Өнгөрсөн тавдугаар сарын 27-нд Үндэсний цэцэрлэгт хүрээлэнгийн урд талд байрлах “Ханталст” компанийн эзэмшлийн газарт байрлах тогтоол усанд дөрвөн хүүхэд осолдож, амиа алдсан харамсалтай хэрэг гарсан. Гэвч хэрэг өнөөдрийг хүртэл шийдэгдээгүй байна. Одоогоор хэрэг мөрдөн байцаах шатандаа явж байгаа аж. Асуудлыг бид газар дээрээс нь сурвалжилж, дөрвөн хүүхдийн ар гэр болон “Ханталст” компанийн удирдлагатай уулзлаа. Ар гэрийнхний мэдээлж буйгаар “Осол чухам юунаас болж гарсан гэдгийг тодорхойлоогүй. Усыг нь шинжилж байгааг цагдаагийн газраас мэдээлж байгаа. Ослын дараа компанийн Төлөөлөн удирдах зөвлөлийнхөн оршуулгын зардал гэж тус бүр хоёр сая төгрөг өгснөөс өөрөөр холбогдоогүй. Ер нь хэргийг шалгах явц удаашралтай байгаад гомдолтой байна” гэлээ.

Харин “Ханталст” ХХК-ийн ерөнхий захирал Ш.Бат-Энх “Тухайн үед манай компани үйл ажиллагаагаа түр зогсоогоод байсан юм. Учир нь, Улаанбаатар цахилгаан түгээх сүлжээ ТӨХК-ийн шугамын доогуур барилга байгууламж барьж болохгүй гээд ажил зогсоосон. Энэ үеэр дөрвөн хүүхэд амиа алдсан хэрэг гарсан. Гэтэл биднийг хууль  дүрэмгүй, зөвшөөрөлгүй барилга барьсан гээд байгаа. Бид бүх зөвшөөрөл бичиг баримтаа авчихсан байсан. Бид хүүхдүүд амиа алдсан хэрэгт харамсаж байгаа. Ослын дараа манай компаниас төлөөлөл явж айлуудаар нь орсон. Ингээд оршуулгын зардалд хүүхдийн тоогоор тус бүр хоёр сая төгрөг өгсөн. Би хүүхдүүдийн аав, ээжээс эмээгээд уулзаагүй. Бусад асуудлыг нь би сайн мэдэхгүй байна. Үүнээс хойш надтай нэг ч хүн ирж уулзаагүй. Хүний амийг мөнгөөр үнэлчихдэг гэсэн ойлголт байхгүй. Бид хууль хяналтын байгууллагаас ямар шийдвэр гаргана бүгдийг нь хэрэгжүүлэх болно. Мөн манай компанийн үйл ажиллагааг зогсоох шийдвэр гарсан байсан гэдэг нь худал. “Ханталст” компанийн үйл ажиллагааг цуцлах албан бичиг ирээгүй. Харин хэрэг гарсны маргааш МХЕГ-аас албан бичиг ирсэн” гэв.