“Богд Зонхова” бурхны хөшөө бүхий цогцолборыг хэний, ямар компани барьж байгаа вэ гэдгийг мэдэх хүн “байхгүй”. Холбогдох яамныхан ч, төсөл санаачилсан гурван гишүүн нь ч “мэдэхгүй”. Тендер зарлагдаагүй байхад нэг компани гэнэтхэн гарч ирээд энэ цогцолборыг барьчихсан мэт үлгэр ярьж, монголчууд саарал ордны гишүүд, Соёлын яамныхантайгаа хамт барилга барьсан компанийн эрэлд гараад багагүй хугацаа өнгөрлөө.  Иймд “Эргэлт.мн” мэдээллийн сайт “Богд Зонхова” цогцолборын барилгыг барьсан компанийг уншигч танд танилцуулах гэж байна.

“Улсын төсвийн 32.5 тэрбум төгрөгийг хүнд цаг үед бурхан, булш барихад зарцууллаа” хэмээн хэл, ам дагуулж, царцаагдсан гэх “Богд Зонхова” бурхны хөшөө барьж байгаа дэнжид өнжлөө. Барилгын ажил зогсжээ. Хоёр харуул баригдаж байгаа барилгыг хэдэн нохойтойгоо сахиж байна. Бурхны цогцолборын барилгын дөрөв дэх давхрын цемент цутгах ажлыг хийсэн байв. Энд, тэндгүй мод, шороо, сайжруулсан шахмал түлш овоолж орхисон нь барилгын ажил ид дундаа явж байгаад зогссон гэдгийг нь илтгэнэ.

“БОГД ЗОНХОВА” ЦОГЦОЛБОР БАРИГДАЖ БУЙ ХАШААНД “ЗАРТ-ӨРГӨӨ” ХХК ОФФИС, АЖИЛТНУУДЫН БАЙРАА ТӨВХНҮҮЛЖ, ХОЁР ЧИНГЭЛЭГ БАЙРШУУЛЖЭЭ

        Чингэлтэй дүүргийн тавдугаар хороо Тасганы овоонд баригдаж байгаа “Богд Зонхова” бурхны хөшөө бүхий цогцолборын барилгыг  “Зарт-Өргөө” ХХК гүйцэтгэж байжээ. Тус компани нь “Богд Зонхова” цогцолбор баригдаж буй хашааны баруун хойд буланд хоёр чингэлэг байршуулж, оффис, нягтлан, ажилтнуудаа байрлуулж байсан байна. Өөрөөр хэлбэл, эрэл сурал болоод байсан өнөөх компанийн нэр “Зарт-Өргөө” гэсэн үг. Одоо цогцолборын барилгыг “Зарт-Өргөө” ХХК-ийн хоёр ажилтан манаж, дотогш нь хүн битгий хэл нохой ч нэвтрүүлэхгүй байна. Эх сурвалжийн мэдээлснээр “Тус барилгын ажлыг өнгөрсөн тавдугаар сараас эхэлж хийсэн. Барилга дээр 50-60 хүн ажиллаж байгаа харагдсан. Бурхны хөшөө болно гэдгийг мэдэх өдөр хүртэл энэ барилга дээр хүмүүс ажиллаж байсан. Шөнө нь барилга дотроо гал түлээд байгаа бололтой утаа, май гараад л байдаг байсан даа. Харин барилгын ажлыг зогсоосноос хойш хүмүүс харагдахаа больсон. Харуул нь бололтой ганц, хоёр хүн хашаан дотуур явж байгаа харагддаг. Харин ганц, хоёр машин хаяадаа орж, гарч байдаг” гэлээ. Барилгын хашаагаа тэнгэр “тултал” барьж, хажууд нь очсон хүн дотор нь юу болж байгааг харах ямар ч боломжгүй аж.

“ЗАРТ-ӨРГӨӨ” ХХК ХЭНИЙХ ВЭ

“Богд Зонхова” цогцолборын барилгыг барьж байгаа “Зарт-Өргөө” ХХК-ийг танилцуулах нь зүйтэй болов уу. Тус компани 2010 оны тавдугаар сарын 17-нд гадаад худалдаа, барилгын завсар, засал чимэглэл, барилгын материалын худалдаа  чиглэлээр үйл ажиллагаа явуулахаар Улсын бүртгэлд 5379636 регистрийн дугаараар Улаанбаатар, Сүхбаатар, арваннэгдүгээр хороо, 160 тоот хаяг дээр Балжиннямын Гэрэлмаа гэж хүний нэр дээр анх бүртгэгджээ. “Богд Зонхова” цогцолборын барилгын ажлыг гүйцэтгэх хүртлээ бүртгэлд нь ямар нэг өөрчлөлт ороогүй, тодорхой үйл ажиллагаа ч явуулаагүй “цагаан” түүхтэй компани. Харин 2013 онд Дорноговь аймгийн Замын-Үүд хотын захирагчийн ажлын албанаас зарласан Замын-үүд сумын хоёрдугаар багийн албан конторын барих тендерт оролцож, 105 сая төгрөгийн санхүүжилт авч байсан юм байна.

“Зарт-Өргөө” ХХК-ийн улсын бүртгэл дээрх хаяг болон Балжиннямын Гэрэлмаа нэрээр шүүлт хийж үзвэл, түүний нэр, хаяг дээр “Зартсан” ХХК, “АНСАБА” ХХК гэсэн гурван компани бүртгэлтэй байх аж.  Тус компаниудын оролцож байсан тендерийг шүүж үзэхэд гадаад худалдаа, барилгын завсар, засал чимэглэл, барилгын материалын худалдаа, гэрээ, захиалгаар хийдэг бөөний худалдаа, худалдааны зуучлалын  үйл ажиллагаа явуулахаар байгуулагдсан дээрх компаниудад оролцсон тендер, үйл ажиллагаа явуулсан бүртгэл алга.

“Зарт-Өргөө” ХХК-ийн гүйцэтгэх захирлаар Гэндэн Сансармаа гэж хүн ажилладаг аж. Харин үүсгэн байгуулагч, хувьцаа эзэмшигч, эзэн нь Балжиннямын Гэрэлмаа. Г.Сансармаа захиралтай, Б.Гэрэлмаа эзэнтэй “Зарт-Өргөө” ХХК нь ногоон гэрлээр бус, гэрэл ч асаахгүйгээр буюу тендер зарлаагүй байхад барилгын ажлаа эхлүүлсэн нь хамгийн хачирхалтай байгаа юм.

“ЗАРТ-ӨРГӨӨ” ХХК-ИЙН ЭЗЭН Б.ГЭРЭЛМАА ГЭЖ ХЭН БЭ

“Зарт-Өргөө” ХХК-ийн эзэн гэх Балжиннямын Гэрэлмаа гэж Завхан аймгийн гаралтай. Дундговь аймагт өссөн. Боловсрол шинжлэх ухааны яамны харьяа Боловсролын хүрээлэнгийн Мэргэжил боловсролын агуулга, хөтөлбөрийн судалгаа хариуцсан ЭША. 2005-2009 онд ШУТИС, 2010 оноос МУИС-д багшилж байсан.