“Этик” продакшны жүжигчин А.Энхжингийн гэр бүл долоон настай хүүгээ сургалтын төвийн багшдаа зодуулж, гэмтсэн талаар цахим хуудастаа бичжээ. Тэд мөн цагдаагийн байгууллагад хандсан ч арга хэмжээ авч өгөхгүй байгаад гомдолтой байгаагаа илэрхийлсэн байна.

    Тодруулбал, тэрбээр “Багш хүн байж анги танхимдаа архи ууж хүүхэд хүчирхийлж болох уу. “Оюуны чадамж боловсролын төв”-д сурч байгаа долоон настай хүүгээ наймдугаар сарын 18-нд 14:00 цагт хичээлээс нь авах байсан юм. Сургалтын төвийн гадаа 13:20 цаг гээд очиход хүүхдийн минь хувцас шороо, шалбааг болсон, дух нь улайж уйлсан угтсан. Багшаас асуухад “Гурван  үг холбоод хариулах тэнхэлгүй хүү чинь ширээ мөргөсөн” гэж хэлсэн. Ингэж хэлэхэд амнаас нь архи ханхлаад “Багшаа, та согтуу байна шүү дээ” гэхэд үг дуугарсангүй. Сургалтын албанд нь мэдэгдэж, арга хэмжээ авч, хүүхдээс минь уучлалт гуйлгахыг шаардсан.

         Хүү минь хэлэхдээ “Ширээ мөргөөгүй багш хурууны нугалсан үеэрээ хэд хэд цохисон. Завсарлагаагаар бие засах гэтэл намайг дуудаж авч үлдээд “Ингээд чи дахиж манайд ирээрэй” гээд толгой руу нь хүчтэй цохисон гэсэн. Мөн багш халааснаасаа жижиг шилтэй юм гаргаж ирээд уугаад байсан тухай ч хэлсэн.

      Бид цагдаад өргөдөл өгсөн. Цаг гаран хүлээж гомдол өргөдлөө цохуулж нэг юм байцаагч томилсон ч “Гадуур ажилтай маргааш шийдэж өгнө” гэсээр зургаан хонолоо. Долоон настай хүү минь зодуулчихаад байхад тоохгүй, байцаагч нь сүүлдээ утсаа салгаад алга боллоо.  Хүүг минь зодсон багш эрүүлжиж, зугтаж гүрийсээр миний хүүхэд худалч ширээнд толгойгоо мөргөсөн болж хувирлаа. Манай гэр бүлийн зүгээс багшийг хүүтэй минь уулзаад, сайн ярилцаад, уучлалт гуйгаад өгөхийг л хүссэн. Хүү минь ирээдүйд багш гэдэг хүнээс айдаг болчихвол яах вэ. Айсандаа сургуульдаа явахгүй гэвэл яах вэ л гэж эмзэглэж байна. Ширээ мөргөсөн дух ийм болох уу” гэжээ.