-2018 оны зургийг 11-11 төв рүү хэн явуулсныг одоо хүртэл тогтоож чадахгүй байгаа-

       Нийгмийн даатгалын ерөнхий газрын дарга Д.Зоригтыг ажлын байрандаа мөрийтэй тоглоом тоглосон үндэслэлээр үүрэгт ажлаас нь чөлөөлсөн билээ. Тодруулбал, өнгөрсөн есдүгээр сарын 14-нд Засгийн газрын хуралдаанаар уг асуудлыг хэлэлцэж, ажлаас нь чөлөөлөх шийдвэр гаргасан байдан.

Энэ талаар Ерөнхий сайдын Хэвлэлийн төлөөлөгч Ч.Болортуяа хэлэхдээ “Ерөнхий сайд Л.Оюун-Эрдэнийн зүгээс Засгийн газрын ээлжит хуралдаанаар НДЕГ-ын дарга Д.Зоригтыг үүрэгт ажлаас нь чөлөөлөх үүргийг Хөдөлмөр, нийгмийн хамгааллын сайдад өгсөн. Тухайн албан тушаалтан нь ажлын байран дээрээ мөрийтэй тоглоом тоглосон ёс зүйн зөрчлийн талаар иргэнээс 11-11 төвд ирсэн. Тиймээс олон нийт 11-11 төвд авлига албан тушаалтантай холбоотой мэдээллийг үргэлжлүүлэн мэдээлэл өгөхийг хүсье" гэсэн билээ.

      Мөн тухайн үед НДЕГ-ын дарга Д.Зоригт “Би гомдол ирсэн тухай сая сонслоо. Ажлын байрандаа архидах, мөрийтэй тоглох, зүй бус үйлдэл гаргах хориотой. Би ийм зүйл хийгээгүй. Шалгаж тогтоох байх. Шалгахгүйгээр мэдээлэл цацаж байгаа нь харамсалтай байна" гэж хэлж байсан билээ.

            Бид энэ тадаар НДЕГ-ын дарга асан Д.Зоригттой холбогдож, тодрууллаа.

-Таныг албан өрөөндөө мөрийтэй тоглоом тоглосон гэх үндэслэлээр ажлаас нь чөлөөлсөн. Тухайн үед 11-11 төвд ирсэн гээд байгаа зураг хэзээнийх юм бэ?

           -Би ажлаа өгөөд хоёр сар орчим болох гэж байна. Одоогоор төрийн байгууллагад ажиллахгүй байгаа. Олон нийтийн сүлжээнд цацсан зураг нь тухайн үеийнх биш. Мөн миний албан өрөө болон Нийгмийн даатгалын ерөнхий газрын албан өрөө ч биш.Тэр зураг 2018, 2019 оных юм шиг байна лээ. Хууль хяналтын байгууллага үүнийг тогтоосон. Өөрөөр хэлбэл, төрийн байгууллага болон миний албан өрөөнд авахуулсан зураг биш гэдгийг цагдаа нар тогтоосон. Түүнчлэн тэр зургийг аль эртний буюу гурав, дөрвөн жилийн өмнөх гэдгийг ч тогтоосон гэсэн үг.  

-Тэр зургийг хэний өрөөнд авахуулсан юм бэ?

           -Сайн мэдэхгүй байна. Төрийн байгууллагад ажилладаггүй хүний өрөөнд л сууж байх үед авсан юм шиг байна лээ. Хаа хамаагүй хөндлөнгийн хүний өрөөнд байсан гэдгийг цагдаа нар ажиллаад тогтоосон. Дараа нь манай өрөөнд ирж үзлэг, нэгжлэг хийсэн шүү дээ.

-Тэр үеийн зураг гэдгийг нь тогтоогоогүй байж яагаад таныг ажлаас тань чөлөөлсөн юм бол. Ямар байр суурьтай байна вэ?

         -Мэдэхгүй юм даа. Улстөржилт л юм байлгүй дээ. Хэний ч хамаагүй зургийг цахим сүлжээнд цацаад л шүүчихдэг болсон байна шүү дээ. Болоод өнгөрсөн асуудал болохоор би юу хэлэх билээ дээ.

-Таны зураг 11-11 төвд ирсэн гэдэг юм билээ. Хэн явуулсан байж болох вэ?

          -Одоо хүртэл энэ зургийг хэн явуулсныг нь олоогүй. Хууль хяналтын байгууллага нь ч олоогүй байх. Зохион байгуулалттайгаар миний нэр төрийг харлуулах гэсэн л ажиллагаа болоод өнгөрсөн дөө.

-Та ер нь мөрийтэй тоглоом тоглодог юм уу?

         -Нийгмийн даатгалын ерөнхий газрын даргаар ажиллаж байхдаа мөрийтэй тоглоом тоглож байгаагүй гэдгээ баталж хэлж чадна. Хэн л албан өрөөндөө мөрийтэй тоглоод сууж байх билээ дээ.

-Та цаашид төрийн байгууллагад ажиллах уу? 

         -Ёстой хэлж мэдэхгүй нь. Одоохондоо ямар ч байсан ажилгүй л байна.