“Bavarians FC” багийн тоглогч хүнд гэмтэж, эмнэлэгт хүргэгджээ. Тодруулбал, Монголын хөлбөмбөгийн холбооны Үндэсний нэгдүгээр лигийн дөрөвдүгээр тойргийн тоглолт үеэр тус багийн тамирчин М.Төгөлдөр эсрэг багийн тамирчинд өшиглүүлж, гэмтжээ. Тоглолт “Bavarians FC” болон “Alliance” багын хооронд явагдаж байсан аж. Тоглолт дуусах үед “Bavarians FC” багийн тоглогч М.Төгөлдөрийг талбайд бөмбөг эзэмшиж байхад нь эсрэг багийн тоглогч Николай Мазалков шагай руу нь жийж, унагажээ.  

      Харамсалтай нь, уг үйлдлийг шүүгч тоогоогүй бөгөөд, тамирчныг “Энэ угаасаа ингэж баашилж, унаж байдаг. Би энэ тамирчныг 10 жил ингэж байхыг нь харсан Алдаа байхгүй. Харин худлаа унасан М.Төгөлдөрийг шар картаагаар торгож байна” гэжээ. Өөрөөр хэлбэл, шагайгаа гэмтээсэн тамирчныг буруутгаж, шар картаар торгож, легонер тамирчныг буруугүй гэж үзжээ. Харин тамирчин нь гэмтсэн багийнхан тоглолтыг буруу шүүсэн, үүнээс болж хожигдсон гэж үзэж байгаа гэнэ. Одоогийн байдлаар тоглогч М.Төгөлдөр ГССҮТ-д онош тавиулж, гэртээ эмчлүүлж байгаа бөгөөд шагай, гарын яс нь цуурчээ.

Бид М.Төгөлдөртэй холбогдож, энэ талаар тодрууллаа. Тэрбээр  “Николай Мазалков хөл рүү жийж орж ирээд, миний гарыг дарж унасан. Шүүгч алдаа зааж, шүгэл үлээгээгүй. Би хугарсан гартайгаа тоглолтыг үргэлжлүүлэхэд шүүгч “Би 10 жил М.Төгөлдөрийг мэднэ. Худлаа унадаг, жүжиглэдэг” гэсэн тайлбар өгсөн байна лээ. Миний гар, хөлийн яс цуурч, хугарсан байгаа. Өнөөдөр хөлөө томографикт харуулж, гомдол гаргана. Шүүгч намайг 10 жил мэднэ гэдэг нь худал. Би ч 10 жилийн өмнө энэ шүүгчийг таньдаг байгаагүй. Хувийн өс хонзон байхгүй гэж бодож байна. Гомдолтой байгаа учраас хандах газар нь хандана” гэв.