Самарт явсан эрэгтэй модноос унаж, амиа алджээ. Тодруулбал, Говь-Алтай аймгийн харьяат, 25 настай эрэгтэй Д нь хуш модноос унаж, газар дээрээ нас баржээ. Цагдаагийн шуурхай удирдлагын утсанд “Күвэйтийн аманд уулын модноос эрэгтэй хүн унаж нас барлаа” гэх мэдээлэл аравдугаар сарын сарын 23-ны 10:59 цагт иржээ. Дуудлагын дагуу Хан-Уул дүүргийн хоёрдугаар хэлтсийн албан хаагчид хэргийн газарт очиход 25 настай эрэгтэй, зургаан метрийн өндөртэй хуш модноос унаж, эмнэлгийн анхан шатны тусламж авч чадалгүй нас барсан байжээ. Талийгаач Говь-Алтай аймгийн Баян-Уул сумаас Улаанбаатар хот руу самар түүхээр ирсэн аж. Бид талийгаач Д-ийн аав Д.Даштай утсаар холбогдож, ярилцлаа. 

-Гүн эмгэнэл илэрхийлье. Та Улаанбаатар хотод ирчихсэн үү? 

                  -Хүүгээ амиа алдсан тухай сонсоод л сумаасаа гарсан. Өчигдөр (уржигдар) Улаанбаатар хотод ирж, буцаад сум руугаа явж байна. Бид одоо (өчигдөр 18:00 цагийн үед) хүүгийнхээ шарилыг ачаад Баянхонхор аймгийн Бөмбөгөр суманд явж байна. Ах, дүү нар минь Баян-Уул сумандаа цуглачихсан биднийг хүлээгээд байж байгаа. Үнэхээр харамсалтай хэрэг боллоо. Зарим хүнд хэл дуулгаж амжаагүй байна. Хүмүүстэй утсаар ярих ч завгүй замд л явж байна. 

-Талийгаач Баян-Уул суманд амьдардаг байсан уу. Хэзээ гэрээсээ гарсан юм бэ? 

                  -Бид Баян-Уул суманд мал маллаж амьдардаг. Хүү маань аав, ээжийнхтэйгээ айл сахалт байж, мал малладаг байсан. Өнгөрсөн есдүгээр сарын 13-нд гэрээсээ гарсан. Самарт явахаар гурван хүнтэй цуг хувийнхаа машинтай сумаасаа гарсан юм. Хэдэн малынхаа хажуугаар намрын их ажлыг дуусгаад өвөл болохоос өмнө гээд л самарт явсан. Хамт явсан гурван хүнийх нь хоёр нь найз, нэг нь манай ахын хүүхэд. Хоёр найз нь түрүүлээд гэр рүүгээ явчихсан юм билээ. Тэгээд ахын хүүтэй цуг үлдэж, самар түүж байгаад модноос унаад амиа алдчихлаа. 

-Хамаатныхаа ахын хүүхэдтэй хамт байсан юм уу. Тухайн өдөр яг юу болсон гэж хэлсэн бэ? 

                  -Тийм ээ, манай ахын хүү хамт байсан. Түүвэр нь дуусаад мод руу авчирч, самраа түүж байсан юм билээ. Өндөр өндөр модоор дамжиж, хэдэн боргоцой олдог юм шиг байна лээ. Гэрээсээ мөнгө олохоор гарсан хүн чинь, дээрээс нь залуу хүн учраас модонд авчирч жаахан юм олж байсан байлгүй. Тэгээд гишгэсэн модных нь мөчир хугарч, өндрөөс дагзаараа саваад унасан гэсэн. Эмнэлгийн түргэн тусламж очиж амжаагүй байхад л газар дээрээ амьсгал хураасан гэж хэлсэн. Уг нь модноос унангуут нь түргэн дуудсан юм билээ. Мөн модноос унасан даруйдаа амьсгаатай байсан гэсэн. Даанч гэмтлээ даалгүй хүү минь бурхан болчихлоо. Бидэнд маш их хэцүү байна. Хүүгийнхээ хүүхдүүдэд юу гэж хэлнэ ээ. Яах учраа үнэхээр олохгүй тэвдэж явна. 

-Талийгаач хэдэн хүүхэдтэй вэ? 

                  -Хүү минь 25 настай. Эрт амьдрал зохиож, боломжийн тайван, сайхан амьдарч байлаа. Таван хүүхэдтэй шүү дээ. Эхнэр, хүүхэд нь бидэнтэй цуг байгаа. Аавыг нь бурхан болсон талаар хүүхдүүдэд нь хэлж зүрхлэхгүй нь. Юу гэж хэлнэ дээ, тэр жаахан хүүхдүүдэд. Хүү минь амьдралын төлөө хэдэн малынхаа хажуугаар таван төгрөг олох санаатай самарт явсан. Цэл залуухан, 25-хан настай хүүгийнхээ цогцсыг ачаад бид сум руугаа явж байна шүү дээ. 

-Хүүтэйгээ хамгийн сүүлд хэзээ ярьсан бэ?

                  -Нас бардаг өдрийнх нь өглөө утсаар ярьсан. Бидэнтэй яриад удаагүй буюу хоёр, гурван цагийн дараа л амиа алдсан байна лээ. Хүү минь хамгийн сүүлд ярихдаа “Хэдэн төгрөгтэй болсон. Өнөөдөр орой буцна. Өнөөдөр л ганц өдөр цохиод гэр рүүгээ явлаа” гэж хэлсэн. Уг нь тэр өдөр л гэр рүүгээ явах байсан юм шүү дээ. Даанч харамсалтай нь амиа алдчихлаа. 

-Хүү нь өмнө нь самарт явж байсан уу? 

                  -Тийм ээ, амьдралын шаардлагаар хар бор ажлыг голохгүй хийдэг байсан. Малчин бидэнд чинь малаас өөр амьдралын эх үүсвэр байхгүй шүү дээ. Хүүхдүүдээ хооллож, хувцаслахаас мөнгө бишгүй хэрэг болно. Тэр бүрийг л зохицуулах гэж яваад хүү минь нартаас буцчихлаа. 

СЭРЭМЖЛҮҮЛЭГ: Самарт яваад, модноос унаж, бэртсэн хүмүүсийн 80 хувь нь амиа алддаг гэсэн судалгаа гарчээ. Ганцхан жилийн хугацаанд самарт явсан явсан 10 гаруй иргэн золгүй байдлаар амиа алдсан харамсалтай тоо бүртгэл байгаа аж. Мөн үүнээс олон тооны хүн төөрч, сураггүй алга болж байжээ. Иймд самар түүхээр зорчиж буй иргэд та бүхнийг өөрийн амь нас, эрүүл мэндээ авран хамгаалахын тулд аюулгүй байдлаа хангахыг уриалж байна.