Өмнөговь аймаг дахь хилийн 0166 дугаар ангийн хариуцсан ... дугаар тэмдэгтээр Монгол Улсын хоёр, БНХАУ-ын нэг иргэн нэвтэрч, хил зөрчсөн хэрэг гарсан байдаг. Тодруулбал, өнгөрсөн оны дөрөвдүгээр сарын 10-11-нд шилжих шөнө гурван хүн Монгол Улсын талаас БНХАУ руу хууль бусаар зорчсоныг хилийн 0166 дугаар ангийн манаанд гарч байсан хилчид илрүүлсэн юм. Хилийн манааны ахлагч хил зөрчсөн иргэдийн мөрийг илрүүлсэн даруйдаа буюу дөрөвдүгээр сарын 11-ний 08:00 цагт ангийн удирдлагууддаа мэдэгдсэн. Харин хилийн 0166 дугаар захирагч Б.Мөнхбат энэ тухай мэдээллийг Хил хамгаалах ерөнхий газарт 14:30 цагт мэдэгдсэн гэх тухай мэдээлэл тухай үед цацагдаж байлаа.

Тус ангийн захирагч Б.Мөнхбат нь хууль бусаар хилээр нэвтэрснийг цаг алдаж мэдээлсэн, ингэхдээ нуун дарагдуулсан байж болзошгүй нөхцөл байдал илэрсэн билээ.

Эх сурвалжийн мэдээлж буйгаар “Гурван хүн хилийн торон хаалтад тулж очсон. Ингэхдээ гурвуулаа явсан гэдгээ нууцалж, нэгийгээ үүрч явсан бололтой байсан. Тэгээд хилийн зурваст очоод үүрч явсан хүнээ хил давуулж, хоёр нь буцсан байгаа юм. Хууль бусаар хил давсан иргэн нь дөрөвдүгээр сарын 11-ний 01:00 цагийн орчимд БНХАУ-ын хилчдэд саатуулагдсан байна лээ. Тодруулбал, манай улсын хоёр иргэн БНХАУ-ын нэг иргэнийг үүрч, хилийн зурваст хүргээд, хууль бусаар хил давуулсан гэсэн үг. Энэ нь хууль хяналтын байгууллагын шалгалтаар тогтоогдож, тухайн хоёр иргэнийг дөрөвдүгээр сарын 11-ний 16:00 цагийн орчимд Өмнөговь аймгийн нутаг дэвсгэрээс саатуулсан гэсэн” гэж байсан юм.

Үндэсний аюулгүй байдалд занилхийлсэн уг хэргийг Тагнуулын ерөнхий газраас шалгаж байсан билээ. Тэгвэл хэрэг хэрхэн шийдэгдсэн талаар Өмнөговь аймаг дахь хилийн 0166 дугаар ангийн захирагч асан Б.Мөнхбатаас тодрууллаа.

        Тэрбээр “Хилээр хууль бусаар хүн нэвтрүүлсэн хэргийг шалгаад дууссан байх. Надтай холбогдолгүй гэдэг нь тогтоогдсон. Миний бие Өмнөговь аймаг дахь хилийн 0166 дугаар ангийн захирагчийн албанаасаа бууж, Улаанбаатар хотод томилогдон ажиллаж байна. Миний буруу биш учраас хариуцлага хүлээлгээгүй. Өөрөөр хэлбэл, БНХАУ-ын нэг иргэнийг хууль бусаар хил нэвтрүүлсэн нь надтай холбоогүй" гэлээ.