-Архангай аймгийн Цэцэрлэг сумын ерөнхий боловсролын сургуулийн наймдугаар ангийн сурагчид зодолдож, нэгийгээ хүнд гэмтээжээ-

        Сургуулийн сурагчид хоорондоо зодолдох, нэгийгээ бүлэглэж зодож, хүнд гэмтээ хэрэг өдөр дараалан гарах боллоо.

        Хамгийн ойрын жишээ гэхэд, Баянзүрх дүүрэг, 13 дугаар хорооллын ойролцоо 15-16 насны дөрвөн хүүхэд нэг хүүхдийг бүлэглэж, хэрцгийгээр зодож байгаа бичлэг цахим орчинд тархаад удаагүй байна. Хүүхдүүд “Над руу муу харлаа, мөрөнд хүрлээ” гэх шалтгаанаар зодолдож, нэгнийхээ биед гэмтэл учруулсан гэх.  

Тус зодооныг эхлүүлсэн 16 настай сурагч Н хэлэхдээ “Сурагч Н “Арваннэгдүгээр сарын 13-нд манай найзууд байрныхаа гадаа сагс тоглохоор гарсан юм. Манай найзууд .. дугаар сургуулийн аравдугаар анги, би коллежид сурдаг. Тоглоомын талбайн орчимд явж байхад өмнө нь харж байгаагүй эрэгтэй хүүхэд намайг мөрлөсөн. Би “Хөөе, яагаад байгаа юм бэ” гээд бид хоёр бага зэрэг маргалдаж, тэр хүүхэд намайг элэгдсэн. Тэгээд би хоёр удаа өшиглөж, нэг удаа цохисон юм. Хажууд нь хэрэлдээд, зодоон болохоор манай найзууд намайг өмөөрөөд, ирж зодсон. Биднийг нэг эмэгтэй найз маань ирж салгасан. Бид зодоон болсны дараа учир зүйгээ олж, нөгөө хүүхдээс уучлалт гуйсан. Тэр хэлэхдээ “Би та нарт гомдолгүй, эмэгтэй найзыг нь эхлээд мөрлөж, элэгдсэн болохоор найзууд нь өмөөрсөн байх” гэж хэлсэн. Тэгээд өчигдрөөс бичлэг цацагдаж, маш олон хүн над руу дайрч байна. Би хийсэн хэрэгтээ, тэр хүүхэдтэй хэрэлдэж, зодолдсондоо маш их гэмшиж байна. Өөрөө очиж, цагдаагийн байгууллагад ханддаг юм уу гэж бодож байна. Тэр хүүхэдтэй өчигдөр уулзаад, бичлэг цацагдаж гээд хэлсэн чинь “Би гомдол гаргаагүй байхад яаж байгаа юм бол” гээд асуусан. Тэр бичлэгийг хэн хийснийг мэдэхгүй байна. Манай найзуудад зодуулсан хүүхэд урт үстэй болохоор эмэгтэй хүүхэд гэж хараад байх шиг байна. Тэр арваннэгдүгээр ангийн эрэгтэй хүүхэд” гэсэн мэдээллийг өгсөн.

Хохирогч сурагчийн биеийн байдал хэвийн гэх шалтгаанаар гомдол гаргахаас татгалзсан гэх. Харин бүлэглэж, бусдын биед халдсан, танхайрсан гэх үндэслэлээр сурагчдыг Баянзүрх дүүргийн II хэлтэст шалгаж байна.

