Тайчих бааранд үйлчлүүлж байсан Гаалийн ерөнхий газрын Хар тамхитай тэмцэх хэлтсийн улсын ахлах байцаагч Д хар тамхи хэрэглэсэн үедээ цагдаагийн албан хаагчдад баригдсан байдаг. Тодруулбал, Эрүүгийн цагдаагийн албаныхан уржигдар шөнө тайчих үзүүлбэр үзүүлдэг “SQ”, STVX” бааранд шалгалт хийжээ. Шалгалтын явцад баарны бүжигчин, үйлчлүүлэгч хоёроос сэтгэцэд нөлөөлөх мансууруулах бодис илэрсэн гэх. Тодруулбал, тайчигч байрны бүжигчин, бааранд үйлчлүүлж байсан Гаалийн ерөнхий газрын улсын ахлах байцаагч.

Гаалийн ерөнхий газрын улсын байцаагч, тэр дундаа Гаалийн зөрчилтэй тэмцэх хэрэг бүртгэлийн газрын Хар тамхины хяналтын албаны байцаагч хар тамхи тээвэрлэж, бусдад дамжуулсан, өөрөө хэрэглэсэн гэдэг нь маш ноцтой асуудал юм.

ЦЕГ: ХАР ТАМХИ ХЭРЭГЛЭСЭН ЭТГЭЭДҮҮДИЙГ ШАЛГАЖ БАЙНА

       Энэ хэргийн талаар ЦЕГ-ын Хэвлэл мэдээллийн төвийн мэргэжилтнээс тодруулахад “Эрүүгийн цагдаагийн албанаас өчигдөр (уржигдар) шөнө албан шалгалт хийсэн нь үнэн. Одоогийн байдлаар хэдэн хүнээс мансууруулах бодис илэрсэн гэдэг нь тодорхойгүй байна. Мөрдөн шалгах ажиллагаа үргэлж байгаа учраас мэдээлэл өгөх боломжгүй” гэлээ.

          Эх сурвалжийн мэдээлснээр “Эрүүгийн цагдаагийн албанд мэдээлэл ирж, шалгалтын ажиллагаа явуулсан гэнэ. Гаалийн улсын байцаагч өмнө нь хар тамхи татаж байсан байж болзошгүй нөхцөл байдал илэрч, шалгалтын ажиллагаа явуулсан юм билээ. Шалгалт хийсэн баар нь байнгын үйлчлүүлдэг хүнээ авдаг, өмнө нь хар тамхи татаж байгаад олон хүн баригдсан газар гэсэн. Тийм учраас хяналт, шалгалтыг хууль хяналтын байгууллагынхан тогтмол хийж, мэдээлэл авч байдаг гэнэ. Мөн тус баар нь гишүүнчлэлгүй, тусгай картгүй бол үйлчилдэггүй гэсэн. Тус газарт хар тамхи, сэтгэцэд нөлөөлөх бодисыг чөлөөтэй хэрэглүүлдэг байж болзошгүй” гэв.

Эрүүгийн цагдаа, Хар тамхитай тэмцэх хэлтэс, Сүхбаатар дүүргийн цагдаагийн албан хаагчид хэрэг бүртгэл нээн уг хэргийг нарийвчлан шалгаж байна.

ХАР ТАМХИ ТАТСАН ГААЛИЙН БАЙЦААГЧ Д ХИЛ ДЭЭР ХУРААГДСАН БАРААГ БУСДАД ДАМЛАН БОРЛУУЛЖ, ХУВЬДАА ЗАВШИЖ, ӨӨРӨӨ ХЭРЭГЛЭДЭГ БАЙЖ БОЛЗОШГҮЙ

        Зөрчил гаргаж хураагдсан барааг гаалийн байцаагч бусдад тарааж, өөрөө хэрэглэсэн байж болзошгүй нөхцөл байдал илрээд байгаа гэнэ. Тодруулбал, бааранд үйлчлүүлж байсан иргэдээс шинжилгээ авч, тестээр үзжээ. Ингэхэд тус бааранд тайчих үзүүлбэр үзүүлдэг иргэнээс хар тамхи илэрсэн гэх. Мөн тус баарны эзэн Г-ийн дансаар их хэмжээний мөнгөний гүйлгээ орж, бусдад хар тамхи наймаалдаг байж болзошгүй гэнэ.

