Ерөнхийлөгчийн Тамгын газрын дэд дарга асан, МоАХ-ын Удирдах зөвлөлийн гишүүн Г.Байгалмааг Авлигатай тэмцэх газраас шалгаж эхлээд багагүй хугацаа өнгөрлөө. Өнгөрсөн хугацаанд түүнээс хэд хэдэн удаагийн мэдүүлэг, байцаалт авч, мөрдөн шалгах ажиллагааг үргэлжлүүлж байна. Түүнийг эрх мэдэл, албан тушаалын байдлаа урвуулан ашиглаж, бусдын гарын үсгийг дуурайлгаж зурсан, хуурамч бичиг баримт үйлдсэн байж болзошгүй үндэслэлээр хууль хяналтын байгууллагаас шалгаж байгаа. Тодруулбал, тэрбээр Ерөнхийлөгч асан Х.Баттулгын гарын үсгийг дуурайлган зурж, хуурамч бичиг баримт үйлдэн МоАХ-ны газрыг 15 тэрбум төгрөгөөр банкны барьцаанд тавьсан байж болзошгүй гэх.

       Өөрөөр хэлбэл, “Пирамид-Орд” ХХК нь Монголын Ардчилсан холбоо /МоАХ/-ны газрыг барьцаалж, Хөгжлийн банкнаас зээл авсан гэх мэдээлэл цацагдсан. Уг зээлийг Г.Байгалмаатай тэргүүтэй хүмүүс гардаж зохион байгуулсан байж болзошгүй ноцтой баримт хууль хяналтын байгууллагынхны гарт ирж, шалгалтын ажиллагааг эхлүүлсэн юм. Учир нь, тэрбээр МоАХ-ын газрыг барьцаанд тавих үеэр Ерөнхийлөгчийн Тамгын газрын дэд дарга, МоАХ-ын Удирдах зөвлөлийн нарийн бичгийн даргаар ажиллаж байсан билээ.

         Тэгвэл уг хэргийг нэмэлт мөрдөн байцаалтад шилжүүлж, дахин шинжээч томилж, шалгахаар талаар эх сурвалж мэдээллээ. Тодруулбал, МоАХ-ын Удирдах зөвлөлийн гишүүн Г.Байгалмаа Ерөнхийлөгч асан Х.Баттулгын гарын үсгийг дуурайлган зурж, бусадтай бүлэглэж хуурамч бичиг баримт бүрдүүлсэн эсэхийг дахин шинжээч томилж, шалгахаар болжээ.

        Ташрамд дурдахад, мөн Ерөнхийлөгч асан Х.Баттулгын удирддаг МоАХ ТТБ нь Э.Бат-Үүлийг Хотын дарга байх үед Хан-Уул дүүргийн 10 дугаар хороонд “Есөн мянга гаруй м.кв газрыг “МоАХ-ны ахмадуудад зориулсан орон сууц барина” гэх нэрийдлээр авсан байдаг. Ахмадуудад зориулсан газарт “Пирамид-Орд” ХХК нь “Буман залуус” хотхоныг барьж, Г.Байгалмаад 27 байр олгожээ. Г.Байгалмаа эрх мэдэл, албан тушаалын байдлаа урвуулан ашиглаж, ахмадуудын байрыг хувьдаа завшиж, танил талдаа олгосон байж болзошгүй нөхцөл байдал илрээд байгаа билээ. Уг үндэслэлээр мөн ялгаагүй түүнийг хууль хяналтын байгууллагаас шалгаж байгаа.

        Өөрөөр хэлбэл, МоАХ-ны ахмадуудад олгосон газарт “Пирамид-Орд” ХХК "Буман залуус" гэх орон сууцны хорооллыг барьсан гэсэн үг. Тус орон сууцнаас Г.Байгалмаа эрх мэдэл, албан тушаалын байдлаа урвуулан ашиглаж, 27 байрыг ах, дүү, амраг садандаа олгосон байж болзошгүй гэх.

Бид энэ талаар МоАХ-ын Удирдах зөвлөлийн гишүүн Г.Байгалмаагаас тодруулахад “Нэг удаа хууль хяналтын байгууллагад гэрчийн мэдүүлэг өгсөн. Өөр юм мэдэхгүй” гэсэн билээ. Г.Байгалмаа нь Х.Баттулгын үед Ерөнхийлөгчийн Тамгын газрын дэд даргаар томилогдон ажиллаж байсан. Мөн тэрбээр Барилга, хот байгуулалтын дэд сайд, МоАХ-ны Удирдах Зөвлөлийн гишүүн, Ардчилсан Намын Үндэсний Зөвлөлдөх Хорооны гишүүн, Ардчилсан эмэгтэйчүүдийн гүйцэтгэх зөвлөлийн гишүүн, УИХ-ын даргын зөвлөхөөр ажиллаж байсан англи, орос, герман хэлтэй гэх.