Дарханы замын бүтээн байгуулалтын тендерийг анх шалгаруулахад оролцсон албан хаагчдыг шалгаж байна. Заримыг нь бүр хорьж, цагдаад эхэлжээ. Тодруулбал, Авлигатай тэмцэх газрын мөрдөгчид өнгөрсөн долоо хоногт Зам, тээврийн хөгжлийн яамны мэргэжилтэн, албан хаагчид болон бусад хүмүүсийн албан өрөө, гэрт нэгжлэг хийсэн билээ. Нэгжлэгийн үеэр ноцтой баримтууд илэрч, зарим хүнийг цагдан хорих хүсэлтийг прокурор, шүүхэд хүргүүлсэн гэнэ.

     Дарханы замын ажлын явцтай Ерөнхий сайд Л.Оюун-Эрдэнэ өнгөрсөн зургадугаар сард танилцах үеэрээ “Санхүүжилтээ авсан хэр нь ажлаа хийхгүй байгаа компаниудыг Хятадын Төв Засгийн газарт нь мэдэгдэнэ. Мөн гүйцэтгэгч шалгаруулсан албан тушаалтнуудыг АТГ-д өгч шалгуулна. Ажлын гүйцэтгэлд АУДИТ оруулах саналыг Азийн хөгжлийн банканд тавина. Үндэсний ААН-үүдээ замын ажилд оруулж, намар гэхэд Дарханы замыг ашиглалтад оруулна" хэмээсэн билээ. Ерөнхий сайдын өгсөн үүргийн дагуу хууль хяналтын байгууллагынхан шалгаж, холбогдох хүмүүс шаардлагатай материал, бичиг баримтыг гаргаж өгч байгаа. Харамсалтай нь, ЗТХЯ-ынхан холбогдох албан материалыг заасан хугацаанд өгөхгүй, эрх мэдэл, албан тушаалаараа хаацайлж, шалгалтын ажиллагаанд нөлөөлсөн учир АТГ-ынхан прокурорт хандаж, зөвшөөрөл авснаар нэгжлэг хийсэн. Мөрдөгчид өнгөрсөн долоо хоногт буюу наймдугаар сарын 15-нд нэгжлэг хийж, тодорхой баримт, материалыг хураан авсан юм. Өнгөрсөн амралтын өдрүүдэд дахин хэд хэдэн хүний гэрт нэгжлэг хийж, заримыг нь цагдан хорьжээ.

        Тодруулбал, Зам, тээврийн хөгжлийн яамны Үнэлгээний хорооны гишүүн Ч.Сугармаа, Л.Баянзул нарын албан өрөө, гэрт нь нэгжлэг хийж, ноцтой баримтыг хураан авчээ, хууль хяналтын байгууллагынхан. Үүгээр ч зогсохгүй Үнэлгээний хорооны гишүүн Л.Баянзулыг прокурорын зөвшөөрөлтэйгөөр өнгөрсөн бямба гарагт 48 цагийн хугацаатай цагдан хорьсон талаар эх сурвалж мэдээллээ. Л.Баянзулыг тендер бусниулсан үндэслэлээр цагдан хорьсон гэнэ. Мөн ЗТХЯ-ны Автозамын газрын дарга Б.Оюундэлгэр, Авто замын бодлогын хэрэгжилтийг зохицуулах газрын дарга Д.Доржханд нарыг цагдан хорих хүсэлт хүргүүлсэн ч шүүхээс хорих шийдвэр гаргахаас татгалзжээ.  Хууль хяналтын байгууллагынхан авлига авсан байж болзошгүй баримт илэрсэн ч хорих шийдвэр гаргаагүй гэнэ. Иймд дахин хүсэлт өгөөд байгаа талаар эх сурвалж мэдээлж байна.

         Авто замын бодлогын хэрэгжилтийг зохицуулах газрын дарга Д.Доржханд нь “Ялгуулсан” ХХК-аас 200 сая төгрөгийн хахууль авсан байж болзошгүй хэрэгт холбогдож байсан билээ. Тодруулбал, “Ялгуулсан” компанийн захирал Лхамжавын Санжаадорж нь сайд асан Д.Ганбаттай нэр холбогдон Эрүүгийн хэрэгт яллагдагчаар татагдаж байсан удаатай. Зам тээврийн хөгжлийн сайд асан Д.Ганбат нар 420 сая төгрөгийн хохиролтой, 200 сая төгрөгийн хахуулийн хэрэгт холбогдсон байдаг. Энэ хэргийг сайд асан Д.Ганбатын хамаарал бүхий Д.Доржханд гүйцэтгэсэн байж болзошгүй гэх хүртэл яриа байдаг. Түүнийг эрх мэдэл, албан тушаалын байдлаа урвуулан ашиглаж, автозамын компаниудын дунд тендер зарлахдаа бусдад илт давуу байдал олгож, авлига авсан гэх үндэслэлээр цагдан хорьж, хэргийг нь прокурорт шилжүүлж байсан юм.