Тоглолтыг нийслэл, хөдөө, орон нутгийн 2000 гаруй хүн үзжээ

Алтанбулаг боомтоор хил нэвтэрч, “Энхсаран” сувилалд 21 хоног тусгаарлагдаад гарсан ачаа тээврийн 29 настай жолооч коронавирусийн халдвар тээгч болж, түүнээс эхнэр, хадам ээж, дүүд халдвар авсан нь тодорхой болсон. Халдвар илэрсэн иргэдийн ойрын хавьтлыг тогтоохоор албаныхан ажиллаж байна. Хавьтлын тоо ойролцоогоор 3500 хэдийн гарсан гэх. Халдвартай жолооч тусгаарлалтаас гарсан даруй даа “UB palact” дуучин Д.Дэмбэрэлнямбуугийн “Хархан нүдэн” тоглолтыг эхнэр, дүүгийн хамт үзсэн нь халдвар тархах эрсдлийг бүрдүүлсэн гэж үзэж буй. Тэрбээр тоглолт үзсэний дараа эхнэртэйгээ хамт дуучинтай зургаа татуулж, гар барьсан гэдэг. Ингэснээр дуучин Д.Дэмбэрэлнямбууг гэр бүлийн 10 хүнийг хамт мөн адил тусгаарлахад хүргээд буй.

Хавьтлын зам

Увс аймгийн Тэс сумын харьяат залуу дуучин Д.Дэмбэрэлнямбуугийн “Хархан нүдэн” тоглолтод МУГЖ Г.Батбаяр, Уранчимэг, СТА Л.Банзрагч, А.Мөнхбат, Д.Бурмаа, Болдбаатар Т.Амина, хөгжмийн зохиолч Б.Магсаржав, эх, үрсийн элч дуучин Ноён бондгор, гэргий Б.Золзаяа, ерөөлч Сүхээ, бүжгийн “Угсаатан” “Ятгын дөрвөл” хамтлаг урилгаар оролцжээ. Харин тоглолтыг залуу дуучин Г.Батсүх хөтөлсөн гэнэ.

Тоглолтыг Увс аймгийн Тэс сумын нутгийн зөвлөлөөс зохион байгуулсан юм байна. Ингэхдээ тус аймгийн харьяат иргэдэд тоглолтын билетээ “шахжээ”. Түүгээр ч зогсохгүй хэд хэдэн аймаг, сумын нутгийн зөвлөлөөр дамжуулан билетээ хүргээд амжжээ. Одоогийн байдлаар “Хархан нүдэн” тоглолтыг нийслэлээс гадна долоон аймгийн 2000 гаруй иргэн үзжээ. Тухайлбал, Сэлэнгэ аймгийн Баянгол сумын захиргааны гурван ажилтан тоглолт үзээд, нутаг буцжээ. Үүнтэй холбоотойгоор Сэлэнгэ аймагт хөл хорио тогтоож, тоглолт үзсэн иргэдийг гэрт нь тусгаарлаад байгаа аж. Энэ талаар тус сумын Засаг даргаас тодруулахад “Тухайн дуучин нь манай сумаас гаралтай хүн. Хамаатнууд нь суманд амьдардаг учраас тоглолт үзээд ирсэн. Үүн дотор захиргааны гурван ажилтан байгаа. Одоогийн байдлаар тухайн хүмүүсийг гэрт нь тусгаарлах арга хэмжээ аваад байна” гэлээ. Энэ мэтчилэн Увс, Говь-Алтай, Сэлэнгэ, Хөвсгөл, Дархан-Уул, Дорноговь, Өмнөговь аймгийн тоглолт үзсэн иргэдийг II хавьтагчаар тооцон тусгаарлах арга хэмжээ авч байгаа аж.

Төрийн албан хаагчид олноороо тоглолт үзсэний учир юу вэ

Улаанбаатар хотод ирж тоглолт үзсэн иргэдийг олж тогтоон яаралтай арга хэмжээ авч байна. Тоглолтыг зарим аймгийн төрийн албан хаагчид хэдэн зуун километр зам туулан ирж олноороо үзсэн нь хачирхалтай. Тоглолтын билетийг Увс аймгийн Тэс сумын нутгийн зөвлөлөөс АН-ын нөлөө бүхий гишүүдээр дамжуулан иргэдэд түгээсэн байж болзошгүй аж. Тодруулбал, Тэс сумын гэх харьяатай бараг л бүх хүнд халдварын голомтод тоглолт үзэж суусан гэдгийг эх сурвалж мэдээлж байна. Коронавирусийн халдвартай нь тогтоогдсон жолооч UB Palace-ийн танхимын 14 дүгээр эгнээнд сууж байсан аж. Иймд тус тоглолтыг үзсэн ард иргэдийг УОК төдийгүй аймгуудын Онцгой комиссоос “Шаардлагагүй бол гэрээсээ гарахгүй, өөрсдийгөө тусгаарлахыг үүрэг болгон аймаг, орон нутгийн Онцгой комисст дуудлага өгснөөр мэргэжлийн баг очиж шинжилгээ авна” хэмээн утсаар зөвлөж байгаа юм.