Монгол Улсын Зэвсэгт хүчин 100 жилийн настай. Хүнээр бол хэдийн нас тогтож, хойч үедээ алдсан, оносон бүгдээ сургаж, зааварчилж, төлөвшчихсөн байх ёстой салбар. Гэтэл эл салбарт гарахгүй хэрэг гэж байхгүй боллоо. Хүний нялх үрийг цэргийн дарамт, байлдагчийн үзэх ёстой амьдрал гэх нэрээр зодож, тамлаад хөнөөчихдөг. Энхийг дэмжих ажиллагаанд оролцож буй албан хаагчаа “Хов зөөсөн” хэмээн ялгаварлан гадуурхаж, олны доог тохуу болгож байгаад амиа егүүтгэхэд хүргэсэн. Албан хаагчид нь ажлын цагаар архидан согтуурч, нэгийгээ зодоод алчихдаг. Энхийг сахиулах ажиллагаанаас ирсэн албан хаагч нь эхнэрээ шөнөжин зодож, тамлаж байгаад хөнөөсөн гээд аймшигт хэрэг ар араасаа гарч байна. Үүгээр ч зогсохгүй ЗХЖШ-ын нэгдүгээр орлогчийн ажлын албыг хашиж байсан бригадын генерал нь эхнэртээ хутга тулгаж, гэр бүлийн хүчирхийлэл үйлдсэн гэв үү.

         Тодруулбал, хахуулийн хэрэгт нэр холбогдож, АТГ-аас шалгагдаж байсан бригадын генерал Ц.Жавхланбаатар гэр бүлийн хүчирхийллийн хэргээр цагдаагийн байгууллагад дахин шалгагдаж байгаа гэнэ. Тэрбээр энэ сарын 15-ны шөнө эхнэртээ хутга тулгаж, амь насанд нь заналхийлсэн тухай дуудлага цагдаагийн байгууллагад иржээ. Дуудлагын дагуу Баянзүрх дүүргийн Цагдаагийн нэгдүгээр хэлтсийн албан хаагчид шалгалтын ажиллагаа явуулахад бригадын генерал Ц.Жавхланбаатар согтуу, эхнэр, хүүхдэдээ агсам тавьж байсан үйлдлийг таслан зогсоожээ. Цагдаагийн албан хаагчид Ц.Жавхланбаатарт хэрэг бүртгэлийн хэрэг нээн шалгаж байгаа аж.

           АТГ-аас өнгөрсөн 2019 оны тавдугаар сард тухайн үеийн ЗХЖШ-ын Хуурай замын цэргийн командлалын хэлтсийн дарга, хурандаа Ц.Жавхланбаатарыг авлигын хэргээр шалгаж байлаа. Тодруулбал, Зэвсэгт хүчний 284 дүгээр ангийн ахлагч .. –ийн ээж “Хурандаа Ц.Жавхланбаатар нь миний хүүг “Энхийг сахиулах ажиллагаанд явуулж өгнө” гэж хэлээд 3.5 сая төгрөг аваад, залилчихлаа. Энэ асуудлыг шалгаж өгөөд, мөнгийг минь буцааж олгоно уу” гэх утга бүхий өргөдлийг хууль хяналтын байгууллагад өгсөн байдаг. Үүнтэй холбогдуулан түүнийг эрх мэдэл, албан тушаалын байдлын байдлаа урвуулан ашиглаж, бусдаас авлига авсан үндэслэлээр Эрүүгийн хэргээр үүсгэж, шалгаж эхэлсэн юм. 

