“Эрэн хайж байна, туслаарай. Миний эгч энэ сарын 2-ны өдөр Чингэлтэй дүүргийн есдүгээр хороо,Тасганы овоонд байрлах гэрээсээ гараад ор сураггүй алга болчихлоо. Эгч маань туранхай, 165 см өндөртэй хүн байгаа” гэх зарыг нэгэн эмэгтэй өнгөрсөн гуравдугаар сард цахим сүлжээнд оруулсан байдаг. Түүнтэй холбогдож, тодруулахад “Эгч маань гурван хүүхэдтэй. Хүүхдүүд нь тусдаа гараад, нөхөртэйгөө цуг амьдардаг байсан юм. Гуравдугаар сарын 2-нд хүргэн ах маань ажилдаа явахаар гарсан гэсэн. 24 цагийн ээлжийн ажилтай учраас маргааш нь буюу гуравдугаар сарын 3-ны 11:00 цагт гэртээ ирсэн юм билээ. Ахыг гэртээ ирэхэд эгч байгаагүй гэсэн. Өмнөх өдөр нь ахыг гэрээсээ гарахад гэртээ үлдсэн гэсэн. Тэгээд бид бодохдоо гуравдугаар сарын 2-нд гэрээсээ гарсан болов уу гэж бодож байгаа. Яг хэдэн цагт гэрээсээ гарсан, ямар хувцастай явсныг нь ч мэдэхгүй байна. Хэнтэй ч утсаар яриагүй. Утас нь дуудаад байгаа хэрнэ огт авахгүй байгаа” хэмээж байсан юм.

Тэгвэл бид өчигдөр түүнтэй холбогдож, эгчийгээ олсон эсэх талаар тодрууллаа. Тэрбээр “Эгчийгээ эсэн мэнд олсон. Эгч маань бидэнд хэлэхгүйгээр хөдөө явчихсан байна лээ. Санаа зовж, хайлцаж өгсөн бүх хүнд баярлалаа” гэв.