК, “Моннидер” ХХК-ууд “М-Си-Эс Кока Кола” ХХК-ний ус, ундаа, жүүсийг гэрээнд заасан үнээс хямд үнээр хэрэглэгчдэд борлуулах боломжгүй, гэрээнд заасан үнээс хямд үнээр хэрэглэгчдэд борлуулсан тохиолдолд “М-Си-Эс Кока Кола” ХХК-аас тухайн дэлгүүрт ус, ундаа, жүүсний нийлүүлэлтийг хязгаарлах мэдэгдэл хүргүүлэх, хямдруулсан барааны үнийг буцаан нэмж гэрээний үнийг мөрдөж ажиллах шаардлагыг жижиглэн худалдаа хийж байгаа дэлгүүрт хүргүүлж байсан билээ. Энэ нь Өрсөлдөөний тухай хуулийн 11 дүгээр зүйлийн 11.1.1-т “бараа бүтээгдэхүүний үнийг хэлцэн тогтоох” гэж, Зөрчлийн тухай хуулийн тусгай ангийн 10.7 дугаар зүйлийн 1.1-т “бараа бүтээгдэхүүний үнийг хэлцэн тогтоох” гэж заасныг тус тус зөрчсөн тул Шударга өрсөлдөөн, хэрэглэгчийн төлөө газар 2018 оны наймдугаар сард “М-Си-Эс Кока Кола” ХХК-д 1.2 тэрбум төгрөгийн торгууль, “Номинтав трейд” ХХК-д 67.8 сая, “Скай хайпермаркет” ХХК-д 11,6 сая, “Моннидер” ХХК-д 11,9 сая төгрөгийн торгуулийг тус тус ногдуулж байлаа.

Шүүхээс Шударга өрсөлдөөн, хэрэглэгчийн төлөө газрын улсын байцаагчдын “М-Си-Эс Кока Кола” ХХК болон бусад компанид ногдуулсан 1.2 тэрбум төгрөгийн торгуулийг хэвээр үлдээж шийдвэрлэжээ.

“НОМИНТАВ ТРЕЙД” ХХК-ИЙН ХУДАЛДАХ, ХУДАЛДАН АВАЛТЫН ГЭРЭЭНИЙ ТАВДУГААР ХЭСЭГТ БОРЛУУЛАХ ҮНИЙГ ЗААЖ ӨГЧЭЭ

     “Номин тав трейд” ХХК-ийн бусад компанитай хийсэн худалдах, худалдан авалтын гэрээг шүүж үзлээ. Хамтран ажиллахаар байгуулсан гэрээний тавдугаар хэсэгт борлуулах үнийн талаар тодорхой зааж өгсөн байдаг юм байна.

Тодруулбал,

5.1. Барааны үнийг худалдагчийн гаргаж өгсөн үнийн саналаар тодорхойлно.

5.2. Барааны үнэ зах зээлийн эргэлт нийлүүлэлт болон бусад шалтгаанаар хэлбэлзэн өөрчлөгддөг тул худалдагчийн гаргаж өгсөн үнийн санал нь гурван хоног хүчинтэй байна” зэж журамлаж, заажээ.

Задалж үзвэл, “Номин тав трейд” ХХК-ийн худалдааны зөвлөхийн зөвлөсөн, гэрээгээр журамлаж, зааж өгсөн үнээр аж ахуйн нэгжүүд бараа бүтээгдэхүүнээ борлуулна. Хэрэв уг үүргийг биелүүлээгүй тохиолдол гэрээг цуцалж, төлбөр нэхэмжилнэ гэж байгаа бололтой. Бидэнд олдсон мэдээллээр “Номин тав трейд” ХХК ийм заалттай хамтран ажиллах гэрээг 2016 оноос хойш хийж байгаа гэнэ. Тэгэхээр олон жил хямд үнийн бодлого баримтлах нэрээр үнэ тогтоож, ашиг олдог байсан байж болзошгүй юм.

“НОМИНТАВ ТРЕЙД” ХХК Н.УЯНГА: ҮНЭ ТОГТООСОН АСУУДАЛ БАЙХГҮЙ

Бид энэ талаар “Номин тав трейд” ХХК-ийн Борлуулалт, маркетинг, олон нийттэй харилцах газрын захирал Н.Уянгатай холбогдож, тодрууллаа.

Н.Уянга “Бид одоогийн байдлаар торгуулийн хуудсаа аваагүй байна. Албан ёсоор торгуулийн хуудсаа аваад, хуулийн хэлтэст мэдэгдэх байх. Одоогоор бидэнд ирсэн хариу алга. Манай компанийн худалдах, худалдан авалтын гэрээг үзэж болно. “Номин тав трейд” ХХК-ийн нийлүүлэгч талтай гэрээ хийхдээ хясан боогдуулсан, үнэ тогтоосон асуудал байхгүй” гэлээ.

Ямартай ч уг компанийнхан торгуулийн шийдвэрээ авч, дараагаар нь шүүхэд хандана гэнэ.