Хөвсгөл аймгийн Тариалан сумаас алга болсон 15 настай хоёр хүүг эсэн мэнд олжээ. Тодруулбал, тус сумын есдүгээр ангийн сурагч С, П нар нь арваннэгдүгээр сарын 02-ны өдрийн 15:00 цагт малаа хариулахаар мотоциклтой гараад сураггүй алга болсон тухай дуудлага арваннэгдүгээр сарын 03-ны өдрийн 22:00 цагт тус аймгийн Онцгой байдлын газарт ирсэн байдаг. Улмаар Тариалан сум дахь Гал түймэр унтраах, аврах 46 дугаар анги, сумын Цагдаагийн тасгийн алба хаагчид, сумын Засаг даргын Тамгын газрын ажилтнууд, ар гэрийнхэн Эрдэнэбулган сумын харьяат С /15 настай, эрэгтэй/, Тариалан сумын харьяат П /15 настай, эрэгтэй/ нарыг эрэн хайх ажиллагааг арваннэгдүгээр сарын 03-ны өдрийн 23:10 цагаас эхлэн зохион байгуулж, эсэн мэнд олжээ.

         Энэ талаар Тариалан сумын ерөнхий боловсролын сургуулийн нийгмийн ажилтнаас тодрууллаа. Тэрбээр “Арваннэгдүгээр сарын 3-нд хөвгүүд хичээлдээ ирээгүй учраас ар гэрийнхэн рүү нь залгаж, асуусан. Алга болсон С нь эмээтэйгээ сумын төвд мал маллаж амьдардаг юм. Өмнө нь Эрдэнэбулган суманд сурч байсан. Хүүгийн эмээ рүү залгаж асуухад “Өчигдөр малдаа яваад ирсэнгүй. Ангийнхаа хүүтэй цуг мотоциклтой явсан. Долоон үхрээ алдчихаад хайхаар явсан” гэж хэлсэн. Тэгээд бид орой хүртэл харзнахаар болж, хүүхдүүдийг хүлээсэн. Гэвч тэр өдрөө ирээгүй учраас холбогдох хүмүүст мэдэгдэж, эрлийн ажиллагааг эхлүүлсэн. Бидэнд олдсон мэдээллээр С хүүгийн найз охин Эрдэнэбулган суманд сурдаг гэсэн юм. Тэгээд Эрдэнэбулган суманд эрлийн ажиллагааг зохион байгуулсан боловч олдоогүй. Эрлийн багийнхан Тариалан суманд эрэн хайх ажиллагааг үргэлжлүүлж, сумын төвд байх айлаас хоёр хүүхдийг эсэн мэнд олсон. Хоёр хүү уг нь арваннэгдүгээр сарын 3-нд гэртээ ирсэн юм билээ. Гэрийнх нь гадаа сургууль, цагдаагийн машин байсан учраас айгаад орж чадаагүй гэж хэлсэн” гэлээ.