Алтанбулагийн боомтоор өнгөрсөн аравдугаар сарын 14-нд орж ирсэн иргэн Н тусгаарлалтын байрнаас оргосон хэрэг гарчээ. Тодруулбал, иргэн Н нь Сэлэнгэ аймгийн нэгдсэн эмнэлэгт тусгаарлагдаж байх үедээ буюу уржигдар тусгаарлалтын байрнаас оргосон ч холбогдох албаныханд хэдэн цагийн дараа баригджээ. Тэрбээр оргох үедээ дээлтэй байсан бөгөөд түүнийг олохын тулд албаныхан замаар дайран өнгөрч буй болон Сэлэнгээс гарч байгаа машин бүрт шалгалт хийсэн гэнэ.

         Энэ талаар албаны эх сурвалжаас тодруулахад “Тусгаарлалтын байрнаас оргох гэж оролдсон хүн нь Төв аймгийн харьяат, эрэгтэй. Ямар шалтгаан нөхцлөөс болж оргохыг завдсан тухай тодорхой мэдээлэл надад ирээгүй байна. Ямар ч байсан түүнийг цаг алдалгүй барьж авсан. Уг нь тусгаарлалтын хугацаа нь маргааш дуусах юм билээ. Одоогийн байдлаар тухайн хүний сэтгэл санаа хэвийн тусгаарлалтын байрандаа байгаа. Түүнээс коронавирусийн шинжилгээ гурван удаа авахад хариу нь сөрөг гарсан” гэлээ.