Чингэлтэй дүүргийн XIX хороо буюу Шадивлангийн эцэст өнгөрсөн зургадугаар сард автобус осолдож, жолооч нь хүнд бэртсэн хэргийг бид сурвалжлан хүргэсэн билээ. Тухайн автобус нь “Тэнүүн-Огоо” ХКК-ийн автобус байсан юм. Хэргийн дараа компанийнхан “Жолоочийнхоо эрүүл мэндийг анхаарна” гэж байсан ч хачир дээрээ хэлснээсээ буцаж, хариуцлага хүлээхээс бултаж байна. Автобус осолдсон шалтгаан нь техникийн бүрэн бүтэн байдлыг хангаагүйн улмаас үүссэн гэдгийг эх сурвалжууд мэдээлсэн. Гэтэл тус компанийнхан жолоочийнхоо амь насыг эрсдэлд оруулчихаад хариуцлага хүлээлгэх ёстой ажилтнуудаа хаацайлж, хамгаалж байгаа нь харамсалтай.

Нялх үрээ хоёр ой ч хүрээгүй байхад нь ажилдаа орсон жолооч эмэгтэй ердөө гуравхан хоногийн дараа осолдож, өнөөдрийг хүртэл ухаангүй шахам эмнэлэгт буй. Тухайн өдөр жолооч Буянхишигийн автобус хашлага мөргөж, засварын инженер Д.Гонгорхүү дээр очсон боловч автобусыг нь бүрэн засаж өгөхгүй, үйлчилгээнд хөөж гаргасан байгаа юм. “Тоормос нь ажиллахгүй байна, засаад өгөөч” гэж гуйхад нь “Өдөржин янзлуулчихаад” хэмээн уцаарлаж, засаж өгөөгүй гэдгийг эх сурвалжууд мэдээлсэн. Ингээд тухайн өдрийн үүрэгт ажлаа дуусгасан жолооч бааз руугаа явахдаа буюу Шадивлангийн эцсийн буудлаас уруудах замдаа тоормос нь ажиллахаа больж, осолдсон.

“Тэнүүн-Огоо”-д хамаатан садангүй бол тал засахаас өөр аргагүй

Техникийн бүрэн бүтэн байдал, засвар үйлчилгээг хариуцаж, анхаарах үүрэгтэй  засварын инженер Д.Гонгорхүү нь компанийн удирдлагуудтай ураг төрлийн холбоотой аж. Иймдээ ч хариуцлага хүлээх нь битгий хэл, хэдэн жолооч нарынхаа толгой дээр гарч, “Засвар хийж өгөхгүй” гэхчлэн дураараа аашилдаг байна. Компанийн оффист суудаг ажилтнуудын олонх нь хоорондоо ах дүүс, эсвэл хамаатан садан хүмүүс. Харин зөвхөн жолооч нар л бор зүрхээрээ, байнгын дарамт, шахалтад ажилладаг гэнэ. Тухайн компанид ажиллаж эхэлсэн бол хамгаалалтын албаныхнаас нь эхлээд л тал засаж, эвтэйхэн харьцахгүй бол дарга даамал нь нийлж дээрэлхдэг байна.

 Шинэ жолооч нартаа он хуучирсан, актанд гарсан шахуу автобуснуудаа өгч, эвдрэл, гэмтэл гарвал жолооч нартаа хариуцлага тооцдог байна. Өр, зээлд орсон жолооч нар нь ажиллахаас өөр аргагүй байдалд хүрч, хэл ам татлахгүй ая эвийг нь олж ажлаа хийхээс өөр аргагүйд хүрдэг гэнэ. Хамаатан садан нь компанийн удирдлагууд учраас засварын инженер Д.Гонгорхүү жолооч нарын “босс” хийж, тэднийг хүссэнээрээ хөдөлгөн, эрх мэдлээрээ далайлгадаг гэдгийг эх сурвалж ярьж байлаа. Д.Гонгорхүүгийн ааш аягт тааруулж, харьцаж чадвал засвар сайтай, аюулгүй тээврийн хэрэгслээр үйлчилгээнд гарна. Хэрэвзээ түүнтэй шөргөөцөлдвөл автобус нь явахгүй болсон ч үйлчилгээнд гарахаас өөр аргагүйд хүрдэг. Ийн автобус үйлчилгээнд явж байгаад саатаж, осол аваар гаргах, эвдрэх, цаашлаад хүний амь эрсэдвэл энэ бүхний хариуцлагыг жолооч нарт тохно. Ийм тохиолдол нэг бус гарсан аж.

Ах дүүгээрээ холбогдсон “Тэнүүн-Огоо” компанийн удирдлагууд

“Тэнүүн-Огоо” ХХК-ийн ерөнхий захирал нь А.Ганхуяг гэж хүн бий. Тэрбээр хэд хэдэн удаа хэрэг төвөгт орооцолдож байсан бөгөөд өөрийн ураг төрлийн хүмүүсээ компанийнхаа удирдах албанд ажиллуулдаг. Захын жишээ дурдахад, түүний төрсөн эгчийн хоёр хүүхэд нь хоёулаа “Тэнүүн-Огоо” ХХК-д удирдах албан тушаал хашдаг бол дээр дурдсан засварын инженер Д.Гонгорхүү үеэл дүү нь. Тодруулбал, “Тэнүүн-Огоо” компанийн хамгаалалтын албаны дарга Т.Цогтбаатар, хоёрдугаар баазын жолооч нарыг хариуцсан дарга Т.Цогтсайхан нар нь ерөнхий захирал А.Ганхуягийн төрсөн эгчийнх нь хүүхдүүд юм байна. Түүнчлэн осолд орсон жолооч тус компанийн хоёрдугаар баазад харьяалагддаг байжээ. Нэгэнт ийм холбоо сүлбээ байгаа юм чинь доод албан тушаалтнууд нь ч ялаагүй ах дүү, хамаатан садан, найз нөхдөө ямар нэг байдлаар тодорхой албан тушаалд томилон ажиллуулдаг байхыг үгүйсгэхгүй. Өнчин хүнд ноён олон гэгчээр хурган дарга нар хэдэн жолооч нараа дарамталсаар үг хэлэх ч эрхгүй болгодог аж.