Өмнөговь аймагт байрлах Зэвсэгт хүчний 167 дугаар ангид алба хааж байсан, хугацаат цэргийн албан хаагч 19 настай Н нь амиа алдаж, баригдаж байсан барилгын хажуугаас цогцос нь олдсон хэрэг гарсан. Тус ангийн штабын дарга З.Баяраа эрх мэдэл, албан тушаалын байдлаа урвуулан ашиглаж, өөрийн танил болох “Галтууд” ХХК-ын захирал Д.Төрбаяр, Б.Баярчимэг нарт 10 цэрэг гаргаж өгсөн гэх.

Бид энэ хэргийн талаар “Галтууд” ХХК-ийн гүйцэтгэх захирал Б.Баярчимэгээс тодрууллаа.

       “Бидэнд Эрүүгийн хэрэг үүсгээгүй. Гэрчийн мэдүүлэг өгсөн. Цэргүүд яагаад манай компанид ажиллаж болдоггүй юм бэ. Бүх хүн л цэргүүдийг ажиллуулж байдаг шүү дээ. Бид төлбөр тооцоог нь хийгээд, зөвшөөрөл аваад, гэрээ хийсэн байсан. Байнга л ийм журмаар ажилласаар ирсэн. Та нар боддоо, бид зөвшөөрөл авахгүйгээр цэргүүдийг ажиллуулж, ангийн хашаагаар нь давуулаад, гэртээ 20 хоног байлгана гэж үү. Бүх юм дүрэм, журмын дагуу явагдсан. Цэргүүд манайд сарын хугацаатай ажиллах гэрээ байгуулсан байсан. Бид нэг цэргийг өдрийн 50 мянган төгрөгөөр ажиллуулж, төлбөрийг нь цэргийн ангийн данс руу шилжүүлсэн байсан. Хэрэг болох үед наадмын амралт таарсан учраас цэргүүдийг гэртээ амрааж байсан. Ийм хэрэг болж, айлын сайхан хүү амиа алдсанд харамсаж байна. Ар гэрийнхэнд нь хэцүү байгааг ойлгож, маш их шаналж байна. Санамсаргүй болсон энэ хэрэгт бид харамсаж, сэтгэл санааны хямралд ороод байна. Амиа алдсан хүүг бид алга болсныг өглөө нь мэдсэн. Хэрэг юунаас болж гарсныг бид үнэхээр мэдэхгүй байна. Амиа алдсан цэрэг өмнө нь манайд ажиллаж байсан. Төлөв даруу, ажилд сайн хүү байсан. Бидний хооронд ямар нэг эвгүй харилцаа, үл ойлголцол байгаагүй” гэв.