         Энэ хэрэг гараад удаагүй байхад мөн л 97 дугаар сургуулийн 40 гаруй сурагч есдүгээр ангийн хүүг шалтгаангүй зодож, танхайрсан гэх хэрэг гарлаа. Хүүхдүүд сургуулийн ойролцоо хохирогч хүүг зодож, биед нь хүнд гэмтэл учруулсан нь тогтоогдсон. Бусдад зодуулсан хүүгийн биеийн байдал хүнд, тархинд цус хуралттай, гавлын яс цууралттай гэх оноштойгоор ГССҮТ-д эмчлүүлж байна. Хэргийн талаар хохирогч хүүгийн ах хэлэхдээ “Манай дүүг сургуулиас нь тарж явахад отож байгаад зодсон байна. Дүүгийн минь гавлын яс цуурсан, цус хуралттай байдалтай эмчлүүлж байгаа. Эмч нь хагалгаанд оруулж магадгүй гэсэн. Биеийн байдал нь хүнд байна. Энэ хэргийг тус сургуулийн гурван бүлгийн 40 гаруй хүүхэд үйлдсэн” гэсэн юм.Хүүгийн ээж цагдаагийн байгууллагад өргөдөл гаргаснаар эл хэрэг олон нийтэд ил болсон. Тус хэргийг өдгөө Баянзүрх дүүргийн хоёрдугаар хэлтэст шалгаж байна. Харин тус сургуулийн удирдлагууд сургуулиас нь 100 метрийн цаана болсон хэргийг 24 цагийн дараа буюу хохирогч хүүгийн ар гэрийнхнийг очиж, уулзахад мэдсэн байна.

Сургуулийн сурагч нэгийгээ бүлэглэн зодож, танхайрсан дээрх хэргүүдийн дараахан буюу өдийгөөс гурван хоногийн өмнө ийм төрлийн хэрэг дахин гарчээ. Тодруулбал, Архангай аймгийн Цэцэрлэг сумын ерөнхий боловролын сургуулийн наймдугаар ангийн хоёр сурагч зодолдож, нэгнийхээ дөрвөн шүдийг хугалсан ноцтой хэрэг гарчээ. Сурагчид сургуулийн байранд зодолдсон бөгөөд хажууд нь ангийнх нь хүүхдүүд хараад зогсож байсан гэх. Харин ангийн багш нь ирж, хүүхдүүдийн зодооныг зогсоосон гэх мэдээлэл байна.

        Хэргийн талаар хохирогчийн ар гэрийнхэн “Наймдугаар ангийн хүү минь ангийнхаа хүүтэй зодоон хийсэн байна лээ. Хүүгийн минь үүдэн дөрвөн шүдийг хугалж, тархинд нь хүнд гэмтэл учруулсан. Наймдугаар ангийн багш Э гэх эмэгтэй ангийнх нь хоёр хүүхэд зодолдож, нэгийгээ хүнд гэмтээсэн байхад тоогоогүй. Миний хүүхдийн биеийн байдлыг нэг ч удаа асуугаагүй. Харин ч ар гэрийнхэн биднийг загнаж, маргааш нь “Хүүхдээ хичээлд нь явуул. Юун сүртэй юм бэ, шүд нь хугарсан байна лээ. Гавьяа байгуулчихаад байгаа биш, хүүхдээ юундаа өмөөрөөд байгаа юм” гэж таахалзсан. Хүү минь зодуулж, тархи толгой нь эргээд хэцүү байгаа. Бид хүүхдээ хэд хоног хичээлд нь явуулж чадахгүй тухайгаа ангийн багш Э-д хэлэхэд “Би цалингаасаа хасуулж чадахгүй. Хэрэв та нар гомдол, тэмцэл гаргах юм бол хүүхдээ манай ангиас авч болно” гэж хүртэл сүрдүүлсэн. Анги удирдсан, хүүхэдтэй минь хамгийн ойр байх ёстой багш нь ингэж хэлсэнд бид маш их гомдолтой байна. Ангийн багш нь миний хүүгийн биеийн биеийг асуугаагүй, аашилж загнасан хэрнээ зодсон хүүгийн аавтай нууцаар уулзаж, энэ зодооныг хүүг минь эхлүүлсэн болгож, үхсэн хуувилдаж байна” гэлээ.

Бид энэ талаар Цэцэрлэг сумын сургуулийн захирал болон хүүгийн ангийн багшаас тодруулах гэсэн боловч “мэдээлэл өгөхгүй” гэлээ.