Хэнтий аймаг Мөрөн суманд 15 настай сурагч охин сураггүй алга болсон талаар бид өмнө нь мэдээлсэн. Тодруулбал, энэ сарын 4-ийн 12:00 цагийн үед охин гэрээсээ “Дэлгүүр орлоо” гээд гараад ор сураггүй алга болсон юм.  Охины аав, ээж цагдаагийн байгууллагад мэдэгдэж, эрлийн ажиллагааг цаг алдалгүй эхлүүлсэн ч охиныг өнөөдрийг хүртэл олоогүй байна.

Энэ талаар охины ар гэрийнхнээс тодруулахад “Охинтой минь адилхан хүүхэд Улаанбаатар явж байгаа сураг гарсан. Охиныгоо хайхаар аав, ээж хоёр нь Улаанбаатар хотод өчигдөр шөнө ирсэн. Охин минь төлөв даруухан хүүхэд. Хоёр хоногийн өмнө дүү нартайгаа гэртээ толгож байгаад “Дэлгүүр ороод ирье” гэж хэлээд гараад явсан байна лээ. Сумын камерыг шүүж үзэхэд гэрээсээ гараад явж байгаа нь л харагдаж байна. Цаашаа хаашаа явсан нь тодорхойгүй, сэжүүр байхгүй байгаа. Тухайн өдөр сэтгэл санаа нь хэвийн, гэрт хэрүүл  маргаан гараагүй байсан. Охиныг олж өгөхөд та бүхнийг туслаач хэмээн гуйж байна. Мөн бидэнд туслаж, охиныг минь хайж байгаа нутгийнхаа удирдлага, иргэддээ баярлалаа” гэв.

Содон шинж тэмдэг богино үстэй, 160 см өндөртэй. Охин алга болох үедээ цэнхэр малгайтай гадуур хувцастай, цэнхэр өмд, хар адууны арьсан гуталтай, харааны нүдний шилтэй явжээ. 

Иргэд та бүхэн дээрх мэдээллийг түгээж, охиныг харсан хүн байвал 92069721 85206966 98022002 90576161 98984034 утсаар холбогдож, тус болохыг охины аав, ээж хичээнгүйлэн хүслээ. Охины аав, ээж Улаанбаатар хотод таних хүн, очих газаргүй учир утсаа цэнэглэж чадахгүй байгаа аж.