Өсвөр насны хүүхдүүд нэгнийгээ хутгалж, хүндэвтэр гэмтээсэн хэрэг гарсан байдаг. Тодруулбал, наймдугаар ангийн дөрвөн сурагч 13 настай хүүгийн нуруунд хутгалж, гэмтээгээд хэргийн газраас зугтаасан гэх. Хохирогч хүү Гэмтэл согог судлалын үндэсний төвд хэвтэн эмчлүүлж байна. Бид сэрэмжлүүлэг болгох үүднээс дараах мэдээллийг бэлтгэлээ.

13 НАСТАЙ ХҮҮГИЙН НУРУУ, ДАЛ ХЭСЭГТ ГУРВАН УДАА ХУТГАЛЖЭЭ

       Цагдаагийн байгууллагад арваннэгдүгээр сарын 3-ны өдрийн 17:00 цагийн орчимд  “Үл таних хүмүүст зодуулсан хүүхэд байна. Ар нуруу хэсгээс нь цус гараад байна” гэх дуудлага ирсэн. Дуудлага, мэдээллийг хүлээн авч цагдаагийн байгууллагаас шалгалтын ажиллагааг шуурхай зохион байгуулахад 13 настай, эрэгтэй Т нь бусдад зодуулсан, ар нуруу болон хавирга орчимд зүсэгдсэн шархтай байсан. Хохирогч хүүг эмнэлэгт хүргэж, цагдаагийн албан хаагчид гэмт хэрэг үйлдсэн этгээдийг хэн болохыг олж тогтоох чиглэлээр эрэн сурвалжилж, ерөнхий боловсролын сургуулийн наймдугаар ангийн 12-14 насны дөрвөн сурагч 13 настай хүүг хутгалж, гэмтээсэн болохыг тогтоосон. Шалгалтын явцад урьдчилсан байдлаар хохирогч Т-г “Цүнх авлаа” гэх шалтгаанаар 13 настай, эрэгтэй Д нь дал болон хавирганы орчим гурван удаа хутгалж биед нь гэмтэл учруулсан байсан. Уг хэгийг Чингэлтэй дүүрэг дэх цагдаагийн газарт шалгаж байна.

Манай сурвалжлах баг өчигдөр хэрэг болсон газарт очлоо. Тус хэрэг Чингэлтэй дүүргийн нэгдүгээр хороонд байрлах 23 дугаар сургуулийн орчимд болжээ. Тодруулбал, ерөнхий боловсролын 23 дугаар сургуулийн хажууд байрлах III байрны зүүн талд болсон гэнэ. Хэргийн газарт байсан гэрчүүд болон тэр хэсэгт зорчиж явсан иргэд цагдаагийн байгууллагад дуудлага өгч, түргэн тусламж дууджээ. Иргэдийн ярьж буйгаар 13 настай хүү газарт унаж, нуруунаас нь цус гарсан байдалтай байжээ. Харин хэргийн газарт болон ойр орчимд хүүг таних хүүхэд байгаагүй гэнэ.

ЭНЭ БАЙРНЫ ЗҮҮН ТАЛД ХҮҮХДҮҮД ЗОДОЛДОЖ, НЭГНИЙГЭЭ ХУТГАЛЖЭЭ. 2022.11.07-НЫ 14:00 ЦАГ 

        Бид энэ талаар III байрны СӨХ-өөс тодруулахад “Хэргийн талаар бид мэдээгүй. Цагдаагийн байгууллагаас ирж мэдээлэл, зураг, хяналтын камерын бичлэг аваагүй. Хэрэв энэ хавьд ийм хэрэг гарсан бол хүүхдүүд 23 дугаар сургуульд сурдаг байх магадлалтай. Хэргийн талаар мэдэхгүй учраас мэдээлэл өгөх боломж алга” гэсэн юм.

23 ДУГААР СУРГУУЛИЙН НИЙГМИЙН АЖИЛТАН Д.БАТДОРЖ: Манай сургуулийн сурагчид түргэн дуудаж өгсөн гэсэн

        Нэгнийгээ хутгалж, гэмтээсэн сурагчид 23 дугаар сургуульд сурдаг эсэхийг тодруулахаар бид тус сургуулийн нийгмийн ажилтан Д.Батдоржтой холбогдов. Тэрбээр “Хэрэгт холбогдсон хүүхдүүд манай сургуульд сурдаггүй. Бид энэ мэдээллийг гарсан даруй сургуулийнхаа наймдугаар ангийн сурагчидтай болон багш нартай уулзаж, асууж тодруулсан. Тийм зүйл болоогүй гэдгийг хэлсэн. Зодоон болох үед манай сургуулийн сурагчид хажуугаар нь явж таарсан гэсэн. Мөн манай сургуулийн зарим сурагч түргэн дуудаж, тусламж үзүүлсэн юм шиг байна лээ. Манай сургуульд “Өсвөрийн сэргийлэгч” гээд клуб ажилладаг юм. Тус клубынхан зодоон болох үед хажууд нь байсан хүүхдүүдийг тарах, гэртээ харих, гэмт хэргээс урьдчилан сэргийлэх зөвлөмж өгч ажилласан гэж байна лээ. Мөн тэр хүүхдүүд манай сургуулийн хүүхдүүд зодоон хийгээгүй гэдгийг баталж ярьсан” гэх мэдээллийг өглөө.

