Нийслэлийн прокуророос Д.Монголхүүд Эрүүгийн хуулийн тусгай ангийн 23.1 дүгээр зүйлийн нэг дэх хэсэгт зааснаар /хууль сахиулагчийг албан үүргээ биелүүлэхтэй нь холбогдуулан хүч хэрэглэсэн, хүч хэрэглэхээр заналхийлж эсэргүүцсэн/ яллах дүгнэлт үйлдэж, хэргийг тус шүүхэд хүргүүлсэн байдаг.

            Сүхбаатар дүүргийн Эрүүгийн хэргийн анхан шатны шүүх шүүгдэгч Д.Монголхүүд холбогдох хэргийг 2022 оны тавдугаар сарын 25-ны өдөр хянан хэлэлцээд шүүгдэгчийг “2021 оны есдүгээр сарын 30-ны өдөр Сүхбаатар дүүргийн VI хороо, “Жанжин Сүхбаатарын нэрэмжит” талбайд цуглаан зохион байгуулах үедээ Сүхбаатар дүүргийн Цагдаагийн газрын нэгдүгээр хэлтсийн албан хаагчдыг албан үүргээ биелүүлэхтэй нь холбогдуулан хүч хэрэглэн, хүч хэрэглэхээр заналхийлж эсэргүүцсэн буюу Эрүүгийн хуулийн тусгай ангийн 23.1 дүгээр зүйлийн 1 дэх хэсэгт заасан гэмт хэрэг үйлдсэн гэм буруутайд тооцон, нэг жилийн хугацаагаар зорчих эрхийг хязгаарлах ял оногдуулж, уг ялыг Улаанбаатар хот, Баянзүрх дүүргийн нутаг дэвсгэрээр тогтоон шийдвэрлэсэн билээ.

          Харин Д.Монголхүү Дээд шүүхэд хандаж, гомдол гаргаад байсан билээ. Тэгвэл Дээд шүүхээс Анхан шатны шүүхийн шийдвэрийг хэвээр үлдээж, Д.Монголхүүгийн гомдлыг хэлэлцээгүй байна.

Энэ талаар Д.Монголхүүгээс тодруулахад “Дээд шүүхэд гаргасан гомдлыг авч хэлэлцээгүй гэсэн хариу өнөөдөр (өчигдөр) ирлээ. Ингэснээр надад ногдуулсан зорчих эрхийг хязгаарласан ялыг хэвээр үлдээсэн гэсэн үг. Өөрөөр хэлбэл, би нэг жилийн хугацаанд Баянзүрх дүүргээс нэг жилийн хугацаанд гарах эрхгүй боллоо. Анхан шатны шийдвэр 2022 оны тавдугаар сарын 25-нд гарсан. Тэгэхээр 2023 оны тавдугаар сарын 25 хүртэл үргэлжлэх байх. Хуулийн хүрээнд надад гомдох эрх маань байсан учраас Дээд шүүхийн шийдвэр гартал цахим гав зүүхгүй байгаад байсан. Одоо шүүхийн асуудал дууссан учраас Шүүхийн шийдвэр гүйцэтгэхийн ажлаа хийж, надад ирж цахим гаваа зүүх байх” гэлээ.