Өнгөрсөн таван жилийн хугацаанд амиа алдсан байлдагч нарын хэргийг эргэн сануулж байна. Арми тавхан жилийн хугацаанд жирийн иргэнээ бус, “Жинхэнэ цэргийн албан хаагч, эр хүн болно” хэмээн цэргийн албанд мордсон арван НАЙМАН хүүгийн амийг авч оджээ. Цэргийн дэглэлт, чанга хатуу байх дүрэм байлдагч нарын амийг тасалж, арван аав, ээж намрын намар, хаврын хавартаа халагдах цэргийн цуваанд харцаа нуун тэмтчиж явна. Бид зөвхөн Зэвсэгт хүчний анги, байгууллагуудад алба хааж байсан, олны мэдэх байлдагч нарын хэргийг сануулж буй. Дараагийн удаад хилийн цэрэгт амиа алдсан олон арван аавын хүүгийн гашуун хэргийг тоймлон хүргэх болно.

100 жилийн түүхтэй Зэвсэгт хүчин зүй бусаар, зуурдаар таван жилийн хугацаанд найман байлдагчийн амиар тангараг өргөжээ. Харамсалтай. Гашуудалтай.

БАРИМТ: 2017.08.27

         Ховд аймгийн Мянгат сумын Цагаанбулаг багийн нутаг дэвсгэр Оросын тохой гэдэг газарт гурван цэрэг усанд осолдсон харамсалтай осол гарч байлаа. Ховд голын усанд Зэвсэгт хүчний 123 дугаар ангийн алба xaaгч С, Б, Е нар осолдсон тухай мэдээлэл онцгой байдлын албанд ирж байсан юм. Тус ангийн хугацаат цэргийн алба хаагчид 2017-2018 оны өвөлжилтийн бэлтгэлийг хангах ажлын хүрээнд ангийнхаа туслах аж ахуйн хадланг бэлтгэж байгаад усанд осолдож, гурван аавынх хүү цэргийн албанд мордоод таван сарын дараа байлдагчаас бурхны орон руу шилжиж байсан харамсалтай хэргийг монголчууд одоо ч мартаагүй байгаа.

2018 он.

            Зэвсэгт хүчний 123 дугаар ангийн байлдагч, 19 настай залуу мөн л энэ онд амиа алдаж байлаа. Талийгаач залуу цэргийн дэглэлт даалгүй нас барсан гэх мэдээлэл тухай үедээ цацагдаж байсан тэгс хийгээд намдсан байдаг. Байлдагчийн хэрэгт хэн, ямар хариуцлага хүлээсэн нь одоо ч тодорхойгүй, хаалттай хэвээр байна.

БАРИМТ: 2019.01.22

           Дорноговь аймгийн Зүүнбаян дахь Зэвсэгт хүчний 336 дугаар ангид алба хааж байсан байлдагч 19 настай А амиа алдсан хэрэг 2019 оны нэгдүгээр сарын 22-нд гарсан байдаг. Талийгаачийн нурууны зургийг ах нь цахим сүлжээгээр ил болгосноор цэргийн харгис дэглэмийн уршгаар нас барсан байж болзошгүй гэх хардлага олон нийтэд бий болсон юм. 19 настай, ээжтэйгээ амьдардаг байсан хүү дурлаж, цэргийн албанд мордоод ээждээ эргэж ирээгүй. Энэ хэрэгт хэд хэдэн хүнийг шүүж, ар гэрийнхэнд буцлалтгүй тусламж олгох шийдвэр гарсан ч талийгаачийн ах дүүгийнхээ амийг нэхсээр байна гэдгээ илэрхийлсэн байдаг.

2019.09.18

            Дорнод аймагт байрлах Зэвсэгт хүчний 327 дугаар ангийн байлдагч, 19 настай Н нь намрын ажилд явж байхдаа машин дээрээс унаж, амиа алдсан байдаг. Тодруулбал, цэргүүдийг өвс авч явсан машины тэвшин дээр суух үүрэг өгч, байлдагч Н хөл алдаж унасан гэдэг. Цэргүүд Чойбалсан хотын Өлзийт гэх газар хадлан бэлтгэж байсан юм. Энэ хэрэгт үүрэг өгсөн салаан захирагчийг буруутгаж, шүүх хурал нь болсон билээ. Гэсэн хэдий ч талийгаачийн ар гэрийнхэн хүүгийнхээ амийг нэхэмжилж тэмцсээр байгаа юм.

2021.03.29

               Зэвсэгт хүчний 326 дугаар ангийн салаан захирагч Д.Гялбуужамц архидан согтуурсан үедээ хугацаат цэргийн алба хаагч, 21 настай Б-г зодож, амийг нь хөнөөсөн хэрэг 2021 оны гуравдугаар сарын 29-нд гарсан юм. Байлдагч Б Энэтхэг Улсад дөрвөн жил сурч, ковидын үед эх орондоо ирээд байхдаа цэргийн алба хаах шийдвэрийг гаргасан байдаг. Талийгаач цэргийн албанд мордоод таван сарындараа цэргийн даргадаа зодуулж, ухаангүй хоёр хоног эмнэлгийн орон дээр тарчилж,  аав, ээж, ах, дүүгээ, санан санан ирсэн эх орноо үүрд орхисон юм. Хүүгээ дарамтад байсан байж болзошгүй, хэд хэдэн удаа мөнгө нэхэж байсан талаар түүний ээж ярьдаг билээ. Хугацаат цэргийн алба хаагчийг зодож, амийг нь хөнөөсөн ахлагч Д.Гялбаажамцыг шүүж, 14 жилийн хорих ял оноосон байдаг. Мөн түүнд холбогдох хэргийн Давж заалдах шатны шүүх хурал болсон Анхан шатны шүүхийн шийдвэрийг хэвээр үлдээсэн билээ.

2021.06.06

             Дорнод аймагт байрлах Зэвсэгт хүчний 327 дугаар ангийн байлдагч Б амиа алдсан хэрэг өнгөрсөн оны зургадугаар сарын 6-нд гарч байв. Талийгаач 19 настай бөгөөд өнгөрсөн аравдугаар сард цэргийн албанд татагдан очоод байсан юм. Амиа алдсан байлдагчийн үхэл гаднын нөлөөгүй, эрүүл мэндийн шалтгаантай гэх дүгнэлт урьдчилсан байдлаар гарсан гэдэг. Байлдагч өдрийн хоолонд орсны дараа биеийн байдал муудаж, эмнэлгийн тусламж авч чадалгүй нас барсан юм.

Энэ бол зөвхөн амиа алдсан, олонд мэдэгдсэн хэргийн тоо. Үүний цаана эрүүл мэндээрээ хохирсон олон аавын хүү бий. Тухайлбал, цэргийн алба хаахаар мордсон идэр насны залуу цэргийн дэглэлт, албан хаагчийн зүй бус харилцаа, хандлагын улмаас хөлийнхөө есөн хурууг тайруулж байсан. Мянга мянган албан хаагч ажиллаж, амьдралаа залгуулдаг уг салбарын нэр хүндийг шороотой хутгаж, ааг бяраа аавын нялх үрсэд, эх орны хөвгүүдэд гаргадаг албан хаагчдад хатуу арга хэмжээ авч, цэргийн албыг цэргийн алба шиг дараагийн 100 жил эхэлж байгаа гэж найдъя.