Монголын хөлбөмбөгийн Үндэсний нэгдүгээр лигийн дөрөвдүгээр тойргийн тоглолтын үеэр “Bavarians FC” багийн тоглогч М.Төгөлдөр эсрэг багийн тамирчинд өшиглүүлж биедээ хүнд гэмтэл авсан байдаг. Тодруулбал, “Bavarians FC” болон “Alliance” багийн тоглолтын үеэр “Bavarians FC” багийн тоглогч М.Төгөлдөрийг талбайд бөмбөг эзэмшиж байхад нь эсрэг багийн тоглогч Николай Мазалков шагай руу нь жийж, унагаж, улмаар гэмтээсэн юм.   

         Харамсалтай нь, уг үйлдлийг шүүгч тоогоогүй бөгөөд, тамирчныг “Энэ угаасаа ингэж баашилж, унаж байдаг. Би энэ тамирчныг 10 жил ингэж байхыг нь харсан. Алдаа байхгүй. Харин худлаа унасан М.Төгөлдөрийг шар картаар торгож байна” гэжээ. Өөрөөр хэлбэл, шагайгаа гэмтээсэн тамирчныг буруутгаж, шар картаар торгож, легонер тамирчныг буруугүй гэж үзсэн. Харин тамирчин нь гэмтсэн багийнхан тоглолтыг буруу шүүсэн, үүнээс болж хожигдсон гэж үзэж байгаа Бид энэ талаар дараах сурвалжилгыг бэлтгэлээ.

М.ТӨГӨЛДӨР: ШҮҮГЧ НАМАЙГ 10 ЖИЛ МЭДНЭ ГЭДЭГ НЬ ХУДАЛ. БИ 10 ЖИЛИЙН ӨМНӨ ЭНЭ ХҮНИЙГ ТАНЬДАГ БАЙГААГҮЙ

         Бид тоглолтын  үеэр юу болсон, тамирчны биеийн байдал ямар байгааг тодрууллаа. Одоогийн байдлаар тоглогч М.Төгөлдөр ГССҮТ-д үзүүлж, шаардлагатай эмчилгээ бичүүлж, гэртээ байгаа аж. Түүний шагай болон гарын яс нь цуурчээ. Тоглолтын талаар тэрбээр хэлэхдээ  “Николай Мазалков хөл рүү жийж орж ирээд, миний гарыг дарж унасан. Шүүгч алдаа зааж, шүгэл үлээгээгүй. Би хугарсан гартайгаа тоглолтыг үргэлжлүүлэхэд шүүгч “Би 10 жил М.Төгөлдөрийг мэднэ. Худлаа унадаг, жүжиглэдэг” гэсэн тайлбар өгсөн байна лээ. Миний гар, хөлийн яс цуурч, хугарсан байгаа. Өнөөдөр хөлөө томографикт харуулж, гомдол гаргана. Шүүгч намайг 10 жил мэднэ гэдэг нь худал. Би ч 10 жилийн өмнө энэ шүүгчийг таньдаг байгаагүй. Хувийн өс хонзон байхгүй гэж бодож байна. Гомдолтой байгаа учраас хандах газар нь хандана” гэв.

ХӨЛ РҮҮ НЬ ЖИЙЖ УНАСАН ТАМИРЧИН М.ТӨГӨЛДӨРӨӨС УУЧЛАЛТ ГУЙЖЭЭ

         Харин М.Төгөлдөрийг гэмтээсэн гэх “Alliance” багийн легонер тамирчин Николай Мазалков нь тус багийн бүрэлдэхүүнд хоёр жил тоглож байгаа гэнэ. Тэрбээр  есдүгээр сарын шилдэг тоглогчоор шалгарч байсан туршлагатай тамирчин аж. Харин дөрөвдүгээр тойргийн тоглолтод М.Төгөлдөрийн хөл рүү жийж, унасан үйлдлийг тэр тайлбарлахдаа “Тоглолтын үеэр бөмбөг рүү явсан боловч хоцроод, тамирчны хөл рүү нь орчихсон. Ямар нэгэн байдлаар санаатай гэмтэл учруулахыг огт хүсээгүй. Би ийм үйлдэл гаргасан даруйдаа тоглолтын дараа ГССҮТ дээр очиж өөрөөс нь уучлалт хүссэн. Тамирчин гэмтсэнд маш их харамсаж байна” гэв. 

