-БАЯН-ӨЛГИЙ АЙМГИЙН ЭМЧ НАРЫН ХАХУУЛЬ АВЧ, ХУУРАМЧ ОНОШ ТОГТООСОН ХЭРЭГТ 611 ХҮНИЙГ ШАЛГАЖ БАЙНА-

420 ГАРУЙ ИРГЭНИЙГ ОНОШИЛГООНД ХАМРУУЛАХАД 268 НЬ ХУУРАМЧ БИЧИГ БАРИМТ ҮЙЛДЭЖ, ҮНДЭСЛЭЛГҮЙГЭЭР УЛСААС МӨНГӨ АВЧ БАЙСАН НЬ ТОГТООГДЖЭЭ 

     Баян-Өлгий аймгийн 40 гаруй эмч Нийгмийн даатгалын дарга мэргэжилтнүүдтэйгээ хуйвалдаж, эрх мэдэл, албан тушаалаа урвуулан ашиглаж, бусдаас авлига авч, хуурамч онош тогтоож иргэдийн хэлж заншсанаар группэд оруулдаг байсан хэргийг манай сайтын сэтгүүлч сурвалжилж, баримтыг ил болгож байсан билээ. Харин энэ удаад тус хэргийг эргэн сануулж, шалгалтын ажиллагаа хэрхэн үргэлжилж байгаа талаар нэхэн сурвалжилж байна.

       2020 оны аравдугаар сард Баян-Өлгий аймгийн зарим иргэн дээрх хууль бус хуйвалдаан болон улс үндэстний эсрэг хийж буй ноцтой гэмт хэргийн талаар Цагдаагийн ерөнхий газар болон АТГ-т гомдол гаргаж, санал хүсэлтээ илэрхийлсэн байдаг. Тухайлбал, “Нэгдүгээрт, улсын бүртгэл мэдээллийн төвд “Монгол Улсын иргэн” гэх бүртгэлтэй мөртлөө Казахстан Улсад давхар иргэншилтэй, Монголоос өндөр настны тэтгэвэр, Казахстанаас мөн тэтгэвэр авдаг олон хүн байдаг. Хоёдугаарт, аймгийн төвийн эмч нар Нийгмийн даатгалын газрын дарга мэргэжилтнүүдтэйгээ хамсарч хахууль авч, хөдөлмөрийн чадвар алдагдалтай хэмээн тогтоож группэд оруулдаг. Группэд оруулсан иргэдийнхээ хахуулын мөнгийг голж, дарамталж, УИХ-ын болон орон нутгийн сонгуульд ашигладаг. Гуравдугаарт, улсаас халамж авахын тулд ач, зээ нарыг нь өндөр настай аав, ээжээрээ овоглож байна” гэх гомдол, санал гаргаж хуулийн байгууллагад хандаж байсан юм. Дээрх гомдлын дагуу АТГ, ЦЕГ-аас хамтарсан ажлын хэсэг гарч, Баян-Өлгий аймагт ажилласан билээ.

     Шалгалтын багийнхан Баян-Өлгий аймгийн эмч нарын оношоор хэлгүй, дүлий гэх хүмүүсийн гэрт очиж, тэднийг эрүүл, саруул гэдгийг тогтоож, сар бүр халамжийн мөнгө авч байсныг илрүүлсэн юм. Мөн 420 гаруй иргэнийг оношилгоонд хамруулахад 268 нь хуурамч бичиг баримт үйлдэж, үндэслэлгүйгээр улсаас мөнгө авч байсан нь тогтоогдож байв.

УИХ-ЫН ГИШҮҮН Б.БЕЙСЕН ЭМЧ НАРЫГ ХАХУУЛИЙН ХЭРЭГТ ТАТАН ОРОЛЦУУЛСАН УУ

      Дээрх хэрэгт холбогдсон эмч нараас гадна 2020 онд УИХ-ын сонгуульд ялалт байгуулсан Ардчилсан намын  гишүүн Б.Бейсен хуулийн байгууллагад шалгагдаж байгаа аж. Түүнийг тус бүлэг хэргийн гол зохион байгуулагч гэдгийг албаны хүмүүс хэлж байсан юм. Тодруулбал, тэрбээр УИХ-ын гишүүн болохдоо “Хөдөлмөрийн чадвараа алдсан” хэмээн хууль зөрчиж, группэд оруулж өгсөн хүмүүсээрээ дамжуулан иргэдийн саналыг авсан байх магадлалтай гэх. Дээрх хууль бус хэрэгт хамгийн их нэр холбогдсон УИХ-ын гишүүн Б.Бейсен, тухайн үед Нийгмийн даатгалын магадлан эмч байсан Н.Сакен, Сэрикжан нар гэх.

