Хөвсгөл аймгийн Мөрөн сумын ерөнхий боловсролын сургуулийн хоёрдугаар ангийн сурагч алга болжээ. Тодруулбал, найман настай О гэх охин өнөөдөр хичээлдээ яваад ор сураггүй алга болсон байна. Энэ талаар түүний ар гэрийнхэнтэй холбогдож, тодрууллаа.

-Охин хэдэн цагийн орчимд гэрээсээ гарсан юм бэ?

         -Манай дүүгийн хүүхэд байгаа юм. Эмээтэйгээ цуг байдаг байсан. Өдөр 13:00 цагийн үед “Хичээлдээ явлаа” гээд гэрээсээ гарсан байна лээ. 14:00 цаг арай болоогүй байхад сургуульдаа очсон. Охиныг очиход ангийн багш нь байгаагүй, ангийнх нь хоёр охин байсан гэсэн. Цүнхээ тавиад, “Эгчтэйгээ уулзахаа явлаа” гээд ангиасаа гарсан байна лээ. Тэгээд л ор сураггүй алга болчихлоо. Одоо хүртэл ямар ч сураг гарахгүй байна.

-Эгчтэй уулзсан юм уу?

          -Эгч нь тавдугаар ангид сурдаг. Эгчтэйгээ уулзаагүй, манай гэрт ирээгүй. Эгч нь манай гэрт, алга болсон охин эмээгийндээ байдаг байсан. Бид өдрөөс хойш хайгаад олохгүй байна.

-Цагдаагийн байгууллагад хандсан уу?

        -Дөнгөж сая буюу 20:00 цагийн үед цагдаад мэдэгдлээ. Охин өмнө нь нэг удаа хөдөө гэр рүүгээ гүйгээд явчихсан байсан юм. бид энэ удаад ч хөдөө гэр рүүгээ явж гэж бодоод хоёр машинтай гэр рүү гарсан. Гэрт нь очиход очоогүй, замд байхгүй байна. Хөдөө гэртээ очоогүй болохоор нь сандралдаад сумынхаа группт зар тавиад, цагдаад хандлаа. Аав, ээж хоёр нь малчин, сургуульдаа сурах дургүй. Гэр рүүгээ л явах гээд байдаг юм. Одоо орой болчихлоо, нохой, шувууны хоол болох вий, хөлдөж, осгох вий гэж үнэхээр айж байна.

-Хөдөө гэр нь хэр хол юм бэ?

        -Гэр нь сумын төвөөс 50 орчим километрийн зайтай байдаг. Өдөржин хоёр машинтай хайгаад, замаасаа олсонгүй. Хөдөө гэр нь сүлжээгүй болохоор аав, ээжтэй нь холбогдож чадахгүй байна.

-Өмнө нь гэр рүүгээ явахдаа явган явсан юм уу?

        -Тийм ээ, замаасаа замын машин гуйгаад суугаад явсан байсан. Хөвсгөлчүүд та бүхнийг дүүг минь олоход туслахыг чин сэтгэлээсээ хүсэж байна. Наймхан настай нялх амьтан хээрийн амьтны хоол болох вий гээд бид тайван ч сууж чадахгүй хэцүү байна. Зургаа, долоон цаг сураг нь гарахгүй байна.