          Эл хэрэг 2018 оны тавдугаар сард болсон байдаг. Бригадын генерал Ц.Жавхланбаатар нь Зэвсэгт хүчний 284 ангийн ахлагч ..-г Исламын Бүгд Найрамдах Афганистан Улсад явагдаж байсан “Шийдвэртэй дэмжлэг” энхийг дэмжих ажиллагаанд явуулж өгнө хэмээн мөнгө авсан гэдэг. Тэрбээр “Би чамайг эмчийн үзлэг, биеийн тамирын шалгалт, ажиллагааны 45 хоногийн бэлтгэлд гаргахгүйгээр энхийг дэмжих ажиллагаанд явуулна. Чи авч явах зүйлээ бэлдээд, нисэхэд бэлэн байгаарай. Бэлтгэлээс бууж ирсэн хүмүүсээс алдаа дутагдал гаргасан нэгний оронд оруулна” хэмээн 3.5 сая төгрөг бэлнээр авсан гэгддэг. Тэдний харилцан яриа бүтэлгүйтэж, ахлагч залуу Афганистан руу явж чадаагүй байна. Харин үүний дараа түүнийг Бүгд Найрамдах Өмнөд Судан Улсад энхийг сахиулах 850 алба хаагчийн тоонд багтааж, явуулахаар тохирсон ч мөн л бүтэлгүйтсэн тул ахлагч залуугийн ээж хууль хяналтын байгууллагад хандаж, эл хэрэг олон нийтэд ил болсон билээ.  

             Ц.Жавхланбаатар хууль хяналтын байгууллагад шалгагдаж эхэлсэн даруйдаа ахлагчийн мөнгийг буцааж өгсөн гэх мэдээлэл тухайн үед гарч байсан юм. Хоёр жил гаруйн хугацаанд шалгагдаж, хууль хяналтын байгууллагад “ээрэгдсэн” бригадын генерал Ц.Жавхланбаатарт яллах дүгнэлт үйлдэх хүсэлт хүргүүлж, хэргийг прокурорт шилжүүлсэн байдаг. Энэ хугацаанд Ц.Жавхланбаатарт залилуулсан гэх 2-3 хохирч гарч ирэн, 10 орчим сая төгрөг нэхэмжилсэн ч байж болзошгүй байгаа аж. Хачирхалтай нь, прокуророос түүнийг гэм буруугүйд тооцож, хэргийг хэрэгсэхгүй болгосон билээ. Өөрөөр хэлбэл, албан тушаалаа урвуулан ашиглаж, бусдаас авлига авсан хурандаагийн хэргийг хаасан гэсэн үг . Авлигын хэрэгт холбогдож, удаа дараа хууль хяналтын байгууллагын хаалга сахиж, байцаалт, мэдүүлэг өгч, ахлагчаас мөнгө авсан нь тогтоогдсон түүний хэргийг цагаатгаж, хэрэгсэхгүй болгосон. Түүгээр ч зогсохгүй Монгол Улсын Ерөнхийлөгч асан Халтмаагийн Баттулга зарлиг буулгаж, Ц.Жавхланбаатарт Бригадын генерал цол олгосон байдаг.

           Мөн Ц.Жавхланбаатар нь эл хэрэгт холбогдохоосоо өмнө Сонгинохайрхан дүүргийн Цагдаагийн II хэлтэст Эрүүгийн хуулийн 17.3-т заасан улсаас их хэмжээний мөнгө залилан мэхэлсэн хэрэгт шалгагдаж байсан гэнэ. Тодруулбал, тэрбээр хамтран амьдрагчаа цэргийн ангид ажилладаг болгож, сул цалин авч байсан аж. Түүнд Эрүүгийн хэрэг үүсгэж, хууль хяналтын байгууллагаас шалгаж байсан ч хэрэг мөн л хаагдсан байна. Хоёр ч удаа Эрүүгийн хэрэгт холбогдож, шалгагдаж байсан тэрбээр 2019 оны есдүгээр сард тушаал дэвшиж, ЗХЖШ-ын орлогч дарга болоод байсан юм. Тэгвэл тэрбээр өнгөрсөн арваннэгдүгээр сард ҮБИХС-ийн Удирдлагын академийн захирлаар томилогдон ажиллаж байна.  

        Зэвсэгт хүчний нэрийг удаа дараа шороотой хутгаж, эхнэр, хүүхдийнхээ хоолойд хутга тулгаж, айлган сүрдүүлдэг, албан хаагчдаас мөнгө авч, энхийг сахиулах ажиллагаанд явуулна хэмээн залилдаг, хамтран амьдрагчийнхаа нэр дээр сул цалин авч, улсад хохирол учруулдаг гээд байж боломжгүй олон хар гуншинтай бригадын генерал Ц.Жавхланбаатарт хариуцлага тооцож, албанаас нь чөлөөлье, Г.Сайханбаяр сайд аа.