Баян-Өлгий аймгийн Алтанцөгц сумаас өнгөрсөн 2021 онд тендер зарлаж, 59.8 сая төгрөгөөр Хавцлын голд модон гүүр барьсан юм. Тус тендерт “Жол” ХХК шалгарч, орон нутгийн хөрөнгөөр Хавцлын гол модон гүүртэй болсон билээ.

 Гэвч харамсалтай нь, жилийн өмнө ашиглалтад орсон Хавцлын голын гүүр нурсан. Тодруулбал, өнгөрсөн пүрэв гарагт таван тоннын даацтай модон гүүрээр “Петровис” ШТС-ын жолооч ачаатай машинтай гарсны улмаас эвдэрсэн юм. Тэгвэл гүүр нураасан жолоочтой холбогдож, тодрууллаа. Тэрбээр гурван хоногийн хугацаанд нураасан гүүрээ засаж, янзалжээ.

-Таны бие зүгээр үү?

      -Миний бие сайн, хэвийн байгаа. Бэртэж, гэмтээгүй. Мөн автомашинд надаас гадна туслах жолооч явсан. Түүний биеийн байдал хэвийн байгаа. Гүүр нурснаас өөрөөр хохирол учраагүй.

-Яагаад таван тоннын даацтай гүүрэн дээгүүр зорчсон юм бэ?

        -Гол гүйцэт хөлдөөгүй учраас гүүрэн дээгүүр зорчсон. Гол дөнгөж хөлдөөд мөс тогтож эхэлж байгаа. Хөлдсөн мөс нь машин даахгүй учраас аргагүй эрхэнд гарчихлаа. Үүнээс болоод гүүр нураад унасан. Гайгүй байх гэж найдаад гарч явтал гүүрний гол хэсэгт тас няс болоод л явчихсан. Тэгээд нураад унасан.

-Гүүрийг засварлаад дууссан юм уу?

-Алтанцөгц сумын удирдлага, цагдаа сэргийлэх ирж уулзсан. Хохирлыг нэн даруй барагдуулах үүрэг өгсөн. Туслах жолооч бид хоёр гурван хоногийн хугацаанд нураасан гүүрээ засварлаж дууслаа.  Миний буруугаас болж гүүр эвдэрсэн учраас засварлах мөнгийг би хувиасаа гаргасан.

-Таны нураасан гүүрийг 60 сая төгрөгөөр барьсан юм билээ. Хэдэн төгрөгөөр засварласан бэ?

-Одоогийн байдлаар үнэлгээний хөрөнгө тодорхой болоогүй. Чухам хэдэн төгрөг болсныг тооцоолж дуусаагүй байна.

-“Жол” ХХК-аас засврын ажилд оролцсон уу?

-Оролцоогүй, хөрөнгө мөнгө гаргаагүй. Дахин хэлэхэд засварын хөрөнгийг би хувиасаа гаргасан.

-Стандартын дагуу засварласан уу?

-Стандартын дагуу засаж, засварласан. Баян-Өлгий аймгаас мэргэжлийн хяналтын байгууллагынхан ирж, хүлээж авсан. Мөн Алтанцөгц сумын удирдлагууд засварласан гүүрийг хүлээж авсан. Гүүр нээгдсэн учраас автомашин асуудалгүй, аюулгүй зорчиж байна.

-Өмнө нь Хавцлын голын гүүрээр гарч байсан уу?

-Үгүй, анх удаа л гүүрээр зорчсон. Өмнө нь дандаа голоор гардаг байсан. Энэ удаад цаг агаарын нөхцөл байдлаас бол гүүрээр гарах шийдвэр гаргасан. Гэтэл ийм юм болчихлоо. Харамсалтай байна.