Дарханы замын бүтээн байгуулалтын тендерийг анх шалгаруулахад оролцсон албан хаагчдыг шалгаж байгаа. Заримыг нь бүр хорьж, цагдаад эхэлсэн байдаг. Тодруулбал, Авлигатай тэмцэх газрын мөрдөгчид хоёр долоо хоногийн өмнө Зам, тээврийн хөгжлийн яамны мэргэжилтэн, албан хаагчид болон бусад хүмүүсийн албан өрөө, гэрт нэгжлэг хийж, ЗТХЯ-ны Үнэлгээний хорооны гишүүн Л.Баянзулыг прокурорын зөвшөөрөлтэйгөөр цагдан хорьсон байдаг.

       Тэгвэл Дарханы замын хэргээр дахин нэг хүнийг цагдан хорих шийдвэр гарчээ. Тодруулбал, ЗТХЯ-ны Зам ашиглалтын газрын дарга асан Х.Оргил-Эрдэнийг цагдан хорих прокурорын зөвшөөрөл дөнгөж сая гарсан талаар эх сурвалж мэдээллээ. Х.Оргил-Эрдэнийг хууль хяналтын байгууллагаас шалгаж, удаа дараа байцаалт, мэдүүлэг авсан байдаг. Хууль бус ноцтой баримт илэрсэн учир түүнийг эрх мэдэл, албан тушаалын байдлаа урвуулан ашиглаж, бусдад илт давуу байдал үүсгэсэн гэх үндэслэлээр хорих шийдвэр гарсан байна. 

Ташрамд дурдахад, тэрбээр 2019 онд Улаанбаатар-Дархан чиглэлийн авто замыг барьж буй БНХАУ-ын гүйцэтгэгч компанийн Хятад иргэдээс их хэмжээний авлига авч байгаад үйлдэл дээрээ баригдаж, баривчлагдаж байсан билээ.