Гадаадын иргэдийг дээрэмдсэн хэрэг гарлаа. Тодруулбал, өчигдөр Хан-Уул дүүргийн 11 дүгээр хорооны нутаг дэвсгэрт хятад иргэд "Халдлагад өртөж, 1.2 тэрбум төгрөгөө дээрэмдүүллээ" гэх мэдээлэл цагдаагийн байгууллагад иржээ. Дуудлага, мэдээллийн дагуу Эрүүгийн цагдаагийн газрын мөрдөгч, хошууч А-аар ахлуулсан бүрэлдэхүүн шалгаж байна.

Б.БААТАРХҮҮ: ГАДААДЫН ИРГЭДИЙГ ДЭЭРЭМДСЭН ГЭХ ДУУДЛАГЫН ДАГУУ АЛБА ХААГЧИД АЖИЛЛАЖ БАЙНА

              Дээрх дуудлага цагдаагийн байгууллагад өчигдөр буюу нэгдүгээр сарын 3-ны 15:00 цагийн үед иржээ. Дуудлагын дагуу Эрүүгийн цагдаагийн газар, Хан-Уул дүүрэг дэхь Цагдаагийн хэлтсийн албан хаагчид, Шүүх шинжилгээний албаныхан бүрэлдэхүүнээрээ ажиллажээ. Энэ талаар ЦЕГ-ын Хэвлэл мэдээллийн төвийн дарга, хурандаа Б.Баатархүүгээс тодруулахад “Хан-Уул дүүргийн 11 дүгээр хороонд гадаадын иргэний их хэмжээний мөнгийг дээрэмдсэн дуудлага бүртгэгдсэн нь үнэн.  Дуудлагын дагуу манай алба хаагчид ажиллаж байгаа учраас тодорхой мэдээлэл өгөх боломжгүй. Мөрдөн шалгах ажиллагаа явагдаж байна” гэх мэдээллийг өчигдөр 17:30 цагийн үед өгсөн юм.

БНХАУ-ЫН ИРГЭДИЙН МӨНГИЙГ ГЭРЭЭС НЬ ДЭЭРЭМДЖЭЭ

             Эргэлт.мн мэдээллийн сайтын сурвалжлах баг өчигдөр 17:00 цагийн үед хэргийн газар буюу Хан-Уул дүүргийн 11 дүгээр хороонд байрлах “River garden”-1 хотхонд очлоо. Биднийг очих үед мөрдөн шалгах ажиллагаа ид үргэлжилж байлаа. Тус хотхоны 3.. дүгээр байрны .. орцыг цадаагийн алба хаагчид хамгаалалтад авч, шүүх шинжилгээний алба, Эрүүгийн цагдаагийн газрын алба хаагчид хэргийн газарт ажиллаж, дээрэмдүүлсэн хятад иргэдээс тайлбар мэдүүлэг авч байлаа. Тус байрны .. дугаар орцны .. тоотод хоёр хятад иргэн амьдардаг байжээ. Тэднийг гэртээ байхад нь бүлэг этгээд нэвтэрч, 1.2 тэрбум төгрөгийг нь дээрэмдсэн гэнэ. Тэд монголоор ярьж чадахгүй тул цагдаа нартай хэл нэвтрэлцэж, ойлголцож чадахгүй байгаа учраас тайлбар, мэдүүлэг, мөнгөний тоогоо үнэн зөв хэлж чадахгүй байна гэв.nbsp; 

БНХАУ-ЫН ИРГЭДИЙГ ЗОДОЖ, БИЕД НЬ ГЭМТЭЛ УЧРУУЛЖЭЭ

             Мөнгөө дээрэмдүүлсэн хятад иргэдийг зодож, биед нь гэмтэл учруулжээ. Тодруулбал, тэдний нүүр, амыг нь цохиж, гар, хөлийг нь хөхрүүлсэн байж болзошгүй нөхцөл байдалтай байсан юм. Биднийг очих үеэр хар, хөх өнгийн цэнхэр цамцтай 40-50 насны нүүр нь хөхөрч, гар нь гэмтсэн хоёр хятад эрэгтэй гэрчийн мэдүүлэг өгч байв. Тэд мөрдөгч нартай ойлголцож чадахгүй байгаа бололтой, хятадаар ярьж, орилж, хашхичиж байсан юм.

ХЭРГИЙН ГАЗРААС 16 ХҮНИЙ ХУРУУНЫ ХЭЭ ОЛДЖЭЭ

               Цагдаагийн алба хаагчид эл хэргийг үйлдсэн этгээдүүдийг болон мөнгөний эх үүсвэрийг тогтоохоор ажиллаж байна. Харин хэргийн газраас 16 хүний хурууны хээ олджээ. Тус байр нь давхартаа дөрвөн айлтай бөгөөд дээрмийн хэрэг гарсан айлын хаалга, хананд хүрсэн бүх хүний хурууны хээг тусгай багажаар илрүүлж, эд мөрийн баримтаар хураан авсан байна. Мөн эд мөрийн баримтаар хэргийн газрын олон тооны кадр, хятад иргэдийн мэдүүлэг, хөндлөнгийн гэрч болох байрны жижүүрийн яриаг баталгаажуулан авчээ.

БАЙРНЫ ЖИЖҮҮР: МӨНГӨӨ ДЭЭРЭМДҮҮЛСЭН ИРГЭД ӨӨРСДӨӨ ЦАГДААД ДУУДЛАГА ӨГСӨН

          Тус байрны хоёр жижүүр хөндлөнгийн гэрчээр оролцлоо. Тэднээс зарим зүйлийг тодруулахад “Нарийн ширийн учрыг нь мэдэхгүй байна. Хятадууд энд удаан амьдарч байгаа. Гэхдээ ирж, очин байдаг байх. Тэд дээрэмдүүлснийхээ дараа өөрсдөө дуудлага өгсөн юм билээ. Биднийг мэдээгүй байхад гэнэт л цагдаагийн машин орж ирээд, “Дээрмийн хэрэг гарсан” гэж хэлсэн. Бусдаар юу ч мэдэхгүй байна. Манай байр нь энд, тэндгүй камертай, харуул хамгаалалттай, орж, гарч байгаа машиныг хянаж байдаг” гэсэн юм.

ХӨРШ АЙЛ: ӨДРӨӨС ХОЙШ ЦАГДАА НАР АЖИЛЛАЖ БАЙНА

            Бид хэргийн талаар тус байрны оршин суугчаас тодруулахад “Манай байранд гадаадууд голчлон амьдардаг. Өдрөөс хойш цагдаа, шүүх шинжилгээний олон машин байрны гадаа зогсож, орцон дотор дүрэмт хувцастай хүмүүс явж байгаа харагдсан. Юу болсон талаар нь асуухад тайлбар өгөөгүй. Тэгээд цахимаас манай хотхонд их хэмжээний мөнгө дээрэмдүүлсэн хэрэг гарсан гэдгийг олж мэдлээ. Дээрэм болсон айлд хятад хүмүүс их ирдэг. Хэд хэдэн удаа таарч байсан” гэлээ.