Аймгуудын Байгаль орчны газар, сумдын ойн ангийнхны цэвдэг хүйтэн сэтгэл, мөнгөний төлөө сүнсээ ч худалдаж мэдэх шунал Монголын ойн санг дуусгаж, хэдхэн жилийн дараа ой мод байсан газрын хөрсийг нь үнэрлээд, шороонд булагдаж суух эмгэнэлтэй, гашуун түүхтэй  ирээдүйг хойч үедээ үлдээхээр улайран дайрч байгаа. Монголын ойн сангийн эрлэг, жинхэнэ модны хулгайчид нь ойн ангийнхан болсон талаарх ноцтой баримтыг Эргэлт.мн мэдээллийн Эрэн сурвалжлах нэгдлээс өнгөрсөн дөрөвдүгээр сард хүргэсэн байдаг. Тодруулбал, хууль хяналтын байгууллагынхан Сэлэнгэ аймагт ажиллаж, тус аймгийн Байгаль орчин, аялал жуулчлалын газрын харьяа Сэлэнгэ бэлчир, Ерөө, Хараа, Орхон, Хүдэр бүсийн таван ойн ангид хяналт, шалгалт хийсэн. Шалгалтын хариу тун тоогүй гарч, олон зөрчил илэрснийг бид баримттайгаар хүргэсэн. Байгаль орчны хяналтын улсын байцаагч нарын 2019-2021 онд Ойгоос мод бэлтгэх журам, мод модон материалд гарал үүслийн гэрчилгээ олгох журмуудын хэрэгжилт, түүнд тавих хяналтын ажил хуулийн дагуу явагдаж байгаа эсэхэд хяналт, шалгалтыг биечлэн хийхэд зөрчилгүй  ойн анги гэж алга байсан юм.

Бидний сурвалжилгын мөрөөр Экологийн цагдаагийн албанаас хэвлэлийн бага хурал зарлаж, Байгаль орчин, аялал жуулчлалын сайд Б.Бат-Эрдэнэ анхааралдаа авч, шалгалтын ажиллагаа явуулах үүрэг өгснөө мэдэгдэж байлаа.

        Тэгвэл бид шалгалтын ажиллагаа хэрхэн явагдаж байгаа талаар тус салбарын сайд Б.Бат-Эрдэнэтэй холбогдож, тодруулахад “Танай сайтын гаргасан мэдээллийн мөрөөр Ажлын хэсэг ажиллаж, хууль хяналтын байгууллагаас ойн ангийн гурван дарга, инженер нарын 13 хүнд эрүүгийн хэрэг үүсгээд шалгаж байна. Мөн бүх аймаг, сумын ойн ангийн дарга, ажилтнуудад анхааруулж хэлсэн” гэлээ.