• Өнөөдөр 2024-03-29

“ЗУУН ТҮМЭН БУЯН” ХХК-ИЙН ЗАХИРАЛ АСАН М.БААСАНДОРЖИЙГ НАС БАРСАН ИРГЭДИЙГ МЭДЭЭЛЛИЙГ АВЧ, ЭМЧ НАРТ 100 САЯ ТӨГРӨГИЙН ХАХУУЛЬ ӨГСӨН ХЭРЭГТ ШАЛГАЖ БАЙНА

2022-09-28,   1189

          Нас барсан иргэдийн мэдээллийг эмч нараас худалдан авч ашиг олдог, авлига өгдөг компанийн эздийг илрүүлж, хууль хяналтын байгууллагаас шалгаж байна. Үүгээр ч зогсохгүй Нийслэлийн түргэн тусламжийн төвийн удирдлага, эмч нар болон Шуурхай удирдлагын төвийн 14 албан тушаалтан уг авлигын хэрэг холбогдсон байж болзошгүй нөхцөл байдал илрээд байгаа. Тодруулбал, гэртээ нас барсан, өвчний онош нь тодорхой буюу цагдаагийн байгууллагад шалгуулах шаардлагагүй гэж үзсэн талийгаачийн гэрийн хаягийг буяны компанид өгч, шарилыг хувийн компаниудаар зөөлгөхөд хууль бус давуу байдал олгож байжээ. Эрх мэдэл, албан тушаалын байдлаа урвуулан ашиглаж, бусдад давуу байдал олгосон эмч, эмнэлгийн удирдлага, хууль бус ажиллагааг зохион байгуулж, авлига өгсөн гэх компанийн удирдлагуудыг шалгаж, шүүх шилжүүлэх саналтайгаар хүргүүлээд байгаа юм. 

НАС БАРСАН ИРГЭДИЙН МЭДЭЭЛЛИЙГ АВЧ, 100 САЯ ТӨГРӨГИЙН ХАХУУЛЬ ӨГЧЭЭ

       Олон жилийн бугшсан авлигалын хэргийн сэжүүр өнгөрсөн онд хууль хяналтын байгууллагынхны гарт иржээ. Өөрөөр хэлбэл, эмнэлгийн удирдлага, буяны үйлчилгээ үзүүлдэг компанийн захирал нарын авлига, давуу байдлын хэргийн ноцтой баримт ирж, мөрдөн шалгах ажиллагааг эхлүүлсэн гэнэ. 

           Эх сурвалжийн мэдээлснээр “Өнгөрсөн 2021 оны зургадугаар сараас энэ хэргийг шалгаж эхэлсэн. Ноцтой хэд хэдэн баримт ирсэн учир мөрдөн шалгах ажиллагааг эхлүүлж, шалгаж байсан. Шалгалтаар эмч, эмнэлгийн удирдлагууд нас барсан иргэдийн мэдээллийг зарсан хариудаа 100 сая төгрөгийн хахууль авсан нь тогтоогдоод байгаа гэсэн. Үүнийг хууль хяналтын байгууллагаас шалгаж тогтоосон байх. Энэ хууль бус ажиллагаагаа хэдэн жил үргэлжилснийг мэдэхгүй. 100 сая төгрөгийн хахууль авсан гэх олон удаагийн давтамжтай хэргийг шүүхэд шилжүүлэх саналтайгаар прокурорын байгууллагад хүргүүлсэн байна лээ. Иймд энэ хэрэг нэг тийшээ шийдэгдэх байх” гэлээ.

С.АРИУНБОЛД ТЭРГҮҮТЭЙ 14 ХҮНИЙГ ШАЛГАЖ БАЙНА

      Нас барсан иргэдийн шарилыг зөөлгөхөд хувийн компанид давуу байдал олгож, 100 сая төгрөгийн хахууль авсан хэрэгт ЯТТТ-ын эмчилгээ эрхэлсэн дарга С.Ариунболд тэргүүтэй 14 хүнийг шалгаж байгаа гэнэ. Одоогийн байдлаар эрх мэдэл, албан тушаалын байдлаа урвуулан ашиглаж, хахууль авсан этгээдүүдийг албан тушаалаас нь чөлөөлөхөөр болоод байгаа аж.

Тэгвэл эмч, эмнэлгийн удирдлагуудад хахууль өгч, иргэдийн мэдээллийг авдаг байсан гэх үндэслэлээр “Зуун түмэн буян” ХХК-ийн гүйцэтгэх захирал Моломын Баасандоржийг шалгаж эхэлсэн талаар эх сурвалж мэдээллээ.

        Эх сурвалжийн мэдээлснээр “Зуун түмэн буян” ХХК-ийн гүйцэтгэх захирал М.Баасандорж нь 100 сая төгрөгийн хахуулийн хэрэгт холбогдсон. Өнгөрсөн жилээс хойш энэ хэрэгт холбогдуулан шалгаж байгаа. Хахуулийн хэрэгт холбогдсон М.Баасандоржийг өнгөрсөн оны аравдугаар сард ажлаас нь чөлөөлсөн юм шиг байна лээ. Мөн тус компанийн нэг ажилтныг ажлаас нь чөлөөлсөн. Өөрөөр хэлбэл, “ Зуун түмэн буян” ХХК-ийн хоёр хүн уг хахуулийн хэрэгт холбогдсон гэсэн үг" гэв. 

ЗУУН ТҮМЭН БУЯН ХХК-ИЙН ЗАХИРАЛ МӨНХТУЛГА: ЭМЧ НАРТ ХАХУУЛЬ ӨГСӨН ГЭХ ХОЁР ХҮНИЙГ АЖЛААС НЬ ЧӨЛӨӨЛСӨН

          Бид энэ талаар "Зуун түмэн буян" ХХК-ийн гүйцэтгэх захирлаар ажиллаж байгаа Мөнхтулгатай холбогдож, тодрууллаа. Тэрбээр "Манай компани Налайх дүүргийн гуравдугаар хороонд байрладаг. Буяны үйл ажиллагааг олон жил гүйцэтгэж, иргэдэд үйлчилж байна. Эмч нарт хахууль өгч, нас барсан иргэдийн мэдээллийг авдаг гэх хэрэгт манай компанид ажиллаж байсан хоёр хүнийг шалгаж байгаа. Авлигын хэрэгт холбогдсон учраас өнгөрсөн онд хоёр хүнийг ажлаас нь чөлөөлсөн. Хувь хүнтэй холбоотой асуудал учраас энэ талаар бид мэдэхгүй. Буруу ташаа мэдээллээс болж манай компани руу дайрч, гүтгэж байна. Энэ хэрэг манай компанид огт хамаагүй" гэлээ. 

     

 

 

 


“ЗУУН ТҮМЭН БУЯН” ХХК-ИЙН ЗАХИРАЛ АСАН М.БААСАНДОРЖИЙГ НАС БАРСАН ИРГЭДИЙГ МЭДЭЭЛЛИЙГ АВЧ, ЭМЧ НАРТ 100 САЯ ТӨГРӨГИЙН ХАХУУЛЬ ӨГСӨН ХЭРЭГТ ШАЛГАЖ БАЙНА
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188