13 НАСТАЙ ХҮҮГ ГЭМТЭЭСЭН СУРАГЧИД 16 ДУГААР СУРГУУЛЬД СУРДАГ

     Хүүхдүүд хичээлээ тараад 23 дугаар сургуулийн орчимд очжээ. Бидэнд олдсон мэдээллээр хохирогч хүү ерөнхий боловсролын 11 дүгээр сургуульд сурдаг юм байна. Харин хүүг гэмтээсэн дөрвөн хүүхэд ерөнхий боловсролын сургуулийн 16 дугаар сургуулийн наймдугаар ангид сурдаг аж. Ийм учраас бид тус сургуулиудын нийгмийн ажилтан, захирал, анги удирдсан багштай уулзахаар зорьсон юм.

        Ерөнхий боловсролын 11 дүгээр сургуулийн нийгмийн ажилтнаас энэ талаар тодруулахад “Бид хувь хүний мэдээллийг задруулах боломжгүй. Хүү эмнэлэгт хэвтэж байгаа гэх мэдээлэл бий. Сурагчийн ар гэрийнхэн бидэнд мэдээлэл өгөхгүй байгаа” гэлээ.

ХОХИРОГЧ ХҮҮГИЙН АНГИЙН БАГШ П.РЕНЧИНБАЛ: БУСДАД ХУТГАЛУУЛЖ, ГЭМТСЭН ХҮҮХДИЙН БИЕИЙН БАЙДАЛ ГАЙГҮЙ БАЙГАА

       Хохирогч хүү тус сургуулийн наймдугаар ангид сурдаг. Бид хүүгийн ар гэрийнхэнтэй холбогдох гэсэн боловч мэдээлэл өгөхгүй гэнэ. Тодруулбал, хүүгийнхээ биеийн байдал, хэрэг болсон талаар тодорхой мэдээлэл өгөхөөс эрс татгалзаж байгаа гэнэ.

Харин бид хохирогч хүүгийн анги удирдсан багш П.Ренчинбалтай холбогдож, хүүгийн биеийн байдлын талаар тодрууллаа.

      П.Ренчинбал “Хохирогч хүүгийн ар гэрийнхэн нь мэдээлэл өгч болохгүй гэсэн. Гэмтсэн сурагчийн биеийн байдал ямар байгааг би мэдэхгүй байна. Ямартай ч дээрдэж, гайгүй байгаа байх. Хүүгийн аав, ээжтэй би утсаар ярьсан. Өөрөөр мэдээлэл өгөхгүй” гэлээ.

16 ДУГААР СУРГУУЛИЙН НИЙГМИЙН АЖИЛТАН: ХЭРЭГТ ХОЛБОГДСОН ХҮҮХДҮҮД ХИЧЭЭЛДЭЭ ЯВЖ БАЙГАА

       Ерөнхий боловсролын сургуулийн нийгмийн ажилтан Б.Нямдаваа “Хэрэгт холбогдсон хүүхдүүдээс асуухад “Багшаа, хутга биш. “Эрвээхэй тоглоом” хутга шиг адилхан эд” гэж хэлээд байгаа. Энэ асуудлаар өнгөрсөн долоо хоногт бид хэлэлцэж, ярилцсан. Хутгалсан гэж гүтгэсэн учраас хэрэгт холбогдсон хүүхдүүдийн аав, ээж цагдаагийн байгууллагад гомдол гаргана гэж байна лээ. Хутга биш гэж тайлбарлаж байгаа гэсэн үг. Хэрэгт холбогдсон хүүхдүүд наймдугаар ангийн нэг ангийнхан. Одоогийн байдлаар хичээлдээ явж байгаа. Цагдаагийн байгууллагаас уг хэргийг шалгаж байгаа байх. Энэ хэрэг хичээлийн бус цагаар болсон. Эцэг, эхчүүд хүүхдүүддээ хараа хяналтгүй тавихгүй байгаагаас болж хүүхдүүд хэрэгт холбогдож байна. Эцэг, эхчүүд хүүхдээ хичээлээ тараад гэртээ харьж байна уу, хэнтэй нөхөрлөж, найзалж байна, чөлөөтэй цагаараа юу хийж байгааг анхаарахгүй байна шүү дээ. Үүнийгээ эцэг, эхчүүд ухамсарлаж байгаа. Түүнээс биш хичээлийн цагаар хүүхдүүд хэрэгт орооцолдоогүй. Бид гэмт хэргээс урьдчилан сэргийлэх шаардлагатай сургалт, зөвлөгөөг цаг тутам өгч байна” гэлээ.

      Хүүхдүүдийн хэрэглэсэн гэх хутга нь “Эрвээхэй тоглоом” гэх нэртэй хутга гэнэ. Онлайн худалдаагаар 15 мянган төгрөгөөр зардаг юм байна. Олон нийтийн сүлжээнд уг хутгийг хэнд ч хамаагүй зарж байгаа нь өсвөр насны хүүхдүүд гэмт хэрэгт холбогдох, нэгийгээ гэмтээх үндэслэл болж байж болзошгүй байна. Иймд ццэг эх, асран хамгаалагчид та бүхэн хүүхэдтэйгээ илэн далангүй нээлттэй байх,   хүүхдийнхээ найзалж нөхөрлөж буй хүүхдүүд болон цахим хэрэглээнд нь анхаарах, хүчирхийлэл, дарамт  дагуулсан үйлдлийг холбогдох байгууллагад мэдээлэх, мэргэжлийн байгуулагад хандахыг зөвлөж байна. Мөн өсвөр насны хүүхдэдээ тавих хараа хяналтаа сайжруулж, гэмт хэргийн хохирогч, холбогдогч болохоос урьдчилан сэргийлэхийг уриалж байна.