БУСДЫГ ГАЛДАН ШАТААСАН гэх н.ЭРХЭМБИЛЭГ, н.ЭНХСАЙХАН нарыг суллаж, н.ТЭМҮҮЖИНГИЙН ХОРИХ ХУГАЦААГ СУНГАЖЭЭ

26 настай залууг фэйсбүүкээр танилцсан Р гэх эмэгтэй 15-25 насны дөрвөн хүнтэй нийлж, шатаасан хэрэг гараад байгаа юм.

     Тодруулбал, есдүгээр сарын 16-ны өдөр цагдаагийн байгууллагад "Зодуулсан хүн гудамжинд хэвтэж байна” гэх дуудлага Чингэлтэй  дүүрэг дэх цагдаагийн газрын хоёрдугаар хэлтэст ирсэн байдаг. Дуудлагын дагуу шалгахад, 26 настай Б гэгчийг фэйсбүүкээр танилцсан 16 настай, эмэгтэй Р гэгч нь тус хороонд байрлах нийтийн байранд дуудан уулзаж, 15 настай иргэн Э, 21 настай иргэн Т, 25 настай иргэн Э, 17 настай иргэн У нарын хамт бүлэглэн дээрэмдэж, шатаасан байдаг. Хохирогчийн бугуйн цаг, гар утас, банкны карт зэргийг дээрэмдэн, банкны картын нууц дугаарыг хэлүүлэхийн тулд хохирогчийн хувцсыг нь тайлж, зодож, будаг шингэлэгч цацаж, гал тавин шатааж, хэргийн газраас зугтсан гэх. Цагдаагийн алба хаагчид тухайн хэргийг үйлдсэн этгээдүүдийг шуурхай эрэн сурвалжилж, Баянзүрх дүүрэгт байрлах шөнийн цэнгээний газраас дайчлан баривчилж, хойшлуулшгүй ажиллагааны хүрээнд ШШГЕГ-ын харьяа цагдан хорих 461 дүгээр ангид 30 хоногийн хугацаатай саатуулаад байсан билээ.

         Тэгвэл цагдан хоригдсон 15, 17 настай  н.Эрхэмбилэг, н.Энхсайхан нарыг суллажээ. Харин 21 настай н.Тэмүүжингийн цагдан хорих хугацааг 30 хоногоор сунгасан байна.

         Бид энэ талаар хохирогчийн найз охин гэх Р-ээс тодруулахад “Б над руу залгаад, уулзъя гэхээр нь “Би гэрээсээ хол явж болохгүй. Чи манайд хүрээд ирэх юм уу” гэсэн чинь хүрээд ирсэн. Ирэхдээ гаднаас пиво авчирч, манай найзын нөхөр, тэдний хоёр хуурай дүү нь хамт уусан. Дахиж архинд явах гээд манай эмэгтэй найз картных нь нууц кодыг асуусан ч Б хэлээгүй. Үүнээс болж тэд хоорондоо зодолдож, хэрүүл болсон. Манай найзын нөхөр нь тэр зодооныг эхлүүлсэн. Би салгах гэсэн боловч чадаагүй. Тэгээд намайг хоёр найз маань “АТМ ороод картанд мөнгө байгаа эсэхийг шалгаад ир” гэсэн. Намайг гарсан хойгуур тэд зодолдож, Б шатаасан байсан. Тэмүүжингийн дүү болох н.Эрхэмбилэг, н.Энхсайхан нарыг сулласан. Би шатсан залуутай уулзах гээд очсон боловч ах, дүү нар нь уулзуулахгүй байна лээ. Мөн утсаар ч яриулдаггүй. Тийм учраас холбоо барьж чадаагүй. Энэ х:эргийн шүүх хурал удахгүй болно гэсэн. Гэхдээ өмгөөлөгч хэлэхдээ одоогийн байдлаар шүүх хурлын төв гараагүй байгаа. Одоогоор ганцхан Тэмүүжин буруутай хэмээн үзэж хорьж байгаа юм шиг байна лээ. Биднээс мэдүүлэг байцаалт авахгүй байгаа” гэв.