Ховд аймгийн Дарви сумын хэсгийн төлөөлөгч М нь бага насны хүүхдийг гавлаж, эрүү шүүлтэд оруулсан гэх хэргийн талаар бид өмнө мэдээлсэн. Хэргийн талаар охины ээж О ярихдаа “Цагдаагийн албан хаагч М гэгч нь 13 настай охиныг минь 24 цаг гавлаж, унадаг дугуй хулгайлсан хэрэгт гүтгэж, буу тулгаж, хоолойг нь боож, чихнийх нь ээмгийг хугартал алгадсан байна лээ. Охиныг минь хууль бусаар саатуулж, 24 цаг тамласан цагдаагийн дэслэгч М-д маш их гомдолтой байна. Цагдаагийн эхнэр Ж над руу залгаж, элдэв бусаар хэлж байна лээ. “Унадаг дугуй гаргаж өг” удаа дараа дарамталж, сүрдүүлсэн” гэсэн юм.

Энэ хэргийг цагдаагийн байгууллагаас шалгаж, албан хаагч М-ийг яллагдагчаар татсан гэх мэдээлэл байгаа билээ.

         Бид хэргийн одоогийн нөхцөл байдлын талаар охины ээж О-той дахин холбогдож, тодрууллаа. Тэрбээр “Хэрэг ямар шатандаа яваа нь тодорхойгүй байгаа. Охиныг минь унадаг дугуйны хэрэгт эрүүдэн шүүсэн цагдаа М нь ажлаа хийгээд явж байна лээ. Сэргийлэхээс түүнийг шалгаж, шүүхэд шилжүүлсэн гэж сонссон. Гэхдээ бидэнд тодорхой мэдээлэл өгөөгүй байгаа. Юу болж байгаа нь тодорхойгүй байна. Хулгайд алдсан унадаг дугуйгаа олсон эсэхийг ч мэдэхгүй. Цагдаа М-тай уулзахаар гэхээр хүнийг нүүр харж чадахгүй, яваад өгдөг. Охины минь биеийн байдал болон сэтгэл санаа дээрдэж, хэвийн болсон. Сургууль нь амарсан учраас хөдөө явсан” гэлээ.