Цэргийн албанд татагдсан залуусыг тээвэрлэж явсан автомашины жолооч зам тээврийн осол гаргасан талаар бид өмнө нь мэдээлсэн. Тодруулбал, өнөөдөр буюу аравдугаар сарын 17-нд 12:00 цагийн орчимд Хэнтий аймгийн төвөөс Дорнод аймаг руу хөдөлсөн машин замын хажуу руу унажээ. Осол гаргасан машины тэвшин дээр 17 цэрэг, хоёр ахлагч, нэг офицер зорчиж явсан юм.

          Сүхбаатар аймгийн Түмэнцогт сумын Эрүүл мэндийн төвийн дарга н.Энхбатаас тодрууллаа. Тэрбээр “Өчигдөр осол болсон тухай дуудлага манай эмнэлэгт ирсэн. Дуудлагын дагуу бид ослын газарт очиж, автомашинд зорчиж явсан 20 хүнд анхан шатны тусламж үзүүлсэн. Дээд шатны эмнэлэгт үзүүлэх шаардлагатай, гэмтэлтэй долоон хүнийг Хэнтий аймгийн төв рүү явуулсан. Тодруулбал, эгэм нь хугарсан нэг, цээжний бэртэлтэй хоёр, хүзүү, толгой нь хөдөлж чадахгүй хоёр, толгой нь хагарч гэмтсэн хоёр хүнийг яаралтай тээвэрлэсэн. Нэг цэргийн эгэм нь хугарч, цээжээ хөдөлгөж чадахгүй байсан учраас боолт хийсэн. Мөн хүзүү нь бэртсэн хоёр цэрэгт бэхэлгээ хийж өгсөн. Нэг хүний толгой хоёр хэсэгтээ хагарч, есөн оёдол тавьсан” гэлээ.

             Харин Хэнтий аймгийн Нэгдсэн эмнэлгийн дарга Д.Оюунгэрэл "Цэргүүдийн биеийн байдал сайн байгаа. Зөөлөн эдийн хөнгөн бэртэл авсан" гэсэн юм.