МОНГОЛЫН ХӨЛБӨМБӨГИЙН ХОЛБООНЫ ШҮҮГЧДИЙН ХОРОО ХУРАЛДАЖ ДАРААГИЙН ШИЙДВЭР ГАРГАНА

         Монголын хөлбөмбөгийн холбооны шүүгчдийн хорооны бүрэлдэхүүн тоглолтын үеэр шүүгчийн гаргасан асуудлын дагуу энэ сарын 11-ний өдөр хуралдаж, шүүгчид авах арга хэмжээг хэлэлцэж байгаа аж. Шүүгчдийн хорооны дарга О.Түмэнбаяраас энэ талаар тодруулахад “Хуралдаан дууссаны дараа шүүгчид ямар хариуцлага тооцож, арга хэмжээ авахыг шийднэ. Бид дөнгөж саяхан хуралдааныг эхлүүлээд байна” гэлээ. 

ТОГЛОЛТЫН ДАРАА ШҮҮГЧИД ХАРИУЦЛАГА ТООЦОЖ, ШҮҮХ ЭРХИЙГ НЬ ХАССАН ГЭВ

         Монголын хөлбөмбөгийн холбооны шүүгч Г.Сүх-Эрдэнэ тухайн тоглолтын үеэр М.Төгөлдөрийг гэмтлийн улмаас газар унахад, алдаа заасангүй гэж шүүмжилсэн хүмүүст хандаж “М.Төгөлдөр олон удаа худлаа унаж, жүжиглэдэг” гэж хэлсэндээ тайлбар өглөө.

-Тоглолтын үеэр та М.Төгөлдөрийг худлаа унасан гэж хэлсэн гэх мэдээлэл бий. Энэ үнэн үү ? 

         -Тухайн үед би худлаа уначихлаа гэж харсан нь үнэн. Харин тоглолт дууссаны дараа буруу шүүсэн нь тодорхой болсон. Уг шийдвэртээ маш их харамсаж, гэмшиж байна. Би шүүгч учраас өөрийн гаргасан шийдвэрээ баталгаажуулж, итгэлтэй байх ёстой. Хүмүүс М.Төгөлдөрийг олон удаа шүүгчийг хуурч, худлаа унадаг гэдгийг мэднэ. Ийм үйлдэл гаргаж байсан учраас түүнтэй адилхан зүйл боллоо л гэж хэлсэн. Үүнд тухайн хүнийг доромжилсон хандлага огт байхгүй. 

-Тоглолтын дараа холбогдох албанаас танд хариуцлага хүлээлгэсэн үү? 

         -Тоглолт дуусаад л би шүүх эрхээ хасуулж, тодорхой хэмжээний хариуцлага хүлээсэн. Миний нэр хүнд хангалттай унасан. Одоо би ажил хөдөлмөр, цалин мөнгөө хасуулчихсан байна. Энэ нь хүмүүсийн хүссэн шийдвэрт хүрлээ. Дэлхийн шүүгч нар хүртэл алдаа гаргадаг шүү дээ. Тухайн цаг үед тэр алдааг олж харах, шүүлт хийхэд амархан байгаагүй. 

-Ямар шалтгаанаар М.Төгөлдөрт шар хуудас өгсөн бэ? 

         -Жүжиглэсэн гэж үзвэл шар хуудас өгдөг. Гэхдээ миний хэлсэн үг хэн нэгнийг гутаан доромжлох гээгүй. Өөрийн гаргасан шийдвэрээ эелдэг байдлаар батлах гэж л хэлсэн юм. Дараа нь би хэлсэн үгэндээ харамссан. М.Төгөлдөрөөс болон багийнхнаас нь уучлалт хүсэж байна. М.Төгөлдөрийг гэмтсэнд маш их харамсаж байна. Миний сэтгэл зүй хүнд байна.