Дарханы арьс ширний цогцолбор газрын гүйцэтгэх захирал Д.Энхбаяр болон Хөгжлийн банкны охин компани “Ди Би Эм ассент менежмент ҮЦХ” компанийн захирал  асан Д.Болормаа нарыг цагдан хорьжээ. Тодруулбал, Д.Энхбаяр, Д.Болормаа нарыг эрх мэдэл албан тушаалын байдлаа урвуулан ашиглаж, хууль бусаар 15 тэрбум төгрөгийн зээл авсан, авсан зээлээ зориулалтын бусаар зарцуулсан гэх үндэслэлээр цагдан хорьсон талаар эх сурвалж мэдээллээ. Мөн тэдний прокурорын зөвшөөрлөөр тэдний гэрт болон албан өрөөнд нэгжлэг хийж, ноцтой баримтуудыг хураан авчээ.

Эх сурвалжийн хэлснээр “АТГ-ын мөрдөгчид өчигдөр Д.Энхбаяр, Д.Болормаа нараас мэдүүлэг, байцаалт авч хойшлуулшгүйгээр дайчлан баривчилсан.  Цагдан хорьсон үндэслэлээ өмгөөлөгчөөр нь дамжуулж, ар гэрийнхэнд нь мэдэгдсэн. Д.Энхбаярын гэрээс ноцтой баримт, санхүүгийн тайланг эд мөрийн баримтаар хураан авсан гэсэн. Одоогийн байдлаар 48 цагийн хугацаатай цагдан хорьсон юм байна лээ. Нөхцөл байдал хүндэрвэл цагдан хорих хугацааг 30 хоног болгох хүсэлт гаргах байх” гэв.