-БАЯН-ӨЛГИЙ АЙМГИЙН НИЙГМИЙН ДААТГАЛЫН САНД 1.5 ТЭРБУМ ТӨГРӨГИЙН ХЭМНЭЛТ ГАРЧЭЭ-

    АТГ, ЦЕГ-ын хамтарсан ажлын хэсэг уг хэрэгт мөрдөн шалгах ажиллагаа явуулж, албан тушаалтнуудын хууль бус үйлдлийг илрүүлснээс хойш 2018 онд тус аймгийн нийгмийн даатгалын санд 1.5 тэрбум төгрөгийн хэмнэлт гарч, хууль бусаар групп авах иргэдийн тоо буурсан байна.  

ШАЛГАЛТ ХИЙСНЭЭС ХОЙШ Н.САКЕНД 10 ГАРУЙ УДАА ТАСЛАН СЭРГИЙЛЭХ АРГА ХЭМЖЭЭ АВСАН Ч ТЭРБЭЭР АЙМГИЙНХАА ЭРҮҮЛ МЭНДИЙН ГАЗРЫН ДАРГААР ТОМИЛОГДЖЭЭ

     Харин шалгалтын явцад Ховд, Баян-Өлгий аймгийн шүүхийн нэр бүхий шүүгч нарын явцуу сонирхол тодорхой хэмжээнд саад учруулсан байж болзошгүй гэх. Тухайлбал, Ховд аймаг дахь сум дундын Эрүүгийн хэргийн анхан шатны шүүгч Ц.Гантөгс, Ерөнхий шүүгч Т.Цэцэгмаа нар нь мөрдөгч, прокурорын саналын дагуу яллагдагч Н.Сакенд 10 гаруй удаа таслан сэргийлэх арга хэмжээ авах хурал явуулсан байна. Гэвч эцэст нь, илт хууль бус шийдвэр гаргаж, түүний магадлан эмчийн албан үүргийг түдгэлзүүлээгүй, улмаар яллагдагч Н.Сакен нь албан тушаал дэвшиж, Баян-Өлгий аймгийн Эрүүл мэндийн газрын даргаар томилогдон ажиллаж байна.

Н.САКЕН ГЭЖ ХЭН БЭ

    Тэрбээр 2008-2012 онд Нийгмийн даатгалын хэлтэст магадлан эмчээр ажиллаж байгаад 2012 онд ажлаасаа чөлөөлөгджээ. Харин 2016 онд өмнөх ажилдаа дахин томилогдож, өнгөрсөн зургадугаар сарын 26-нд Баян-Өлгий аймгийн Эрүүл мэндийн газрын даргаар ажиллаж байна.

БАЯН-ӨЛГИЙ АЙМГИЙН ЭМЧ НАРЫН ХАХУУЛЬ АВЧ, ХУУРАМЧ ОНОШ ТОГТООСОН ХЭРЭГТ 611 ХҮНИЙГ ШАЛГАЖ БАЙНА

       Тус хэрэг нь одоогоор 49 яллагдагчтай, 251 хавтаст хэрэг бөгөөд уг хэргээс хахууль өгөгч 562 иргэнд холбогдох хэргийг тусгаарлан мөрдөн шалгах ажиллагааг үргэлжлүүлж байгаа аж. Дээрх 49 яллагдагч дээр хахууль өгсөн үйлдэлд шалгагдаж байгаа 562 иргэнийг нэмж яллагдагчаар татсан тохиолдолд 611 хүнийг нэгэн зэрэг шүүхээр шийдвэрлэх нөхцөл үүсжээ.