Завхан аймгийн Эрдэнэхайрхан сумын Засаг дарга А.Балжир Завхан аймгийн Гэр бүл, хүүхэд, залуучуудын мэргэжилтнийг зодож, танхайрсан гэх мэдээлэл цахим сүлжээнд цацагдаад байна. Тодруулбал, хамгаалалтын хувцасгүй, найман нас хүрээгүй хүүхдийг уралдааны морь унуулахгүй гэх шаардлага тавьсан мэргэжилтнийг Засаг дарга нь зодож, ёс бус үйлдэл гаргасан гэх.  

            Бид энэ талаар Эрдэнэхайрхан сумын Засаг дарга А.Балжираас тодрууллаа. Тэрбээр “Би аймгийн Гэр бүл хүүхэд, залуучуудын хөгжлийн газрын мэргэжилтнийг зодоогүй. Тухайн өдөр би их насны морьдын уралдаан үзэхээр гарааны зурхайд очсон юм. Хүүхдүүдийг бүртгэж, гарааны зурхайд гаргаж байх таарсан. Гэтэл нэг морийг цээживч байхгүй гэх шалтгаанаар замд гаргаагүй. Ганцаараа үлдчихээр нь хүүхдийг нь өрөвдөөд, хүний хөдөлмөрийг үнэлээд “Энэ морийг замд гаргачих” гэж хэлсэн. Тэгээд цулбуурыг нь татах явцад мэргэжилтэн залууг хальт түлхчихсэн юм. Гэтэл одоо намайг зодож, танхайрсан гэж гүтгэж байна лээ. Би аймгийн цагдаагийн газарт өргөдөл гаргаж, шалгуулна. Хэрэв тэр залуу надад зодуулаад гэмтэл авсан бол гэмтлийн зэргийг нь тогтоолгоно. Сошиалаар худал мэдээлэл тарааж, “Таван нас хүрээгүй хүүхдийг уралдуулсан. Өөрийнх нь хамаарал бүхий морь байсан. Зэрлэгээр зодож, гэмтэл учруулсан” гэж ярьсан байна лээ. Үнэндээ, тэр унаач хүүхэд 12 настай байсан юм билээ. Би танихгүй, аав, ээж, уяачийг нь ч мэдэхгүй. Манай зэргэлдээх сумаас ирсэн гэсэн. Би бүртгэлийг нь шалгаад, Гэр бүл, хүүхэд, залуучуудын газарт хандана. Ямар шалтгааны улмаас ингэж байгааг үнэхээр ойлгохгүй байна. Мэргэжилтэн залуу тухайн морины эзэнтэй хувийн таарамжгүй харилцаанаас болж уралдуулахгүй гэсэн байж болзошгүй. Хэл ам болсон морь нь зэргэлдээх суманд сайн уралдаж байсан юм билээ” гэв.