Зэвсэгт хүчний 167 дугаар ангийн хугацаат цэргийн албан хаагч нас барсан хэрэг гарсан. Тодруулбал, ангийн байрлалд бус хувийн аж ахуйн нэгжийн хармагийн талбайд зэрлэг зулгаахаар явсан 10 байлдагчийн нэг нь учир битүүлгээр амиа алдаад байна. Тус ангийн штабын дарга З.Баяраа дур мэдэн, өөрийн танил болох “Галтууд” ХХК-ийн хармагийн талбайд цэргүүдийг ажиллуулсан байдаг. Ингээд 10 байлдагчийн нэгийнх нь цогцос баригдаж байсан барилгын хажуугаас олдоод байгаа билээ. Хэргийн газраас хяналтын камерын бичлэг, цустай хутгыг эд мөрийн баримтаар хураан авч, шалгалтын ажиллагааг үргэлжлүүлж байна. Мөн хууль хяналтын байгууллагаас ангийн захирагч Ж.Амаржаргал, Штабын дарга З.Баяраа нарыг эрх мэдэл, албан тушаалаа урвуулан ашигласан байж болзошгүй үндэслэлээр шалгаж байгаа. Түүнчлэн цэргүүдийг хууль бусаар ажиллуулсан “Галтууд” компанийн захирал Д.Төрбаяр, гүйцэтгэх захирал Б.Баярчимэг нарыг шалгаж байгаа.

Бид энэ хэргийн талаар “Галтууд” компанийн гүйцэтгэх захирал Б.Баярчимэгээс тодруулахад “Би Баярчимэг мөн байна. Гэхдээ мэдээлэл өгөхгүй” хэмээгээд утсаа салгасан юм.