          Энэ талаар эх сурвалж “Маш том бүлэглэлийн сэжүүр илэрч байж болзошгүй гэсэн. Ийм учраас хууль хяналтын байгууллагынхан уг хэргийг нарийвчлан шалгаж байгаа гэсэн. Гаалийн байцаагч залуу хаанаас хар тамхи авах, хэн зөөвөрлөв гээд шалгаж байна. Бүлэглэл байх магадлал өндөртэй юм байна лээ. Учир нь, хар тамхи хэрэглэсэн гаалийн байцаагч залуу хил дээр хураагдсан хар тамхийг бусадтай бүлэглэж, хувьдаа завшиж, бусдад дамлан зардаг байсан байж болзошгүй нөхцөл байдал илэрч байгаа гэнэ. Бүр тодруулбал, баарны эзэнтэй тохиролцож, бараа нийлүүлж, үйлчлүүлэгчдэд дамжуулдаг байж магадгүй гэнэ. Гаалийн зөрчилтэй тэмцэх хэрэг бүртгэлийн газрын Хар тамхины хяналтын албаныханд хар тамхитай тэмцэх эрхийг нь өг гээд тэмцээд байдаг. Угтаа тэд жинхэнэ хэргийн “эзэд”, бүлэглэл үүсгэсэн байх магадлалтай байна. Хэрэв ийм байвал хар тамхи замбараагаа алдсан гэсэн үг” гэлээ.

ГЕГ-ЫН ДАРГА Б.АСРАЛТ: ХЭН ГЭДЭГ БАЙЦААГЧ ХАР ТАМХИ ХЭРЭГЛЭСНИЙГ МЭДЭХГҮЙ

Одоогийн байдлаар хар тамхи татсан гаалийн байцаагч Д гэдэг нь нууцлалтай байна. Түүнийг холбогдох албаныхан ихэд нууцалж байгаа гэнэ.   

         Энэ талаар Гаалийн Ерөнхий газрын дарга Б.Асралтаас тодруулахад “Манай улсын байцаагчаас хар тамхи илэрсэн гэх мэдээллийг харсан. Ямар байцаагчаас хар тамхи илэрснийг нь мэдэхгүй байна. Тус мэдээлэл үнэн эсэхийг Эрүүгийн цагдаагийн газраас тодруулж байгаа. Гаалийн ерөнхий газар руу цагдаагийн газраас холбогдоогүй байна” гэсэн байдаг.

“SQ” БААРНЫ “ЭЗЭН”: ХАР ТАМХИ ХЭРЭГЛЭСЭН ХЭРГИЙН ТАЛААР МЭДЭХГҮЙ

         Эрүүгийн цагдаагийн албаныхан “SQ”, “STVX” тайчих үзүүлбэрийн бааранд шалгалт хийсэн байдаг. Бид үйлчлэгч, үйлчлүүлэгчээс нь хар тамхи илэрсэн хэргийн талаар “SQ” баарны эзнээс тодруулахад “Энэ хэргийн талаар юу ч мэдэхгүй. Тийм зүйл болоогүй” хэмээн утсаа салгасан юм.

       Харин “STVX” баарны эзэн н.Тулгатай холбогдож, тодруулахад “Бид тус баарыг түрээсэлж үйл ажиллагаа явуулдаг. Эрүүгийн цагдаагийн албанаас шалгалт явуулсан нь үнэн. Тухайн өдөр би ажил дээрээ байгаагүй. Манай зөөгч, зохион байгуулагч, бүжигчид, харуул хамгаалалтын ажилтнууд хариуцаж ажиллуулж байсан. Манайд үйлчлүүлж байсан хүнээс хар тамхи илэрсэн юм билээ. Харин тайчих үзүүлбэрийн бүжигчдээс хар тамхи илрээгүй. Бүгдийг нь шинжилгээнд хамруулж, шалгасан. Өнөөдөр байцаалт мэдүүлэг өгсөн хүн байхгүй байна. Хар тамхи илэрсэн үйлчлүүлэгч өмнө нь манайд орж ирж байсан эсэхийг мэдэхгүй” гэлээ.