Иргэн Э автомашин ачилтын компанийн ажилтнуудад зодуулж, гэмтжээ. Тодруулбал, наймдугаар сарын 29-нд  “Тэс-19” автомашин ачилтын компанийн жолооч ачсан машиныхаа жолоочтой маргаж, хамрыг нь хугалжээ. Хохирогч Э манай редакцад хандаж, дараах тайлбарыг өгсөн юм.

-Юу болсон талаар та бидэнд тодорхой мэдээлэл өгөхгүй юу?

         -Машинаа ачуулдаг өдөр би том хүүгийн хичээлийн хэрэгслийг бэлдэхээр “Бөмбөгөр” худалдааны төв орсон юм. Тэр өдөр зах ачаалал ихтэй, хүн хөдөлгөөнтэй байсан. Зогсоол олдохгүй болохоор нь . Капитал центрийн зүүн талд зам дагуу машинаа байрлуулаад зах руу орсон. Тэр хэсэгт зогсохыг хориглосон тэмдэг тэмдэглэгээ байгаагүй. Магадгүй би олж хараагүй ч байж мэднэ. Надаас гадна олон жолооч машинаа байрлуулчихаад яваад өгсөн байсан юм. Тэгэхээр нь болох юм болов уу гэж бодсон. Зах руу ороод 10 минут ч болоогүй байхад танихгүй дугаараас нэг хүн залгаад “Машиныг чинь ачаад явчихлаа” гэж хэлсэн. Сандраад, гүйгээд очсон чинь машиныг минь аль хэдийн ачаад явчихсан байв. Тэгээд төд удалгүй “Та автомашины Баянбүрдийн тойрог, “Тэс-19” ХХК-ийн хашаанаас ирж авна уу” гэсэн мессеж ирсэн. Ирсэн хаягийн дагуу хүүгээ дагуулаад, хоёр буудал хэрээтэй газар яваад очсон чинь машиныг минь хэдийн оруулж ирээд, зогсоолд байрлуулчихсан байсан.

-Журмын хашаанаас машинаа авах үедээ жолоочтой нь маргалдсан юм уу?

          -Машин ачилтынхан ачихаасаа өмнө нь над руу залгах нь бүү хэл мессеж ч илгээгээгүй. Хажууд нь хараад зогсож байсан хүн залгаж хэлж байж би мэдсэн шүү дээ. Хамгийн инээдтэй нь тэнд олон машин байхад минийхийг сугалаад аваад явсанд гайхсан. Машин ачилтынхан хараад зогсож байдаг юм шиг байна лээ. “Хүүхдээ дагуулсан ядарсан эмэгтэй байна” гэж бодоод ганцхан миний машиныг аччихсан юм уу даа. Журмын хашаанд очоод үнэн учраа тайлбарлаж, “Машиныг минь гаргаад өгөөч, надад төлөх мөнгө байхгүй” гэж хэлсэн. Гэтэл журмын хашааны касс гэх хүн нь “30 мянган төгрөг төлөөд ав. Тэгвэл ганц удаа явуулъя” гэж хэлсэн. Би чинь хөгжлийн бэрхшээлтэй хүүхэдтэй, өрх толгойлсон эмэгтэй шүү дээ. Надад “30 мянга битгий хэл, 3500 төгрөг ч хэцүү байна” гэдгээ журмын хашааны хүмүүст хэлсэн. Тэгээд хэл ам болж, хэрүүл зодоон болсон юм. Ачилтын машины жолооч, мөнгө хураадаг касс хоёр нь намайг элбэж, хүч хэрэглэсэн. Кассын өрөөнөөс чирч, биед халдаж, хамрыг маань хугалсан. Хүч хэрэглэж байгаа касс залуугийн бичлэгийг хийсэн ч утсыг минь булааж аваад устгачихсан. Янз бүрээр хэлж, доромжилсон.

-Одоо таны бие зүгээр үү, хамар чинь яаж байна вэ?

        -Толгой, чих маш их өвдөж байна. Хамар маань хүн харахын аргагүй хавдаж, мурийж, хугарсан. Хагалгаанд орохоос өөр аргагүй болсон. Шүүх шинжилгээний дүгнэлт маргааш (өнөөдөр) гарна. Тэгээд дараагийн эмчилгээг хийж эхлэх байх. Залуучууд намайг чирч, өвдгийг маань мөргүүлсэн юм. Үүнээс болоод миний тархи толгой доргиж, чих маань шуугиад байгаа.

-Таны биед халдаж байхад өөр хүн байгаагүй юу?

           -Олон хүн хараад зогсож байсан. Хэн нь ч салгаж, хамгаалаагүй. Бүгд л жолооч, касс хоёрыг өмөөрөөд байсан. Түүнд маш их гомдож байгаа. Эмэгтэй хүн нохой шиг чирүүлж, тусламж гуйж байхад тэр олон хүний хэн нь ч туслаагүй шүү дээ. Машин ачилтынхан зөвхөн мөнгөний төлөө л улайрч, иргэдийн эрүүл мэнд, гоо сайханд ноцтойгоор халдаж, бүдүүлэг авирлаж байна.

-Та цагдаагийн байгууллагад хандсан уу?

         -Миний хамраас маш их хэмжээний цус гарч, нүүр янгинаад байсан учраас цагдаа, эмнэлэг дуудсан. Цагдаагийн албан хаагчид ирээд камерын бичлэг зэргийг үзээд явсан. Миний хамрыг гэмтээсэн хүнд хэрэг үүсгээд шалгаж байгаа. Одоогоор яг яах нь тодорхойгүй л байна.

-Ямар нэртэй компанийн жолооч, ажилтан байсан бэ. Та удирдлагуудад нь хандсан уу?

           -“Тэс-19” ХХК гэсэн байсан. Би дарга нартай нь уулзаагүй. Хуулийн байгууллагаар шалгуулж, үнэнийг тогтоолгоё гэж бодож байгаа. Намайг чирч, өвдөг мөргүүлж байгаа бичлэгийг цагдаа нар харсан учраас үнэн олдоно гэж бодож байна.

-Та журмын хашаанаас машинаа авч чадсан уу?

            -Авсан. Миний хамрыг хугалж, эрүүл мэнд, гоо сайханд минь ноцтойгоор халдчихаад тэр компанийнхан надаас 60 мянган төгрөг нэхсээр байгаад авсан. Касс нь “Алив мөнгө, мөнгөө” гээд нэхээд байсан шүү дээ. Тийм хүн чанаргүй байж болохгүй. Өчнөөн ядарсан иргэд амьдарч байгаа. Гэтэл ард иргэдийг шулж, халаасаа түнтийлгэж байна шүү дээ. Би өнөөдөр 60 мянган төгрөгөө төлөөд зогсохгүй эрүүл мэнд, гоо сайхнаараа хохирчихоод байна. Миний хамар шалчийсан, амьсгалж чадахгүй байгаа.

-Таныг зодсон хоёр хүн тантай уулзсан уу?

            -Үгүй. Тэднийг хүнийг ийм болгочихоод зүгээр ажлаа хийгээд явж байна. Журмын хашаанаас салснаас хойш нэг ч уулзаагүй байна. Би торгуулиа төлсөн. Компанитай ямар нэгэн байдлаар холбогдоогүй байгаа.

-Та хамар тэгшлэх хагалгаанд орох уу?

            -Тийм ээ, шүүх шинжилгээний дүгнэлт гарахаар хагалгаанд орно. Хэдийгээр хагалгаанд орох ч гэсэн миний хамар насаараа мурийх байвал яах вэ. Би үүнд үнэхээр их санаа зовж байна.